سليم ..عمل مشترك ..الكاتب ..عمرو العربى..الكاتبة.. قسمة الشبينى

5

الخامس

ماهر: اه يا رامى .....بس لما اشوف وشك
سليم: انا لولا خايف عليها ماكنتش سبته غير جثة ال......ده
وصل ماهر للمركز الطبى فأسرع سليم يحمل شروق للداخل لتتلاقاها منه الممرضات ويتوجهن بها فورا للطوارئ

وصل والدها مندفعا بينما كان سليم وماهر يقفان امام الغرفة ينتظران خروج الطبيب
المعلم: بنتى .... شروق فين يا سليم حصل ايه؟؟
سليم بخجل : الحمد لله جت سليمة هى جوة مع الدكتور
اندفع المعلم ليقتحم الغرفة بفزع فيجد شروق تتمدد فوق الفراش ودموعها لازالت تتدفق والطبيب يحقنها بمصل ما نظر لابنته ففزع من هيئتها

شعر مشعث وشفتين منتفختين بالاضافه لبعض الكدمات الواضحة برقبتها
والطبيب: ايه ده ازاى حضرتك تدخل كدة؟؟
المعلم :بنتى ....مين عمل فيها كدة؟؟
الطبيب: من فضلك استنى برة
خرج المعلم فورا ليمسك بسليم من ملابسه ويدفعه للخلف بقوة اجفل لها سليم ولم يتوقعها
المعلم: مين عمل فيها كدة !!انت يا واطي؟؟
سليم: انا يا معلم انت بتقول ايه؟؟ لو انا هتصل بيك اقولك إلحقنى ؟؟
ماهر وهو يحاول ابعاد سليم من امامه: اهدى بس حضرتك سليم الى أنقذها
نظر له المعلم فقال ماهر: انا ممكن احكى لحضرتك كل حاجه..بس يفضل تسمع من شروق لان فى تفاصيل هى بس تعرفها
هنا خرج الطبيب من الغرفة فهرول إليه الجميع
الطبيب: دى محاولة اغتصاب تحت تأثير عقار معروف
المعلم: يعنى ايه يا دكتور ؟!
الطبيب: يعنى الآنسة حد اداها جرعة من دوا .... الدوا ده بيستخدم بس فى حالة خوف البنت من العلاقة لكن للاسف شباب كتير بيستخدموه فى الاعتداء على البنات لانه بيفقد القدرة على المقاومة مع شعورها بكل اللى بيحصل
سليم: يعنى ايه؟؟ هى هتبقى كويسة؟!
الطبيب: نص ساعه بالظبط وتكون فاقت تماما انا حقنتها بالمصل المضاد
المعلم بخوف: وبنتى يا دكتور...بنتى بخير
الطبيب: بخير ماتقلقش ..لحقتوها فى الوقت المناسب...عن اذنكم
زفر المعلم بإرتياح فهيئة ابنته لم تبشره بخير ابدا
بعد نصف ساعة خرجت الممرضة وسمحت لهم برؤية شروق فقال ماهر: اتفضل حضرتك ادخل الاول اطمن عليها وانا وسليم هنستنى هنا
بالفعل دخل المعلم ليجد شروق تبكى وهى تجلس تضم ساقيها اقترب ليجلس بجوارها ويضع يده على رأسها بحنان رفعت راسها واسرعت لأبيها ليضمها بحنان وهو يهمس: هششش بس يا قلب ابوكى قولى لى مين عمل فيكى كدة يا بنتى
قصت شروق على والدها ما حدث وانقاذ سليم لها قبل أن يتمكن رامى من اغتصابها
شعر المعلم بالندم لتسرعه بإتهام سليم فتوجه للباب وطلب منه الدخول هو وماهر
**********
فى الصباح التالى يجلس سليم امام باب غرفة شروق وقد غلبه النوم ليستيقظ على اصوات الاقدام الغليظة التى تتجه نحو الغرفة فيهب فزعا ليجد امامه مجموعة من الرجال الأشداء يحيطون ب مرزوق الدمنهورى وهو يتجه نحوه ووجهه لا يبشر بالخير
انقض الرجال على سليم وقيدوه ليقترب مرزوق منه ويقول: عملت ايه في اختى ؟؟
سليم: وانا هعمل ايه في شروق يا مرزوق باشا انا ولا اقدر مش خوف منك لا خوف عليها انا بخاف عليها من نفسى قبل اى حد
مرزوق: ابويا قال انك كنت معاها يبقى مين غيرك؟؟
اتاه صوت والده المعلم سعيد : ولو ماكنش معاها كانت ضاعت يا مرزوق هو نجدها ما اذهاش
ضيق مرزوق عينيه بحقد لقد فقد فرصته فى التخلص من سليم فأشاح بوجهه عنه وتوجه لغرفة شروق
نظر سليم فى اثره بعد أن تركه رجاله وجلس يتذكر من هو مرزوق الدمنهورى
عودة للوراء
حين تقدم سليم وشقيقه الاصغر للعمل لدى المعلم سعيد كانت امورهما جيدة ولم يتعرض لهما مرزوق الدمنهورى وهو ابن المعلم سعيد من زوجته الاولى اما شروق فهى ابنه وحيدة من زوجته الحالية ومرزوق يمتلك مصنعا لانتاج اللحوم لذا فهو يستفيد من عمل والده بأعمال الجزارة بشكل هائل
وحين قرر المعلم سعيد أن يعمل سليم بالحسابات وشقيقه بالمبيعات كانت المرة الاولى التى يرى فيها سليم مرزوق
دخل مرزوق وسط رجاله ليتقدم من والده بغضب
مرزوق: ايه اللى عملته ده يا حاج ؟؟ ازاى تمسك الحسابات لناس غريبة؟؟
سعيد: ياه انت لسه فاكر يا مرزوق!! بعدين سليم مش غريب ده شغال معايا من فترة لو بتيجى كنت عرفت
مرزوق: يعنى اعمل ايه مشغول شغل المصنع واخد كل وقتى
سعيد: الله يعينك يا بنى بس تخليك فى شغلك وماتدخلش فى شغلى
مرزوق: ياحاج انا خايف عليك الحسابات مش حاجة تتسلم لأى حد واحنا شغلنا صعب
سعيد: ماتخافش سليم واخوه انا ضامنهم
قبل مرزوق ب سليم على مضض ولم يفهم سليم او سعيد سبب رفض مرزوق لعمل سليم وشقيقه
عودة للوقت الحالى
دخل مرزوق الى غرفة شروق بغضب وهو يصيح: مين اللى عمل فيكى كدة انطقى
شعرت شروق بالخوف فهى طالما خافت من مرزوق فإقترب والدها يحيطها بحنان وهو يهمس: ماتخافيش يا حبيبتي قولى لاخوكى هو اللى هيعرف يجيب حقك
نظرت شروق لأبيها ثم ل مرزوق وبدأت تقص عليه ما حدث بخوف وهو يستمع لها حتى انتهت فنظر الى رجاله وقال بغضب : الليلة يبات اللى اسمه رامى فى المخزن علشان انا هخليه عبره الى يفكر يقرب من اى حد يخص مرزوق الدمنهورى
احد الرجال: امرك يا باشا
ونهض مرزوق لينصرف دون أن يواسى شروق ولو بكلمة واحدة