بين الماضي والحاضر
همس القوارير
بيج قصص همس القوارير
البارت العاشر
وفعلا ثاني يوم العصر تكشخت وتعطرت وسألتني نور
نور : شعندك اليوم بكامل اناقتك وين رايح
عساف : رايح اعرس عليج
نور : هههههه لا صدك وين رايح
عساف : معزوم بخطبة ولد صاحبي يمي بالمعرض وراح اروح
نور : اها حبي اوكي دير بالك على نفسك ولا تتاخر
عساف : ماشي خير ان شاءالله مع السلامه
طلعت منها وجنت اتمنى اصارحها بس اعرف هذا الشي مو بصالحي طبعا اني ما اضم اي شي عن مختار اخوي بلغته بكلشي وهمين خاف احتاجه بشي واخذته وياي للخطبه ورحت حجيت ويه اهلها
عساف : بصراحه اني جاي اخطب بسمه وياريت تقبلون
قحطان : والله نتشرف بيك ابو كريم بس زوجتك واطفالك شلون
عساف : بصراحه يا خوي اني اتمنى هالشي يبقى سر بيني وبينكم وما احب احد يعرف بالسالفه اني زوجتي اريدها وهي ام جهالي وما احب اكدر خاطرها واوعدكم انو ما اقصر ويه بسمه وراح اسعدها بس ما اريد احد يدري بالموضوع بس اني وانتم واهلكم واخوي مختار
قحطان : والله ما اعرف شگولك يا خوي السالفه صعبه مالت تتزوج بالسر ممقتنع بيها
عساف : خويه مو بالسر بالنسبه الكم بلغوا كل اهلكم بس سالفت اهلي ميدرون وراح اجرلها بيت يمكم وقت ما اني مموجود تبقى يمكم الى ان اشوفلي فرصه وابلغ اهلي
قحطان : اني ما عندي مانع بس انطيني مده يومين تلاثه اشاور الاهل واردلك الخبر
المهم اتفقنا هالشكل وانتضر ردهم بس ضميري ولا مرتاح من ناحية نور اريدها واريد بسمه واحتاريت بفكاري گلت خليها على الله واشوف شنو تاليتها طبعا بلغتني بسمه بموافقة اهلها وكانت كولش فرحانه واني همين افرحت لاول مره بحياتي اريد شي واحصله معقوله هالدنيا بدت تضحكلي واخيرا تقدمت لبسمه وگطعنا مهر واجرت بيت بصف بيت اهلها وضليت يوميه اروح اني وياها نأثث البيت ومخليت نور تحس بأي شي ضلت خطوبتي بسمه شهرين تقريبا كملنا بيها كول شغلات البيت وقررنا نروح لكربله نتزوج بدون لا حفله ولا شي وفعلا اتفقت وياها وگلت لهلي راح اروح للزياره مدة خمس ايام وبعدين ارجع وما اكدر اخذ نور وياي لان حامل ومتگدر على مشاق الطريق حضرت كول ملابسي وشغلاتي الي احتاجها ومريت على رويحتي واخذتها وسافرنا طبعا الطريق كان طويل والجو حار ورحت بسيارتي وكل شويه التفت عليها وما مصدك نفسي اباع عليها واضحك واغنيلها والله وتحگگ منايا شوفوا حبيبي معايا يهل الحسد والوشايا سعادة الگلب وياها وكل شويه ابوس ايدها واخليها على صدري لحد ما وصلنا للفندق دخلت سبحت ولبست بجامه وبديت اجهز بالعشى وهي فاتت للحمام وطلعت لابسه روب ابيض وخاله مكياج خفيف وهي اصلا ميحتاجلها مكياج بروحها تخبل بس اخذت گلبي وروحي وعقلي معقوله صرتي ألي معقوله اني مو بحلم شگد صغيره هالدنيا خلتني التقي بيج وتصيرين ألي عگب هالسنين بديت ابوسها طعمها غير ياربي شنو عسل والله احلى من العسل عشت وياها احلى خمس ايام بحياتي حسيت اني صدگ عايش