بين الماضي والحاضر
همس القوارير
بيج قصص همس القوارير
البارت التاسع
المهم من دخلت لبيت ابو قحطان تلگوني بالصلاوات اجوي كلهم يمي سألوا عليه وعلى اخواني وخواتي لان كانو اصدقائهم وسألو على امي وعلى زوجتي وشكد صار عندي اولاد وحجيتلهم على بيتنا ووضعنا صدك كانو مثل الاهل وبقيت انتضر بسمه ياربي شوكت تجي اريد اشوفها ضليت اشتغل بالغرفه وما اركز عيني عالباب لحد ما التهيت بالشغل ونسيتها من كثر ما انتضرتها واني داشتغل واسمعها
بسمه : عساف
التفتت عليها وگلبي يدگ كول قوته وعيوني عليها تمنيت احضنها اوووف شگد كنت مشتاقلها
عساف : هلو بسمه شلونج
بسمه : الحمدلله بخير انت شلونك كنت انتضرهم يطلعون ويلتهون حتى اجي اسلم عليك
عساف : شلونه وضعج ليش تطلگتي اريد اعرف اخبارج
بسمه : هسه ما اكدر احجي وياك هذا رقمي واريدك تتصل بيه
عساف : ماشي الحال اوكي اخابرج لحضه وين رايحه
بسمه : لازم اروح لا يجون يشوفوني يمك وتصير سالفه عساف انتضرك تتصل عليه
عساف : اوكي الله وياج
ورجعت كملت شغلي وخلصته وطلعت رحت للبيت لان كنت كولش تعبان كتبته الرقم بموبايلي وكلت من تصيرلي فرصه اخابرها وفعلا ثاني يوم العصر رحت للدوام ودكيت على بسمه ومن حجت ما اعرف شنو صار بگلبي ما ادري هو فرح او لهفه او شوگ بحيث اختلطت عليه المشاعر
بسمه : الوووو
عساف : شلونج بسمه
بسمه : عساف الحمدلله انت شلونك
عساف : اني بخير من شفتج
بسمه : عساك دائما بالخير
عساف : تدرين شگد مشتاقلج وين جنتي كل هالسنين من عفتيني وانتي ما غبتي عن عيني ولا لحضه
بسمه : اوووف يا عساف الدنيا محلوه وشوفتني الضيم من تزوجت
عساف : سولفيلي قصتج يا الغاليه وشنو صار وياج
بسمه : من تزوجت ابن عمي من اول شهر شوفوني المر بعينه رادوني خدامه ما رادوني جنه ضليت ليل ونهار شغل وتعب واذب روحي مثل الميته وما يعجبهم العجب كولشي الي اسويه ما يعجبهم وحاربوني وقررنا نعزل بيت لوحدنا وفعلا عزلنا وعشنا حياتنا طبيعيه مرت ٣ سنوات على زواجنا وما صار عندي اطفال مخليت دكتور ما رحتله ومخليت كشافه مرحتلها ردت بكل الطرق يصير عندي اطفال ومصار والسبب مني لان زوجي كولشي ما بيه فحجيت ويه زوجي وكوتله لازم تتزوج لان اني ميصير عندي اطفال واني ابقى على ذمتك لان عادي الخلل مني ومن حقك تشوف اطفالك
عساف : بس ليش قبلتي هالشكل غلط
بسمه : ما حبيت اكون انانيه كانت اكو بنيه عاجبته واني ما اعرف فگالي بسمه ميقبلون ينطوني مره اله اطلگج شنو رايج اطلگج مدة شهرين وبعدين ارجعج اني كوتله ميصير اني اروح اگوللهم اني موافقه گالي لا ميقبلون اله اطلگج لا تخافين حبيبتي والله شهرين او ثلاثه بالكثير وارجعج
عساف : اي وبعدين
