بين الماضي والحاضر
همس القوارير
بيج قصص همس القوارير
البارت الاول
السلام عليكم ورحمة الله وبركاته اني عساف راح ابدي وياكم قصتي من وعيت للدنيا ابويه متزوج اثنين كان عايش ويه زوجته الاولى ولان تعانده واسلوبها مو حلو وياه وتروح زعلانه دائما لهلها قرر يتزوج عليها واتزوج امي الصغيره وهمين حلوه من كنا صغار واحنا نفطمنا على المشاكل يوميه مشكله ويوميه طلابه بين امي ومرة ابويه بحيث ملينا اتذكر واني صغير جنت اروح يم ابويه وكت الغدى كانت مرة ابويه ما تقبل وتطردني من البيت وابويه يكوم يعيط عليها ويخليني كاعد يمه اني جنت شعري اسود مثل الليل وعيوني نرجسي وابيض حيل وشكلي كولش حلو واني صغير وعندي اربع اخوات واربع اخوان من ابوي كولهم اكبر مني وعندي اخوان اثنين وخوات اثنين من امي وأبويه واني كنت كبيرهم يعني عددنا من الصوبين ١٣ واحد ما شاءالله كانت حالتنا الماديه وسط ابويه كان يشتغل نجار يسوي غرف ومعارض وكان شغله كولش حلو اخوي الكبير عدنان اخذ الصنعه منه وصار شغله ارتب واحلى من ابويه لان تعلم عالصنعه وهو صغير وطبعا كولنا ما كملنا دراسه بس اخواني اثنين كملو واحد مهندس وواحد محامي والباقين للمتوسطه ويبطلون والبنات كولهم مبطلات نرجع لسالفتنا كنت اطلع ويه ابويه للبيوت ننصب غرف ومعارض وكانوا ينطوني اكراميه ربع دينار وكنت طاير بيها ارجع فرحان واشتري من الدكان الي يمنا كنا كاعدين بيت بصف بيت بيتنا وبيت ابويه الثاني امي كانت فقيره وماخوذ حقها كنا دائما مضلومين من ورى مرة ابويه لان كانت لسان وما تنگدر وكان ابويه يخضع لرغباتها كفن للمشاكل بالرغم كان حقاني وشنو يشتريلهم يشتريلنا وما يفرقنا عنهم ابد حتى بمشاعره لان كان كولش يحبنا ويدارينا ومره كنا كاعدين وابويه ناسي انو اليوم يومها خطيه اخذته السوالف ونسى ما نحس اله الباب تفلش علينا راحت اختي فتحت الباب وجان تدخل مرة ابويه كان اسمها سعاد وامي اسمها احلام
سعاد مرة ابويه : شنو ولج حليمه ام عطوب ما كفاج من الصبح لحد الان عندج انتي ما تشبعين هسه تگوم وياي نروح لبيتنا لو عاجبتك اليوم متكحله ومتحمره والله اليوم انتفج
وسحبت امي تريد تضربها وابويه يعيط عليها وضربها وگاللها يلا امشي گدامي وامي همين ما سكتت
أمي : لج سعيده اردها الج وين ترحين طيرين خوما تطيرين بس الكرامه لابو عدنان وله كان دفنتج هنا
امي كانت بس حجي نعرفها جبانه وما تسوي شي ههههه وكنا نضحك على سوالفها وتگول يمه مرة ابوكم نسره ما اكدرلها وبقت مشاكلنا يوميه على هالقوانه ومره جنا نتغده وامي ودت غدى بيد اختي لابويه وهو بيته الثاني لان يحب مرگة الباميه اشو اختي اجت تركض وراها مرة ابويه طبت على امي
سعاد : ولج حليمه جوزي من سوالفج شنو احنا محتاجين غداج ام السحوره
وگلبتها للمرگه على راس امي هههههه
امي : يااا ياااا عزه العزاج ان شاءالله يا ضالمه يا متخافين من الله
سعاد : هاج شبعي بيها
وشمرته الماعون على امي وطلعت
هههههه والله جانت سوالفهن مالها حل ولا ياخذن الحجي
وابويه خطيه طايح بيناتهن ومسلوبه راحته عود اخذ مرة ثانيه يرتاح هنوب زادت مشاكله وزاد همه هم
بقت حياتنا صافيه وابويه يصرف عالبيتين وممخلينا بعازه ابد وكولشي مستقر لحد ما صرنا شباب صار تقريبا عمري ١٣ سنه وكنا كاعدين بالحوش مالت بيتنا ونشرب جاي وناكل كعك واجانا اخوي من ابويه يركض الحگووووو ابويه ضربته سياره تعالوا بسرعه ورحنا عليه طايرين لگينا ابويه ماخذه السايق الي ضربه للمستشفى ورحنا وراه وامي خطيه خاله بس عباتها على راسها وبعدين تذكرت هي ملابسه نعال تكرمون واجوي اخواني كلهم واخواتي ومرة ابويه المستشفى نگلبت علينا گال الدكتور وضعه تعبان وادعوله يعدي اليوم على خير امي موتت روحها من البجي واجتي مرة ابويه تحجي عليها
مرة ابويه : كوله من وراج انتي فگر موتيه للرجال الله لا ينطيج
أمي : مو وكتج سعاد الناس منا وانتي بيا حال وتدورين طلايب
سعاد مرة ابويه : هسه اني صرت ادور مشاكل ام عطوب صايرتلي مره وخوش تحجين انه الج بس خلي يطلع ابو عدنان ويصير خير ان شاءالله
وامي بعد سكتت لا عرفت شلون تردها ولا تحجي كانت ملتهيه بمصيبة ابويه وتدعي ربها كون يكوملنا بالسلامه ما فات نص الليل وطلع الدكتور وگال البقيه بحياتكم ابو عدنان انطاكم عمره صار عنده نزيف داخلي لان الضربه جايه براسه وراح لرحمة ربه واحنا گلبناها للمستشفى من العياط والبجي وامي خطيه نهارت وتدگ على وجها و گعت علينا و احتارينا بيها بعدها ودينا امي ومرة ابويه للبيت علمود يستقبلن النسوان وينصبن العزى واحنا رحنا اخذنا ابويه وكملنا مراسيم الدفن من دخلت للبيت من بعد وفاة ابويه حسيته فارغ وبارد وما بيه روح كعدت بزاوية الغرفه وضليت ابجي بحرگه لاول مره هيج ابجي حسيت سندي وعزوتي بهالدنيا راح وبعد مالي احد ما كنت اعرف لهدرجه ابويه عزيز عندي اووووف يا بويه ثاري الأبو يا ناس خيمه اكيد محد يحس بيه غير اليتيم ابويه عافنا كومة لحم بين الذياب ألنا الله مرت ايام الفاتحه متعبه وصعبه واجتي علينا الناس من جميع مكان لان ابويه صاحب واجب ويحب الناس الله يرحمه رابع يوم وفاة ابويه اجانا عدنان اخويه وحجه وياي
لحكايتي بقيه
لا احلل ولا اهب لكل شخص يرفع اسمي او اسم البيج او القصه وهو خصيمي يوم القيامه
