سليم ..عمل مشترك ..الكاتب ..عمرو العربى..الكاتبة.. قسمة الشبينى

8

الثامن

فى لمح البصر وصل الضابط الى الحجز ليهرع الى سليم ثم يتنهد براحة بعد فحصه ويقول: اطلب الاسعاف بسرعة لسه فيه نفس
يسرع امين الشرطه بطلب الاسعاف التى اقلت سليم للمشفى تحت الحراسة
خرج الطبيب من غرفة العناية الفائقة ليقابله الضابط
الضابط: خير يا دكتور لحقتوه
الدكتور: الحمد لله بس هيبات فى العناية المركزة حالته متأخرة
الضابط: من فضلك التقرير علشان النيابة
الدكتور: بكرة يكون التقرير فى النيابة إن شاء الله المهم اننا نعرف اخد ايه بالظبط والا هيفضل ايام فى الحالة دى
الضابط: هو حضرتك مش عارف
الدكتور: تحليل الدم هيبين علشان ندى له المضاد لازم ياخد مضاد المادة اللى اخدها
الضابط: حاول ينتحر يعنى!!
الدكتور: ما اظنش دى محاولة قتل وحد عارف ادى له ايه بالظبط.عن اذنك
وترك الضابط في حيرة ليغادر بعد قليل تاركا حراسة على الغرفة
وبعد ساعة تقريبا تدخل احدى الممرضات لتخرج حقنه من جيبها وتضيفها للمحلول المتصل بذراع سليم
وتبقى فى الغرفة لعشر دقائق ثم تنصرف
******
فى الصباح التالى
ظهرت نتيجة تحاليل الدم الخاصة بسليم فيسرع الطبيب بارسال تقريره للنيابة
فى النيابة يطلع وكيل النيابة على التقرير ويصمت محدثا نفسه: الظاهر الواد ده مظلوم زى ما قال وماقتلش اخوه... محاولة قتل بواسطة عقار سام ...مايعملش كدة غير العصابات الكبيرة .. الحمدلله انهم لحقوه كان حصل اخوه والقضية اتقفلت..انا لازم احقق معاه تانى

فى المستشفى
نزل العسكرى للاستقبال لتغيير النبطشية وترك غرفة الرعاية التى يستلقى بها سليم ظنا منه انه لازال فاقدا للوعى كما أن الطبيب لم يتفقده منذ الامس فى انتظار معرفة العقار الذى تناوله من خلال تحليل الدم
هبط العسكرى ليقابل زميله الذى سيستلم منه وهنا حدثت مشاجرة كبيرة
& انت بتقولى انا الكلام ده والله لاسيح دمك
دم مين انت فاكر نفسك تقدر عليا دا انا اشرحك هنا
ونشبت معركة بالايدى
الضابط: ايه اللى بيحصل انت وهو؟! وسع يا جدع انت
$شاهد يا بيه بيقولى هيسيح دمى أنا فى حما الحكومة
ده عيل قليل الرباية عليه فلوس ولازم اخد حقى
الضابط: انت يا عسكرى انت وهو افصلوا الناس دى عن بعض واقفين تتفرجوا لحد ما واحد يموت التانى
تدخل العساكر لفض المشاجرة واستغرق الامر ما يقارب الربع ساعة ليفصلوا بين الطرفين واتت سيارة النجدة لصحبة المتشاجرين الى القسم وهنا يصل الطبيب وهو يصيح: يا حضرة الظابط المريض مش فى العناية
الضابط بصدمة: ايه مش فى العناية ازاى هو مش فى غيبوبة؟؟؟
الدكتور: ايوة انا لسه كنت هدى له المضاد دلوقتي أنا مش فاهم اكيد اختطاف
شعر الضابط بصدمة كبيرة وهرول لمعاينة الغرفة
********
حين هبط العسكرى ليقابل زميله اسرعت الممرضة الى غرفة الرعاية
الممرضة: قوم يلا بسرعة قدامك عشر دقايق تبقى برة المستشفى
واخرج من الباب الجانبي
سليم وهو يعتدل جالسا: وانتى حد هيأذيكى
الممرضة: ماتخافش انا اصلا مابشتغلش هنا يلا اتحرك
يسرع سليم الخطا لكن بحذر حتى يغادر المستشفى دون أن ينتبه له احد ثم تخلع الفتاة البالطو الخاص بتمريض المشفى وتضعه بكيس بلاستيكي محكم وتغادر هى الاخرى ليصل الضابط فلا يجد اثرا ل سليم ولا دليل على كونه حيا او ميتا
خرج سليم من المشفى لا يدرى اين يذهب!! فظل يجوب الطرقات لفترة واثناء سيره تذكر ما دار بينه وبين سيد اثناء زيارة الاخير له
فلاش باك
سيد: المعللم بعتتنى وبيقوولك انه عا عارف انك م مظلووم وهيسساعدك تهررب
سليم: اهرب ازاى من القسم انتو عايزين البوليس يخلص عليا بطلقة
سيد: يا ععم افهم الاكلل اللى اح.احنا بناكلله ده فيه دا. دوا على بالليل هت هتقطع النفس وينقللوك ع على المستشفى
سليم: يا وقعتكم سودة افرضوا روحت فيها يضيع حقى وحق اخويا
سيد: شك شكلك اغبى منى يا سلييم!!يا ع عم ما انا باااكل م معاك اهو مات ماتخافش دكتور كبيير معر معرفة المعلم مظ مظبط الجرعة
سليم: ماشى واما اتنقل المستشفى هيحصل ايه؟؟
سيد:هه هنبعت لك حد بالمضاااد تا تاخده وهم فا فاكرينك لسسه فى غي غيبوبة واول ما العسسكرى ينزل يغ يغير ت تهرب ك كدة البولييس هيف هيفكر أن اللى حاااول يقتلك خط خطفك ومحددش هيد هيدور علليك هيد هيدوروا على اللى خط خطفك
سليم: ماشى ربنا يستر
سيد: ف فهمت اللى قلت قلتهولك مشش هه هعرف اقووله تانى
ضربه سليم على رأسه وقال: المعلم ما لقاش اغبى منك يبعته
سيد:مقب مقبوولة من منك يا سلييم
عودة للوقت الحالى
اخذ سليم يفكر بعد ذلك ترى لما يساعده المعلم سليم وهل سيلقى نفس نهاية شقيقة