احببت_صديق_الطفولة(باللهجة الجزائرية)

Part*03*

_________________________________________

  الصباح رحت للبوسط رميتها بدون عنوان المرسل ..و طبعا عنوانه هو مهوش مشكلة يسكنوا مورانا يعني نفس الحي برك رقم الباب مبدل . 

جازوا يومين و لبنات قالولي ما شفناكش بنتي كامل هو يظل داخل و خارج و انتي حسك ماكاش! وقيلة بطلتي من اللعبة ؟ 

قلتلهم بلي ما نقدرش نخرج باه يشوفني علابالكم ندير حجاب و بابا منع علي الخرجة و الدخلة ..استغربوا كيفاش هممال رايحة تطيحيه ؟ قلتلهم ندبر راسي ..نخمم و منبعد نشوف، المهم ما تكحلوش على كاسكروطات من عندي هههه.

 و انا في قلبي كنت مني بصح ..و نستنى على نار فالبرية تلحقله باه نشوف اذا كان عنده ردة فعل ولا لالا .. ثلاث ايام و انا نعس فيه من الباب للتاقة و لبنات الستوتات كل عشية قاعدين يستناو هوما تاني من برة كاش جاست يديره ولا كاش جديد ..و حتى سعاد اخته معاهم تستنى .

 النهار الرابع شفت من التاقة الفاكتور جابلهم البرية . و من هذاك النهار السيد تبدل حاله ههههه ولى يمشي و يشوف موراه و قدامه يحوس على هذي اللي راهي ذايبة فيه ذوووب ههههههه ولى مرة يقعد وحده قدام الفيلا هذيك ،ما يقعدش مع اصحابه ..و يبقى غير يميز هنا و لهيك و يسرح بخياله ، و انا نكون نراقب فيه و علابالي على واش يحوس و ميتة بالضحك عليه ، و مرات يقعد قدام دارهم و راه يتكيف قارو ورا خوه و يشوف فالبنات وحدة وحدة ..بالاك يلقى اللي راه عاجبها ..حتى ولات يماه تزعف عليه و تقول له علاش كامل ليجون راهم بعاد على لاسيتي و انت هنا قاعد تعس فالبنات راك كومبليكسيتهم و راهم يشكوا لزهرة -اخته الكبيرة-.

 و طبعا لبنات تاني حسوا بلي السيد تبدل بصح ما فهموا والو مع العلم اني جامي خرجت ولا بنت من ساعة تفاهمنا على التحدي ..يعني كان علابالهم بلي ما شافنيش ،همال واش بيه ولى يمشي و غايس هكا! خليته بعد ما جازت سمانة ..عاودت كتبت له برية اخرى ..

قلتله " راني نشوف بلي بديت تحوس علي و هاذي حاجة تفرحني ، بصح مادامك تحوس علي بعينيك وسط لبنات ما تلقانيش ..انا حاباتك تحوس علي بقلبك ..تحس بي ، حابة نحس بلي حبيتني بلا ما نقولك شكون انا " 

زدت بعثتها بدون عنوان المرسل ، و لحقاته كيما الاولى ..و السيد زاد داخ اكثر ما فهم واااالو ..و لبنات اكثر منه ما علابالهمش كااامل واش راه صاري !! قاتلهم سعاد السيد ما ولى ياكل مليح ، ما يرقد مليح ..يبات يتكيف و يخمم ، فواش ما علابالناش !! يماه تسقسي فيه واش كاين مايردش ..و انا نسمع في سعاد و ميتة بالضحك و الفرحة في قلبي ..ما حبيتش نبينلهم والو ..قالولي و انتي واش راكي دايرة فيها مع التحدي وين وصلتي ؟ قلتلهم وين حبيتوني نوصل ؟ راني محبوسة بين اربع حيطان كيما راهم تشوفو ، بقاو يامات يخلاصو لي فاكونس و ندخل نقرا بالاك تماك نبدا نخمم فكاش جاست .. قالولي راهي قريب تخلاصلك المهلة وجدي دراهم تاع الكاسكروطات هههههههه.