بين الماضي والحاضر
همس القوارير
بيج قصص همس القوارير
البارت السابع
بعد التفكير حجيت ويه عدنان
عساف : السلام عليكم شلونك خويه شلون صحتك
عدنان : هلا بيك خويه نسأل عنك انت شلونك
عساف :خويه صارلك يومين ماكو خير ان شاءالله
عدنان : والله ضهري شويه تعبان وما اجي للمحل
عساف : عندك العافيه خويه بس اجيت اريد احجي وياك بموضوع
عدنان : خير ان شاءالله
عساف : ان شاءالله خير خويه اريد حصتي بالمحلات لان اريد افتحلي مشروع واذا تحب تشاركني ياريت حتى نطور نفسنا ونتنفس شوي
عدنان : شنو شنو وانت منيلك حصه انت عامل عندي المحلات اني كبرتهن واني سويتهن بتعبي ومجهودي انت عود كبرت واجيت عليه لا اساركك ولا تاخذ حصتك افتهمت لو لا
عساف : لا خويه ما اكبر عليك انت اخوي وتاج راسي بس حصتي من الورث اريدها لان اني مسئوليتي كبرت واني اريد استقل بذاتي وصارت عندي عائله واريد ابني مستقبلي
عدنان : انت تحلم المحلات محلاتي واني الي سويتهن اي شي ما الك عندي واعلى ما بخيلك اركبه
عساف : ما يصير خويه هذه مو حاله هذا حلالنا وكل واحد منا اله حصته اني مطالب بس حصتي خلي حصت اخواني عندك حتى لا اضغط عليك وانطيني حصتي بعدين هذا ورثنا من ابويه مو محلاتك من مالك الخاص
عدنان : كتلك مالك عندي شي لا ورث ولا شي وامشي اطلع بره وبعد حتى للمحل لا تجي افتهمت لو لا
عساف
مو من حقك تطردني مثل ما الك ألي اخذ حقوقك كولها وانطيني حقي يا خوي ما اريد اخسرك خلينا احباب
عدنان
لك شو انت تهدد گتلك وراح اگولك للمره الالف اي شي مالك عندي ولا تراويني رگعة وجهك توكل
طبعا تعاركت وياه وطلعت شنو هالضلم اني شطالب غير حقي هسه هو لو گايلي اصبرلي وما عندي هم ميخالف بس مو هيج ينكر حقي وگلت خلي اروح لعمي ابو احمد وادزه عليه بلكت يگدر يحجي وياه هنوب حتى من المحل طردني تالي عمرنا نتعارك على فلوس والله قهر وفعلا رحت لعمي ابو احمد وطلبت منه يحجي ويه عدنان بلكت يقنع وعمي گالي حقك وانت ما طلبت غيره المهم من راح عمي لعدنان وسولف وياه ضليت انتضره تقريبا ساعه ونص وما اجه وامي كلت گلبي مو گتلك لا تحجي ومو گتلك لا تگول واني منتضره على نار ردت اشوف شنو صار وياه ورى ساعتين تقريبا اجه
ابو احمد : السلام عليكم
عساف : وعليكم السلام ها عمي بشر
ابو احمد : انطيني نفس خلي ارتاح جيبلي مي
عساف : هاا عمي
ابو احمد : والله يا عمي ما يقبل هذا موتني من الحجي وما ضلت كلمه ما گلتها عمي انتم اخوان وما يصير تصيرون فرجه للعالم علمود فلوس الدنيا ما تسوه وانطيهم حقهم هذا شرع الله وما طالبين غير حقهم بس يا عمي طبت مرة ابوك لعبت طوبه بحيث ما احترمتني واني گاعد سوتكم حراميه سوتكم ما تخافون الله وانه اگولك هذا عدنان هيج كوله من ورى امه لان هي ما تقبل تنطيكم حقكم وحتى بالمحل بعد ما تريدك تداوم والله حجيت كوله لصالحكم وما يقبلون وانت بعد ما اعرف شلون تتصرف
عساف: والله عمي ما ادري حيرتني ما توقعت يردوكم هسه اني حتى شغل ما عندي وما اعرف شسوي مو حاله يعني اني شطالب هو حقي
ابو احمد : انتم يا عمي انطيتهم مجال هم يردوكم تبقون تحت ايديهم ما يردونكم تطلعون من جواهم يردون يبقون مسيطرين عليكم
عساف : اي صح عمي اني صوجي بس ما ابقى هيج لازم الگي حل راح اودي رجل خالتي وعمي ابو جبار بلكت الله يرضون
ابو احمد : اي احسن يحبون خاطرهم بلكت يقتنعون واني الله وياكم اروح للبيت
عساف : الله وياك عمي مشكور ما قصرت
طبعا ضليت محتار ياربي شسوي شلون وضعيه هاي هنوب اني متعلم ما اعرف اگعد بلا شغل وين اروح ومختار اخوي خطيه گالي لا تحتار مصرفك ومصرف بناتك اني اتكفل بيه لحد ما تلگي حل لمشكلتلك لان انت ياما صرفت علينا وانطيتنا الله يخليك ألنا
وهمين دزيت رجل خالتي ابو نور وعمي ابو جبار وهمين ضلو يحجون وياهم ساعتين رادو يطيحون بحل ماكو ورجعوا كولشي ماكو لان لا عدنان قبل ولا أمه بصراحه فارت اعصابي وصرت نار وتدمرت لا شغل ولا عمل ولا حق ولا باطل قررت ارفع قضيه ويتكفلها مختار وقررت اطالب بحقي وحق اخواني بس المحكمه بالها طويل وجرجره ويوميه محاكم ومرات يحضرون ومرات ما يحضرون دمروا اعصابي واني كاعد وساكت لحد ما حكمت ألنا المحكمه واخذت حقنا منهم والحمدلله والشكر بالرغم ما استلمت حقوقي كولها بس والله ما حبيتها توصل هالمواصيل اول ما استلمت حقي فتحت معرض موبيليات واثاث بفلوسي وفلوس اخواني وانطيت للبنات حقهم كامل وكتبت المعرض بأسمي وكتبت كمبيلات بفلوس اخواني حين الطلب حتى لا اخذ حقهم وشغلت فلوسهم وياي واقسم الرزق بينا وشغلت كرار وياي لان ما فالح بالمدرسه وصار الشغل مناوب اني وياه وصار عدنا خير من الله وشلنا واخذنا بيت طابقين الطابق الفوگ تزوجوا بيه اخواني كل واحد غرفتين وملحقاته والقاط الجوه ألي اني وامي وجهالي لان امي ما تريد تگعد ويه احد تگول نور بنيتي وانت فرحة عمري ما اگدر افارگ الجهال مرات اخواني يجيبون اكلهم وينزلون يتعشون ويانا او يتغدون وكان حالنا كولش مستقر انكطعت عن اخواني من ابويه لان من اخذنا حقنا بعد ما يردونا بس كانت اختي الوسطانيه بين فتره وفتره تمر علينا وتبات يمنا وتحبنا وتگول انتم ما طلبتوا غير حقكم وعدنان غلطان وبقينا على هالحال ما يقارب خمس سنوات وصار عندي ولد وسميته كريم على اسم ابويه الله يرحمه وحالنا الحمدلله والشكر من احسن لأحسن لحد ما فد يوم من الايام الساعه بالوحده بليل خابرتنا اختي من ابوي وهي تبجي وتگول امي ماتت
لحكايتي بقيه
لا احلل ولا اهب لاي شخص يرفع اسمي او اسم القصه ويكون خصيمي يوم القيامه
