احببت_صديق_الطفولة(باللهجة الجزائرية)

Part*08*

______________________________

  ..رحت لدارنا نبكي و خليتها 

وحد الشوية رجعوا موح و يماه ..بصح علابالي ما حكاتش معاه ..بويسك ما حوسش عليا ولا عيطلي .

فات هذاك الفاكونس تاع الصيف كحل جوزتو غير هم في هم، لا تحواس ، لا خرجة لا دخلة و زاد ما حكاش معايا قريب شهر ملي بعثلي هذاك الميساج حتى قريب هبلت ..كنت نشوفو يجي عند الفيلا يقعد بورتون رحلوا ...يبقى يشوف من جيهتنا و يتكيف .. دار اللحية و تبدل كامل ، ولى مشيان بزااف و باين عليه راه يتعذب كيما انا ولا اكثر ..يا ربي توحشتو بزااف و ما قدرتش نبعد عليه كتر من هكا !! الألم تاع الفراق صعيب ما حملتوش .. بصح ما نقدر ندير والو ، اللي عليا درتو و كرامتي ما تسمحليش نزيد نطيح بروحي اكثر من هكا .

كانت قريب الدخلة تاع القراية ..جات عندنا سعاد جابت بنتها "رفيدة" بيبي تاع عام و نص قالت "ليما جيت نزور أمال" ..قاتلها يما" "راهي في بيتها رواحي نديك عندها ،هذيك الطفلة مهيش مليحة خلاص راهي حابة تقتل روحها لا ماكلة لا شراب راهي قريب تخلاص"، خلات بنتها مع خياتي يلعبوا معاها و دخلتها يما عندي على غفلة خلعتني واش جابها هادي دروك !!!
سلمت عليا واش راكي لاباس حكيت معاها بطريقة جافة تاع الوحدة اللي قلبها مات من جيهتها ...بسكو على قد ما كانت حبيبتي و كنت نعزها ، طاحت من عيني كي دارتلي هذا الجاست و فرقتنا انا و خوها .

قاتلي علابالي راكي كارهتني ..و سور راكي مستغربة واش جيت ندير اليوم ...بقيت ساكتة و حاطة راسي على المخدة ما اديتهاش فيها وهي تحكي وحدها
" بقيت نخمم مع روحي بزاف ، و حسيت بالغلطة اللي درتها كي حكيت لموح على اللعبة ، و انا علابالي بلي تحبيه و يحبك صح ،و ماتقدروش تبعدو على بعضاكم، ماعلاباليش واش صرالي ؟ بالاك غرت منك ، ديتي كلشي: الحب و القراية و الزين ، كنتي ديما نتي المخيرة فينا "انا خلعتني ما درتش في بالي بلي صحبتي الأنتيم ممكن تحسدني على حاجة! قتلها"غرتي مني؟؟؟ علابيها حبيتي تبعديني عليه ؟ عندي شهر و انا نموت و نحيي ، باه تجي تقوليلي بالاك غرتي مني !! علاه واش عندي زيادة عليك ؟ تزوجتي و راكي ببنتك ..و انا راني مرمية في فراشي نبكي على زهري ..شكون راه خير من الآخر انا ولا نتي !! ...و اذا ما غضتكش انا شوفي خوك واش راه صاري فيه ، راه عاجبك حاله هكا !! ما قدرتش نشد  روحي غاضتني عمري و بقيت غير نبكي . 

  سكتت و هبطت راسها كلي حشمت على روحها ، امبعد قاتلي "أمال ، موح مهوش مليح خلاص و يما راهي خايفة عليه بزااف راه قريب يقتل روحو لا ماكلة لا رقاد و الدخان قتلو صدرو و لوكان يزيد يكمل هكا يهبل ولا كاش ما يصرى فيه ..قاتلي شحال من خطرة شافتو يبكي !! و زيد قالها ما نكملش فالجامعة كرهت ".. .

