احببت_صديق_الطفولة(باللهجة الجزائرية)

Part*04*

__________________________________

  المهم جاز شهر و انا كل ما نروح نقرى نلقاه،نجي نلقاه قدام هذيك الفيلا .. خفت يفيقوا بيا و بيه قلت للبنات خلاص خسرت ،أمبعد نشريلكم كاسكروطات كي ندبر دراهم...

و هوما ضحكوا حتى شبعوا عليا و نساو الحالة و اتلهاو بالتحدي تاع منال ماعلابالهمش بلي نجحت بجدارة هههه.... 

أما انا بقيت نخمم كيفاه ندير لوكان يكون فاقلي ....علاش راه يشوف غير في دارنا ؟ فالاول كانوا عينيه يدورو partout ..

 و ضرك راه يعس فيا غير أنا !! شحال و أنا نطلع و نهبط منبعد قررت نبعث له الرسالة الثالثة و الاخيرة ، كتبت له جملة واحدة برك و بعثتهاله ..امبعد نقولكم واش قلتله فيها . 

بعد سمانة ملي بعثتها ، كنت واقفة غير أنا و سعاد عند التاقة كانت تحكيلي على المقلب تاع منال بسكو كنت مكونسونطرية غير مع السي موح تاعي وماكنتش لاتية بيهم ماعلاباليش واش دارت فيها ، كان محمد في دارهم و خرج عيط لسعاد قالها ارواحي نحتاجك بلخف و ولي ، قالتلي استنايني ما كملتلكش هي راحت ليه اعطاها برية مغلوقة قالها نمدلك برية تعطيها لأمال صحبتك ؟ قاتله واش فيها ، قال لها واش دخل ربك واش فيها ؟ قلتلك مديهالها و ارواحي ، قاتله هممال ما نديش و جات و خلاته ..

 قلتلها واش يحوس علاه كان يزقي معاك ؟ قاتلي يحوسني نمدلك برية ، انا اتخلعت قلتلها برية لياااا !!!! قاتلي وقيلة كاش ماكان بيناتكم و ما قلتيليش يا ستوتة !! قلتلها خسارة عليك انا تاع هذو الشوفات ؟ كاموفليت الحالة غير تم و منبعد خليتها و دخلت لشمبرتي ، بقيت وحدي قاعدة على نااار ، محمد حب يبعث لي برية !!!زعمة واش فيها ؟زعمة عرفني !! 

العشية مع المغرب كنت واقفة عند الباب نشوف في خويا يلعب و متخبية باه مكاش اللي يشوفني ، حتى نلقى نذير خو سعاد الصغير واقف قدام الباب -نذير عنده 6 سنين – و موالف يجي لعندنا يلعب مع خويا يوسف، قالي أمال خويا موح قالك هاكي و اعطالي برية شديتها نجري خبيتها في صدري و قلبي يخبط فالمية .. 

مزية مكاش اللي شافني ..خزرت من السور تاع دارنا للفيلا لقيته قاعد تماك و يشوف من جهتنا دار لخوه جاست بيده باه يروح للدار . انا دخلت نجري غلقت على روحي و فتحتها لقيت ورقة فيها جملة واحدة برك ، الجواب تاع سؤالي ليه انا كتبتله سؤال "أتراك عرفتني من اكون !" 

رد لي "أجل يا فاتنة العيون " يا ديني انا فاتنة العيون !!! صافي عرفني جد باباه ! هههههه ، يااا يمة على التبهديلة اللي درتها لعمري !!! ضرك ما نقدرش حتى نجوز من قدامه منا وهاك .

 ولينا بعد هذيك البرية كل ما يجوز علي عينيه يحبوا ياكلوني ، نحس عنده كلام بزاف بصح مكاش كيفاش نحكوه مع بعضانا فالحومة و انا ما بينتلوش لا بلي نحبه و نموت عليه ، لا بلي حابة نحكي معاه عرفني نحشم بزاف ..و علاهذيك بقى يتبع فيا بعينيه قريب عام .