احببت_صديق_الطفولة(باللهجة الجزائرية)

Part*09*

___________________________________

شدلي يدي و عنقني ..انا نضرب فيه و هو يزيد يزير عليا بيديه للزوج ..هو شادني في حضنو و انا باقية نبكي و نخبط فيه للظهر حتى وليت نشهق ..و هو يبوس فيا من عيني و خدي و يقولي "خلاص عمري راني معاك جامي نزيد نخليك سمحيلي برك" ، مسحلي دموعي و سكتت شوية قالي كي تبكي تولي تشبهي للربعة تاع الصباح بالاكي تزيدي تبكي قدامي ما توليش شابة ! ضحكني ..قتلو "طير عليا زعما نتا ديكابريو !! ههه" ولى يضحك قالي "لالا حنونتي ديما شابة ، كلختلك باه تضحكي برك هههه ، هيا ندخلو درك نبقاو هنا واقفين عند الباب ؟"
قتلو "لالا نروح قلت ليما 10 دقايق نشري لاكريم و نولي ..قالي "صار هكا تطمعيني تجي دخلة و خرجة !! وعلاه عمري و الله ما شبعت منك راني متوحشك غرااااف يا ربك و منيش حاب نخرجك من حضني .. لوكان تعرفي واش صرى فيا؟ قريب هبلت عليك !" قتلو "الشبعة فالطعام و زيد نتا درتها بروحك انا بعدت عليك ؟؟ ايا خليني نروح قبل ما تتقلق يما و كي نوصل للدار عيطلي فالتلفون و اشبع على روحك"... جيت خارجة عاود شدني من يدي و قالي "صحة اعطيني بوسة برك و روحي"..قتلو بستني "قبيل خلاص "، قالي "هذاك مهوش بوس .. وعلابالك واش قصدي" ،قتلو "واش تاني ؟" شدني ليه قربني بزاف لعندو ، وشوش لي في وذني و la voix تاعو تبدلت و قلبو بدا يضرب فوور حتى وجهو طلعتلو السخانة قالي "شواربك عذبوني يا ربك راني متشهيهم بزاف... كان باين عليه بلي بدا يسخن تاع الصح."
سكيفيتله من بين يديه و جبتهاله بضحكة قتلو" اممم اممالا راك تسالي بوسة " و هربتلو ولى يضحك قالي" راني نسال منا و هاك!! وقتاه !!" قتلو "نهار الفاتحة ان شاء الله" و خرجت ههه ، بصح هربتله بضحكة..ما لقى ما يدير قالي "ربك انتي عام السنة تدخليني لسبيطار المهابل " .
درت روحي ما نفهمش و رحت لوكان درت عليه يبقى هكاك يعنق و يبوس حتى نلقاها تطفرت فيا، بسكو فقتلو بلي غير عنقني بداه الحال تاع الهبال هههه .
و الحق انا جامي ما حكيت معاه في مواضيع خاطيين ملي عرفتو كل هذوك السنين ،تفاهمنا من الاول بلي نحبو و يحبني و متفاهمين على الزواج صح ،بصح الهدرة الخاطية لالا .و قسارة الليل تاني لالا ،ديت عبرة من بنت خالتي، كانت صغيرة عليا بعامين بصح تزوجت قبلي بسكو ما قراتش ، كانت مخطوبة لواحد 3سنين و هو يتبع فيها و يحلل باه قبلوا ماليها ،كان يحبها يموت عليها ..وحد النهار راحت للحمام و كي خرجت جازت لعندو للحانوت تشهاها و دخلها لعندو من البوس ولات في حاجة اخرى ..ما عرفوش رواحهم حتى لقى روحو دخل عليها و المشكلة ما سال والو ...من داك النهار تبدل معاها ، دار عليها 180 درجة ولى يجبد عليها و برد من جهتها غير ربي بطل منها ..شحال و هوما يحللوا فيه باه فيكسا لادات و داها و ملي تزوجوا و هو يبخسها و يسبها و يضربها و يعايرها بهذاك اليوم ..قالها "وين علابالي بالاك درتيها من قبل علابيها مكنتيش صغيرة" .. المشاكل اللي شافتهم معاه غير ربي اللي داري بيهم .. في 10 سنين زواج ، 3 خطرات و هو يجيبها يرميها في دارهم باه يطلقها و يعاودوا ماليها يحاولوه و يردوهالو .. الخطرة اللخرة خلاها عامين في دارهم حتى خلاص طلقتها المحكمة منو امبعد عاود فتح عليها و ردها بالسيف علاجال الدراري .
غير انا اللي كان علابالي واش صرى بيناتهم ماحكات لحتى واحد لا يماها لا خواتها..قصتها خوفتني وليت من هذيك الضربة تاعها خاذية حذري قاع واش كاين .