حسيت اول مره اتزوج واول مره احب واول مره احضن مره بعد الخمس ايام رجعت لبيتي وديت بسمه لهلها وتلگوني اهلي الحمدلله عالسلامه وزياره مقبوله وخطيه نور متعدله وخاله مكياج ولابسه وتستقبلني بشوگ بس اني وين اصلا شبعان ومالي واهس بيها عگب بسمه حسيت هي مرتي وبس ما كسرت خاطر نور بالعكس حسستها مشتاقلها وميت عليها ومتلهف لشوفتها لاول مره بحياتي اكذب اني احب نور واموت عليها لكن بسمه بالمرتبه الاولى هذه عشگ الصبى والشباب مرت الايام علينا يوميه اخابر بسمه ونلتقي بيتنا بالنهار وبليل انام ابيتي بس صدگ عشت سعاده وين ما اروح مدلل وعشت ملك زماني بدون مشاكل ولا هوسه بالعكس كولش مرتاح لحد ما فد يوم اني گاعد يم بسمه وخابرت عليه أمي واني دافتح الخط گولت لبسمه لحضه هذه امي لا تحجين
امي : انت وين يا يمه
عساف : بالمعرض يا يمه وين ترديني
أمي : الحگ علينا يوم مرتك عدها ولاده
واني ما اعرف شلون غيرت ملابسي ورحت ركض اخذتها للمستشفى خطيه كانت حالتها حيل صعبه وتصارخ وزادة حالتها خطر وتبجي خطيه واني تخبلت عليها ما اتحمل اشوفها تبجي لحد ما جابت بسام حبيبي كان يخبل صار عندي بنات اثنين واولاد اثنين كولش فرحت وسجدت لله شكر وحمدت الله كومهم بالسلامه ورجعنا لبيتنا كولش فرحانين بسام وبنور والتهيت بيهم ووديتها عند اهلها فترة النفاس واني راجع داخذ غراض نور تلگتني امي
أمي : عساف تعال يوم بغرفتي وسد الباب اريدك بحجايه
عساف : شعدها اليوم ام عطوب هههه على گولت مرة ابويه الله يرحمها
أمي : ههههههه دسكت يوم لا تذكرني بذيج الايام تنذكر ما تنعاد ان شاءالله
عساف : خيرج يمه بيج شي
أمي : يمه اني سترك وغطاك وربيتك على الحلال والاخلاق الزينه وعمري ما شفت منك الناقصه والنعم منك ومن تربيتك
عساف : خيرج يمه سامعه شي
أمي : لا يمه حشاك بس ما اريد بنات ابليس يلتفن عليك وينسنك ربك ويجرنك للحرام وليدي
عساف : ليش يمه تحجين هيج كوني صريحه وياي شكو
أمي : يمه اني سمعتك اليوم من خابرتك على نور وتکول للگاعده يمك سكتي لا تسمعج امي
عساف : شوفي يمه اني عمري ما ضميت عليج شي وراح اگولج بالسالفه كولها
وسولفتلها شلون التقيت بسمه وشلون تزوجتها
أمي : يااا عزه بعينك عساف تتزوج على بنت اختي يمه شنو ناقصها گايمه بيك وتحبك وتريد خاطرك متگولي شنو سالفتك
عساف : يمه انتي متحبيني ما ترديلي الخير يمه اني گضيت عمري متعوب من مات ابويه لليوم ميصير ولو لحضه افكر بروحي واسوي شي الي بخاطري طول عمري بس ألكم خلوني مره بحياتي ألي
أمي : اوووف يا يمه حقك وما ألومك بس مرتك شلون يا يمه
عساف : يوم متدري فدوه لعينج خليها بيني وبينج وماطول انتي دريتي اني راح ابقى ابات يم بسمه لحد ما ترجع نور
أمي : براحتك يمه بس الله يستر من الجاي
عساف : خليها على الله ولا تخافين ان شاءالله خير
لحكايتي بقيه
لا احلل ولا اهب لكل شخص يحذف اسمي او اسم القصه ويكون خصيمي يوم القيامه
