صرخة عار(مكتملة)

الحلقة 11

صـــــرخة عـــار
الحلقة 11

كملت باقي اليوم وأنا من شدة الخوف حاسه أن هلي عارفين كل شئ...

ما قعدت معاهم ولا كليت معاهم نبرم من مكان المكان...

حتى أمي نخش نوكلها أو نعطيها دواها ولا ندوشها غير هكي في المطبخ..

طبعاً قعدت على جناح البرنسيسه دلال نظفتها لها الباين أن لها اكثر من سنه ما تنظفت فضايح طلعت منها..

وفي الليل جاء الأمير شعيب ومعاه البرنسيسه..
ومن ثاني يوم بدو الوفود يتوافدو على حوشنا..

و أم البرنسيسه دلال قاعده مع بنتها..

وجت صالحه طبعاً دلال مرات خوها وحماتها في نفس الوقت.

وحواء كرعيها ورموا من الوقفه والتعب وعيونها ورموا من الدموع وقل النوم..

حااااااسه بالذنب ،،
ياريتني قعدت طول عمري خدامه لهلي ولا عرفت نزار ولا طلعت معاه.

بس الندم ما يفيد.
مااااااااا يفيد.
حاسه أني نبي ننفجر لازم نحكي لحد..

كنت في المطبخ طبعاً كالعاده شوي خشت صالحه.

صالحه:-ايش الأخبار؟؟؟؟
أنا:-الحمد لله.

صالحه:-بسم الله الرحمن الرحيم.
كنك يا حواء؟؟؟؟؟؟
كنهن عيونك؟؟؟؟

أنا:-من قل النوم اطمني..

ووجيت بنطلع،،،بس صالحه مسكت يدي.

صالحه:-لالا هذين مش علامات قل نوم.
هذين علامات دموع.

أنا:-باه علامات دموع.
يعني في نظرك ما ليش الحق نبكي.
صالحه:- حد في الدنيا له الحق يبكي قدك يا حواء.
والله ما تأخذي على أني متزوجة وملتهيه معناها مش حاسه بيك.

حاسه بيك وحاسه بمعاناتك.
وعارفه أنك نحرمتي من تحقيق أحلامك.

أنا خنقتني عبرتي وبديت نحكي من بين دموعي:-شن خطره توا الكلام هذا؟؟؟؟؟
شنو خطره؟؟؟؟

وطلعت نجررررري للحمام..

شن خطر يحسوا توا.
بعد قريب 10 سنوات ما خطر أنهم يحسوا بي ألا توا.
ولا عشان يعذبولي ضميري ونقول أن يلي درته غلط.

قعدت نبكي ونبكي معش مسكت روحي...

في الليل كل الناس رقدت ألا حواء .

كنت دايره روحي نتفرج على التلفزيون وأنا نبكي...
مخنوووووووووووووووقه.
مخنوقه.
مش مصدقه مانيش قادرة نستوعب أني أنا درت العار.
معش نقدر نتحمل.
في حاجة جواي تبي تنفجر...

مشيت قلت ندوش بعد هالتعب ممكن ربي يتوب على ونغفي لحظه....

خشيت الدار وأنا نأخذ في منشف طاح موبايلي رفعته..