بين الماضي والحاضر
همس القوارير
بيج قصص همس القوارير
البارت ١١
وطبعا نفاس نور كان فرصتي حتى ابقى نايم بحضن بسمه والليل كوله سهر ودلع وضحك وحب شگد كانت رومانسيه وطيبه اسرتني بروحها الحلوه وصارت كولشي بحياتي ضليت اروح يم نور بالنهار ابقى يمهم ومرات اتغدى وانطيهم مصرف واشوف طلباتهم واروح بليل يم بسمه لحد ما طلعت نور من الاربعين ورجعت للبيت همين كانت ملتهيه بالصغير خطيه ومتلحگ اني ما اهتم لهالسوالف بلعكس اني اساعدها واوفرلها كولشي وعمري ما قصرت وياها لا بطلباتها ولا بمشاعري وبقت بس امي ومختار يعرفون بالسالفه وفات على زواجنا سنتين تقريبا وما حست بشي نهائيا لحد ما فد يوم طالع من بيت بسمه العصر كنت متغدي يمها واشوفه اخو نور گدام وجهي سلم عليه
اخو نور امجد الغثيث
امجد : هلو عساف شلونك شعندك هنا
عساف : هااا لا ماكو شي بس جيت انصب غرفه بهذا البيت وهسه طالع
امجد : هااا الله يعينك يلا اروح وياك ذبني بطريقك
اخذته وياي واني مرتبك وخايف ليكون عرف بالسالفه ضليت الوم نفسي شطلعتني هسه لو باقي شوي اوووف هسه هاي شلون ورطه ياربي بس لا يروح ويبلغ اخته شنو هالضيم ضليت حسبه تجيبني وحسبه توديني وفكري كوله بهالسالفه ولا ارتاحيت ولا عرفت حتى اشتغل رجعت للبيت تعبان نفسيا وجسديا ولگيت امي بالمطبخ ونور دتنوم بسومي بالغرفه دخلت سلمت على امي
عساف : السلام عليكم
أمي : وعليكم السلام هلا بيك يمه دروح غسل وتعال يمي اصبلك عشى لان نور ملتهيه
عساف : ان شاءالله حبيبه
وفعلا رحت دخلت على نور لگيتها نايمه بصف ابنها غسلت وغيرت ملابسي واجيت يم امي
عساف : يمه شنو الاخبار اليوم محد اجاكم لو راح
أمي : لا يمه ماكو احد بس ليش تسأل
عساف : مو اليوم داطلع من البيت جنت يم بسمه وبطلعتي شفت امجد ابن خالتي وگلت اخاف وصل حجايه او شي
أمي : لا والله يمه ماكو شي لو صاير شي جان گالتلي نور متضم عني شي الامور طبيعيه يوم لا تخاف
عساف : ان شاءالله خير
ورحت نمت ثاني يوم الصبح گعدت نور وسوتلي ريوگ والحمدلله كولشي تمام وودعتهم وطلعت للمحل ومرت الايام عاديه كولشي ماكو واني بين بسمه ونور والحمدلله والشكر لا مشاكل ولا شي لحد الان مره احنا كاعدين اني ونور وگلت خلي اجربها واشوفها شنو تگول كنا دنسولف اني وياها
عساف : اكلج هسه مثلا اكتشفتي اني متزوج عليج شنو تسوين
نور : والله عساف اموت اني ما اتحمل وحده تشاركني بيك
عساف : معوده شنو السالفه اصلا الامور طبيعيه وانتي نفس مكانتج
نور : عساف شبيك بس لا ناوي تتزوج من صودك خوفتني
عساف : لا يمعوده شنو صودك اني وحده وممخلص هنوب اثنين بس حبيت اشاقيج
منين ما التفت اشوفها صعبه اتمنى اصارحها وما اضم عليها بالرغم اني ممسوي شي غلط بس هي خطيه شنو راح يكون موقفها خليها على الله وابقى ساكت احسن ومرت على زواجي ٣ سنوات من بسمه ودائما تگولي اريدك تبات يمي مثل الناس واني اگولها صبري لا تستعجلين يجي هاليوم وبقيت احب بسمه وزادت معزتها عندي قاطات لان كولش صبرت عليه ونور نفس الشي لحد ما فد يوم من الايام دامشي بالطريق وصارلي حادث ونقلوني اثرها بالمستشفى والحمدلله والشكر عدت سلامات مجرد رضوض وكسر برجلي اليمنى واجتي امي ونور للمستشفى عليه ركض وجانو كولش خايفين
امي : عزه بعيني ان شاء الله من وين اجتك هالمصيبه يا يمه
وتبجي خطيه
نور : سلامتك ابو كريم ما تشوف شر الف الحمدلله والشكر هالحال ولا غيره
وبقيت تقريبا بالمستشفى ٣ ايام يسوولي فحوصات وتحاليل ومفراس لراسي اخاف بيه شي فكانت نور يمي وگالت راح اروح وادزلك مختار يبقى يمك اني همين كيفت لان بسمه گلبها مثل النار عليه كل دقيقه تخابر وتريد تشوفني من طلعت نور خابرت على بسمه گولتلها تعالي هسه ماكو احد يمي اجتي بسرعه خطيه
بسمه : الف سلامه عليك ياروح الروح ريت البيك بيه ولا بيك
عساف : اسم الله عليج يا عمري ماكو غير العافيه ان شاءالله
بسمه : والله يا عساف ردت اموت على شوفتك اني ما اتحمل فراگ وانت صارلك ٣ ايام مو يمي متت من غيرك
عساف : شسوي يا حبي غير غصبن عليه هو اني ميت على شوفتج
ولزمت ايدي دتبوسها بدخلت نور طبعا ثلاثتنا ضلينا مصدومين واحد يباوع عالخ واجتي نور كعدت عالكرسي حسيتها انهارت وضلت دموعها تصب وبسمه گامت وگفت على جهه وتباع عليه