قلتلها "واش حبيتي نقولك ؟هذا واش كنتي تحوسي ياك ؟ أيا بصحتك راكي دمرتي خوك بكلمة واحدة ". قاتلي اتعيشي ما تزيديش عليا ، وين علابالي رايحة توصل معاه هكا !!" قلتلها "امالا واش عمباتلك ؟ موح جاب الباك علاجالي و قرى فالجامعة غير باش بابا يقبل يزوجه بيا..دروك واش يدير بيها ؟ خليه يعاود يولي يخدم خيرلو ."
سكتت و كانت عارفة روحها بلي خربتها 100 فالساعة ، امبعد قاتلي " أمال ، تشفاي على هذاك الجون "مول الغاز " ؟" ..انا ستغربت واش داها تجبدلي هذاك دروك ؟ قاتلي "لوكان نقولك حاجة توعديني تكون سر يبقى بيناتنا ؟ قتلها "بلا ما نوعدك ، انا منيش كيما نتي ..ما نحكيش سرار الناس."
قاتلي "هذاك الجون حبيته من قلبي بصح ما قدرت نقول لحتى وحدة، ما قدرتش نسقسيك عليه و شفتك ما زدتيش جبدتيلي عليه من هذاك اليوم اللي رمالي الورقة الأولى ، قطعت لياس و مات حبي الأول قبل ما يزيد ..تزوجت صح عندك الحق بصح منيش حاسة بالبنة تاع الزواج ، هذيك العاطفة و اللهفة و الحنانة ، مكان والو ..ماكلة و رقاد و فراش و خلاص . هذا واش يربطنا ، ما يحبني ما نحبو مادار حتى مجهود باه يقربني ليه و يخليني نتعلق بيه...عرفتي علاه كل ما نشوف محمد كيفاه يدير عليك نزيد نغير منك أكثر ؟" انا بقيت مدهوشة في هدرتها ، حسيت بلي نعرفها لأول مرة مهيش صحبتي اللي عشت معاها حياتي! قتلها "مادام كنتي تحبيه و علاه ما حكيتيش ؟ الحب مهوش عيب !" قاتلي "كنت صغيرة
و خفت يسمعوا لبنات و تبقاو تتمسخرو بي ".
" فكرت نحكي معاك قبل ما نتخطب بصح خفت تقولي لموح ، و كنت حاسبة روحي نسيتو..حتى حكيتي عليه هذاك النهار ، كي قلتي بلي كان يرمي كل يوم ورقة ..عرفت بلي هو تاني تعلق بيا عاودت تفكرت كلشي و حسيت تقول صراتلي غير البارح ، ما قدرتش ننسى الخزرة ، و التبسيمة تاعه"
هي تحكي و جايتها الدمعة .
قتلها "واش بيك سعاد هبلتي !! نسيتي بلي راكي متزوجة حراام عليك!!" قاتلي "و الله ماعلابالي واش بيا ؟ عمري ما ظنيت بلي يجي نهار و نحكي لكاش واحد على هذي الحكاية .."
قتلها "حاولي تنسايو خير لك ..قاتلي "صحة نطلب منك طلب برك و نوعدك بلي ندير المستحيل باش ننساه و ما نزيدش نخمم فيه ...اعطيني البريات اللي قلتيلي عليهم و انا غير نروح للدار نحكي مع موح و نقولو الصح، بسك علابالي بلي كامل واش كتبتيلو كان من قلبك صح ."
قتلها "صافي علاجال باش نرجع انا و محمد كيما كنا حبيتيني نعاونك باه تخوني راجلك ؟ من جهة تقولي نحاول ننساه ..و من جهة خرى مديلي البريات اللي بعثهم ؟ أوااااه و الله ما راكي معولة تنسايه !"
قاتلي و الله ما تخافي، مديهملي نحرقهم باش ما يبقى حتى بروف عليه .و الله غير ننساه ."
طلعت فوق خزانتي جبدتلها ساشي فيه وراق قتلها "بالاكي غير يطل فيهم راجلك! ."
دات بنتها و بقاتنا على خير و راحت .  