بسمه : وفعلا طلگني وبقينا على اتفاقنا ثلاث اشهر ويرجعني على ذمته من اول شهر الي تزوج بيه حملت زوجته واني فرحت اكثر منه بالطفل گولت خلاص راح اعيش وياهم واخليهم ينطوني طفل اربيه واخليهم يجيبون غيره ويصيحلي ماما برغم كنت فرحانه أله بس بداخلي حسره وقهر بعد ٣ اشهر من زواجه ادگ عليه ميجاوب اروحله للدوام ميخليني افوت يگول للسكرتير لا تخليها تدخلي لحد ما فد يوم دگيت عليه من غير رقم وجاوبني وگالي انتي بعد انتهيتي من حياتي واني بعد ما اريدج وانتي عندي زوجتي وطفلي الي جاي ما اخليج تخربين حياتنا وانسيني
عساف : اووووف يالنذل هو هذا الي اهلج فضلوه عليه مع الاسف
بسمه : امي شبعت بجي وقهر ودائما تگول ليش ما انطيتج لعساف وتعظ صابيعها ندم
عساف : وصارلج شگد من تطلگتي
بسمه : صارلي خمس سنوات
عساف وما شفتي زوجج خلالها
بسمه : اي شفته وهو جاي من السوگ مره وعنده اطفال اثنين واني ضليت وحدي ومتت قهر وبجي
عساف : اوووف الحمدلله والشكر على كل حال لا تنقهرين رب العالمين موجود وان شاءالله يعوضج
بسمه : وانت عساف شنو صار وياك
وضلينا نسولف تقريبا ٣ ساعات وحجيتلها كولشي عن حياتي وطلبت مني ان نبقى اصدقاء واخوه وكل واحد منا يشكي للثاني مشاكله ونحلها سوه واني قبلت بهالصداقه ضليت كلما اروح للمحل احجي وياها بالساعات بسمه مو جان بس شكلها حلو كانت انثى بمعنى الكلمه كانت ذكيه ومرحه وگلبها حيل طيب وتنصحني شلون اتعامل ويه نور وشنو اشتريلها وشنو يحبن النسوان كنت اطبق كلامها وما اعكس هالشي على بيتي بالعكس كانت علاقتي بنور كلش زينه وما عدنا مشاكل وبده حبها يزيد بگلبي مو قاط واحد قاطات وصارت عندي الهوى الي اتنفسه احس بيها هي ألي وشي خاص بيه ما اگدر يوم ما احجي وياها او اراسلها يوم عن يوم يزيد اشتياقي لحضنها احتاريت بنور هنوب حامل وزادت الطين بله شلون افاتحها بالموضوع هي عمرها ما قصرت وياي كانت الي الزوجه والصديقه والاخت والحبيبه ووگفت وياي بالمره قبل الحلوه بس ما اعرف شلون افاتحها بالموضوع مرت على علاقتي بسمه سنه كامله الى ان يوم من الايام صار حوار بينا
بسمه : عساف اني احبك واريدك بس ما اريد ابني سعادتي على تعاست زوجتك وكولش دخت هسه متقدملي شخص واهلي ديلحون عليه ويگولولي ميصير ابقى طول عمري هالشكل هو مطلگ زوجته وعنده اولاد اثنين واني هذه فرصتي اعوض امومتي
عساف : واني ما فكرتي بيه شنو راح يكون وضعي
بسمه : عساف وربي انت روحي من الدنيا ومالي غيرك بس ماكو غير حل انت عندك حل
عساف : انتي ألي انتي مالتي أني لا تتوقعين اعوفج واضيعج من ايدي مرة الخ انتي تحبيني لو لا
بسمه : طبعا احبك واموت عليك
عساف : خلاص نتزوج بالسر بس اهلج يدرون ااجرلج بيت واجيلج بالنهار وبليل اروح لبيتي لان ما اكدر اكسر خاطر نور مهما يكون هي مرتي وام جهالي
بسمه : والله ما اعرف شنو اگولك بس ما اتصور اهلي يقبلون بهالقرار
عساف : خليهم عليه بس اهم شي انتي توافقين
بسمه : شلون ما اوافق وانت نضر عيني
عساف : اوكي باجر العصر اني يمكم واجي اطلب ايدج من اهلج والله كريم الي بيه الخير ربي يقدمه
لحكايتي بقيه
لا احلل ولا اهب لاي شخص يحذف اسمي او اسم القصه ويكون خصيمي يوم القيامه
