صرخــة عــار
الحلقة 1
حابه نحكيلكم على قصتي ،،،
بس قبل كل شئ لو أنتت أو أنتي انسان حساس أو عاطفي ما تقراها ولا ادير وجهك ليها.....
اسمي حواء عائلتي تتكون من
باتي مصباح.
وأمي فتحية.
أنا عمري 30 لا عندي عيال ولا متزوجه ولا متخرجه ،،،،وتوا قدام نحكيلكم الأسباب...
بعدها خوي الصابر عمره 28 متخرج من كليه القانون متزوج وعنده عيلين توأم...
بعدها خوي شعيب عمره 25 متخرج من كلية الصيدلة متزوج جديد وزوجته حامل...
بعدها أختي صالحه عمرها 23 متزوجه وعندها بنت ،،،،،زوجها ولد عمي......
وحماتها بنت عمي هي زوجة خوي الصابر.
تبادل في العائلة يعني..
اختي صالحة تخرجت عند راجلها يعني اجوزت وهي تقرأ...
بعدها اختي لمياء عمرها 19 تقرأ جامعة سنة اولى هندسة....
وخطبها أخ صاحب خوي محمد خطيبها اسمه هشام يقرأ في اخر سنة طب بشري....
المهم أمي كبيرة شوي في العمر مريضة وكل يوم متوقعتها تموت....
الكلام هذا ثلاث ارباع الناس يلي تزور فينا تقول فيه....
اصبري يا حواء والله أمك شكلها خلاص نلتي السترة نلتي السترة...
هذي امي نعطيها صحتي وعمري بس أنا انظلمت واجد بسبب مرضها...
سيبت دراستي مع أني خذيت الثانوية ممتاز بنسبة99%
وخاطري نكمل طب...
بس تحطمن احلامي باتي حرمني من القرايا وقعدت في الحوش مش بس نخدم في أمي ونخدم في الحوش وفي باتي وخوتي وخواتي وزاد الأمر عن حده
قعدت نعاني في صبايا خوتي واحفادنا......
نحنا حوشنا كان صغير بس لما جارنا يلي كان جنبنا باع حيشانه الاثنين شريناهن ووسعنا حوشنا قعد كبير......
لذا الصابر وشعيب عايشين معانا في الحوش كل واحد عنده جناح دار وحمام....
ونأكلوا مع بعضنا ،،،وضيوفنا مع بعضنا ،،،،وكان وحده جابت هذا حوشها ولا عندها حاجه ولا هلها بيجو.....
مع المعاناة نسيت روحي نسيت أني بنت ما نفضش اصلا نمشط شعري لين نفضى انمكيج....
نسيت صحباتي ونسيت العالم الخارجي بكككككككل لا افراح لا مناسبات ما نطلع من الحوش نهائي.....
من وعيتي يا أما نعاني في أمي .
طبعاً نسيت ما قلتلكم شنو عندها عندها جلطة بس ما اثرت فيها اكثر شئ هلكها وهلك عمري وسنيني الشلل معش تقدر توقف.....
وعندها مشاكل في الجهاز الصدري والتنفسي،،،،،
إلى جانب هكي ،،صرع،،
يعني يا أمي يا مطبخ يا الحوش يا معاناة عيال خوتي هذي راقده وامطلعتهم هذي ماشيه السوق هذي عياده...
اصلا حواء ناقصها،،،،بدل ما يشيلن الحمل معاي ايزيدن في...
والحقيقة حتى خواتي شر من صبايا خوتي اكل ومرعى وقلة صنعه يلقن شئ مش مضموم ما يضمنه يسمعن أمي تنادي ايجن يقولنها لي على اساس امي بروحي...
فوق هكي حتى دبشهن انا نغسل فيه ونحدد فيه لهن ونديرلهن في الواجبات كلهن ونضم في دارهن......
صبايا خوتي يتحودن على مسؤليات الحوش لذلك كلهن في النهار عندهن شغل وفي العشيه يرقدن وفي الليل يتكرسن.....