غدوة من داك كي نضت الصباح لقيت آبال مونكي من موح و ميساج" عيطيلي كي تكوني وحدك "
ما عيطتلو ما حوست عليه ..زاد عاود صونالي عشية ما رديتلو ما والو ..قلت خليه يعرف الغلطة اللي دارها.

بعثلي ميساج "علابالي حنونتي راكي زعفانة مني بزاااف ،و عندك الحق تزعفي بصح راني عرفت كلشي ، سمحيلي عمري و ردي علي "
رديتلو ميساج " يا أيها الذين آمنوا إذا جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين ".(وليت داعية هههه) خليتو يزيد يتكرز شوية باه نعصرلو القارس في عينيه و يعرف قيمتي و ماشي اللي جاء و قالو كلمة يدورها عليا .

يومين و هو يعيطلي و يعاود و يبعت فلي ميساج النهار الثالث رفدت عليه ، قتلو "ياك قلت انساي كلشي بيناتنا !درك علاه راك تكسرلي في راسي تعيط و تعاود ؟ خلاص راني نسيت كلشي انسى نت تاني .. "قالي" كذابة ....ما تقدريش تنسايني "
قتلو" نتا تاني كذاب قتلي نتي مرتي و ما نسمحش فيك لوكان واش يصرى امبعد كلمة بعداتك عليا ! " قالي "صح عندك الحق في هاذي بصح علابالي بلي حنينة و تسمحيلي .." قتلو "نخاف نسمحلك تعاودها ، تخيل تزوجنا و انا راني في داري في امان الله حتى يجيك كاش واحد غاير منا و حاب يفرقنا يقولك شفت راجل خرج من دارك ، امالا تجي تقتلني قبالة ما تسقسي لا صح لا كذبة !! هذي هي الثقة بيناتنا !!!!" قالي "صح عندك الحق و الله ما نزيد نعاودها لعمري ولا نتسمى رخيس"، المهم حكيت معاه شوية بصح بالتشناف و بينتلو بلي ما زلت زعفانة منو قالي "خلاص بركاينا من الزعاف درك متوحشك راني لازم نتلاقاو عندي هدرة معاك مهيش تاع تلفون" ، قتلو "ما نقدرش ، و بالاك تقولي رواحي نتلاقاو في alger ، راني فاكونس ما عندي وين نخرج." قالي صحة ارواحي نتلاقاو في دارنا كاش ماكان راكي جاية للحمام ، ادخلي من الباب الصغيرة اللي تخرج منو للجنينة نتلاقاو تم" ..قتلو هذا ماخصني غير نجي لداركم ..علاه واش قالولك عليا !! و زيد علابالك بلي ما نروحش للحمام انا ".
قالي "خلاص نتلاقاو في دارنا القديمة ..اللي بعنالو مازال باش يسكن حتى يكمل الدفعة اللخرة باه نتكاتبو .. المفتاح مازال عندي ."
قتلو انا و اياك في داركم القديمة وحدنا !! مليح حبيت يديروا طابع مكتوب فيه" رخيسة" ، هم كل الناس راهي سامعة بلي عندي سنين و منين راني معاك وزيد درك حابني نجيك لداركم ؟" بقى غير يسمط و يعاود عليا "و الله ما تخافي بلخف نشوفك برك و ولي...المهم قتلو  "امبعد نشوف ."
وحد اليومين بعد ماراحو بابا و خاوتي كامل للبحر
قالي "امال ارواحي نستناك مع وقت المقيل(القايلة)".
قلت ليما حابة نخرج نشري لاكريم ههههه، شافتني عندي شحال ما نضتش من فراشي ما صدقت اني نضت و تشهيت حاجة قاتلي صحة روحي بلخف و ولي ، خرجت شفت مكان حتى واحد .. كامل الناس راقدين..دخلت لدارهم بلا ما نطبطب ..هو سمع الباب خرج يجري قالي خفتك ما تجيش" ، انا من الزعاف هو وصل عندي و انا بلا ما نفيق بعمري اعطيته بكف و وليت نبكي قتلو "رخيس و الله ما عندك كلمة ."