احببت_صديق_الطفولة(باللهجة الجزائرية)

Part*06*

___________________________

فاتوو عاميين و حنا كي السمنة على العسل...

و سعاااد تزوجت.... و انا راكم عارفين ههه

..........................................................................

  اذا جابته تقرى فالجامعة مكاش فيها هدرة ..و اذا ما جابتوش نحكي مع باباها يعطيكم كلمة .يماه فرحت قاتلها خلاص نستناو .
لافامي تاعهم كامل كان علابالهم بلي يحبني و يماه شيعت بيا ، في عرس سعاد كانوا يشوفوا فيا و يتهامسوا هذي هي اللي راكم جايبينها لموح ؟ وليت شغل مرت خوها ماشي صحبتها.
انا سقسيت يما بقيت مستغربة شكون هذو اللي خطبوني و علاه ما قلتيليش ؟ قاتلي "علاه نقولك راكي تقراي و باباك قال لالا راهي صغيرة.خلاص"
بقيت نأنسيستي عليها قاتلي كاين واحد وليد صاحبو ما نعرفوهش بصح زوج لوخرين ولاد جيراننا ، احمد وليد موسى و الآخر نور الدين جارهم.
انا نخلعت كي سمعت شكون و مام هو كي قتلو تشوكا تاع الصح بسكو هذو للزوج صحابو و سيرتو نور الدين كان أنتيم معاه و علابالهم بلي يحبني حكالهم عليا و قالهم خطبتها و ما حبوش يمدوهالي!

 قالي صار هكا الرخاس !! علابالهم بلي قريب نهبل عليك و جاو مورايا يخطبوك ؟ ضرك تشوفي واش ندير في ربهم! 

قتلو "تعيش خلينا منهم ياك ما قبلش بابا ؟ خلاص اجبد روحك منهم و خلاص ..باه ما تزيدش تحل فمك و ما تزيدش تقول عندي صحابي ."  

بعد الباك سمعوا الناس كامل بلي جبتو و عرفت يماه بلي رايحة نزيد نقرا اعوام و اعوام اخرين ..بابا انسيستا عليا ندير طبيبة ..قلت ليما "يا يما نزيد نقرا 7 سنين واحدوخرة تاني !! قتلو "لالا حبيت ندير دونتيست 5 سنين بزاف عليا اوو" قالي "دبري راسك غير طبيبة اللي تديريها "..

المهم مزية خصتني ربع نقطة على الطب بفف هههه ، كانوا طالبين معدل 15،50 للطب و انا جبت 15،25 ..أيا سلكتلها بشعرة هههه المهم درت cherurgie dentaire ، دونتيست 5 سنين و نكمل ، سجلت فالجامعة و كامل ..لحقت القراية و بدينا الميزيرية .

العام الاول ما كنتش ستابل كامل بسكو ما اعطاونيش شمبرة فالإقامة الجامعية ..كنت كل ما نخرج على الخامسة من الدزاير لازم نركب فالتران و نروح لعمي لبومرداس و مزية لقيت عمي قريب للعاصمة ..المهم كنت كل مرة وقتاه نوصل ..

شبعت تميزير الثلاثي الاول ..كان محمد يجي عندي للجامعة شحال من خطرة و كان يركب معايا يوصلني عند عمي و يعاود يولي لدارهم ..كنت نخاف عليه بسكو كل خطرة وقتاه يوصل و زمان الشتاء تدير الظلمة بكري ..نظل نقولو "ما تزيدش تجي كي نجي فالويكند تشوفني" يقولي "ما صبرتش عليك و فالويكاند نشوفك من التاقة ، لالا ما تدبريش عليا أنا راجل ندبر راسي ليسونسيال عندي نشوفك ونحكي معاك"  

المهم فات العام الاول هكاك ومنبعد العام الثاني عطاوني شمبرة وليت نجي كل ويكاند و تهنيت مالميزيرية ...و زدت لميت دراهم لابورس تاع العام اللي فات و شريت تلفون فالصيف هكا ما يظلش محمد رايح جاي بزاف عليه .
كنت نحكي معاه فالتلفون كل يوم كي نخرج من القراية ...
بصح هكاك و كان يجي عندي مرة فالسمانة نتلاقاو فالجاردان قدام الجامعة نهار اللي مايكونش عندي لي TP عشية .نحكو ساعتين ولا ثلاثة و يروح ...
وحد النهار ماكنتش نقرى عشية خرجت انا و إياه واقفين في لاري نستنى فالكوس باه انا نركب و هو يروح ..شافني معاه وليد عمي كان عنده صوالح في alger ، ومن زهري المعوج كان شادني من يدي ، راح داها سخوونة لخويا قالو "شفتها مع واحد من لاسيتي تاعكم بصح ما نعرفوش شكون"
انا رجعت فالويكاند و هو يطيح عليا بالدبازي قالي "ما تنضعريش نتي ضرك حبيتيني نقتلك و ندخل للحبس علاجالك !! قتلو علااااه !! و انا بسم الله ما زال ما لحقتش و ما نحيتش حجابي و هو يسب و يضرب بالركلة ..اداني لشمبرتي قالي ضرك تقوليلي شكون هذا اللي راكي تتلاقاي بيه نروح ليه ضرك نماساكريله ربه .
قاتلو يما "فهمني واش صرى مافهمت والو !! تعيط حبيت تقتلها ؟؟ " ما ردش عليها قالي شكون هو ؟ قتلو قل لي شكون قالك قبل نقولك شكون هو ؟ قالي صار شكون شافك يا ق...ة !المهم كنتي مع واحد ،يما طاحت قريب طلعلها السكر قاتلنا "ما تفهمونيش نموتلكم هنا و ادفنوني و اتهناو مني" ، هو كي شاف يما تبكي و طاحت تهدن شوية ، قالها مراد وليد عمي شافها مع واحد في دزاير قالي من جيهتكم ما نعرفوش واسمه..يما فشلت عرفاته بلي موح عمباتلها كاش ما شافنا نديرو ..انا كنت نبكي بصح اعطاني ربي وحد القوة نضت ليه قتلو ايه صح شافنا ..بصح شافني واقفة انا واياه برك ، كان يستنى فيا نركب فالكوس باه يروح ، ماكانش خارج من دارنا في نصاص الليالي .."