والله مشتهيه نشم نسيم البحر مشتهيه نشم رائحة حاجه من الطبيعه مش حاجه طبخ ولا منظفات.....
ملييييييييييبييييييييييييييييت خدامه....
يلي خذن معاي الثانوي توا كلهن تخرجن حتى يلي قرأت طب تخرجت واجوزن وعندهن عيلين وثلاث....
وأنا قاعدة مذلوله يلي يخش يمسح كبده في ويلي يطلع يمسح كبده في....
حتى أني نبي نبكي نفضي على خاطري ما نلقش في وقت.......
حواء الفطور واتي نبي نطلع؟؟؟؟؟؟؟؟
حواء امي تبيك؟؟؟؟؟؟
حواء نبي نزور ماما معلش بنسيب العيال معاك؟؟؟؟؟
حواء وين الغداء قطعنا الشر؟؟؟؟؟
حواء غسلتي دبش اليوم؟؟؟؟؟؟
حواء ما شفتيش شخشيري؟؟؟؟؟
حواء مشطي وين؟؟؟؟؟
حواء شن العشاء؟؟؟؟؟؟؟؟
حواء باتي وين؟؟؟؟؟؟
انا حواء العبده فقط،،،،،لا احترام لا تقدير لا حد يسأل على صحتي أو نفسيتي ولا يا حواء شن تبي.....
اقسم بالله لي اكثر من 4سنوات ما طلعت السوق اختي صالحه اي حاجه معش تبيها خلاص بادت تعطيها لي.....
اي حاجه لصبايا خوتي ما يبنها يعطنها
لي..
والنبي مش حاجه تقهر؟؟؟؟؟
مش حاجه اتحز في النفس؟؟؟؟؟
مش حاجه تجرح الكرامه والمشاعر؟؟؟؟؟؟
مش حاجه تبغدد أني ننذل وتنجرح كرامتي في حوش بوي وأمي وهم حيين........
أنا مش اول ولا ثاني وحده تسيب قرايتها ...
انا مش اول ولا ثاني وحده ما تتزوج....
انا مش اول ولا اخر وحده تعاني في امها ومتحمله مسؤليه حوش وواشون وعيله كبيره....
بس أنا فاقده المحنه فاقده نلاقي حد ايحس بي يقولي خشي ارقدي ساعتين توا نهتم انا بأمي والحوش حطي رأسك..
نغفي نص ساعة نلقى الحوش منقلب على بعضه تقول جايته مداهمه......
نومي في الليل نرقد اخر وحده في الحوش بعد نطمن على كل حاجه وبعد نطمن امي ان الجميع في الحوش وكل شوي نوض من كحه امي ومره دواء ومره حمام ومرات نوض ونصبي معش يروح النوم......
ربي يتلطف بي وخلاص.......
ارهاق وتعب.......
قهر وذل......
نشوف في صبايا خوتي وصالحه يلي اصغر مني بعيالهن وبرجالتهن متريحات.
وأنا اعطب حال......
نشوف حتى في لمياء أختي الصغيرة عايشه حياتها مكياج ولبس وصحبات وقرايا وجو.....
اسمي حية،،انا ميته من غير عزاء خلاص منتهيه وجودي منعدم بكككككككل...........
يتبع .........
فوووت 🌟
تعلييييق 💭
أنت تقرأ
صرخة عار(مكتملة)
Детектив / Триллерرواية باللهجة الليبية تـحكـي عـن بنـت في الثلاثينات عـاشـت حياتـهـا ظلـم وقهـر من خوتهـا ونساوينهم ويـجي يوم وتحـب شخص وتنقلب حيـاتها...هـل حـ تتحسن حياتها وتتزوج ولا اللي حبـاته كان يبي منهـا غرض معين ويرميها؟؟....كل شئ حـ تعرفوه بالحلقات...للكاتبة...
