احببت_صديق_الطفولة(باللهجة الجزائرية)

Part*10*

Lbnat sm3o hadi L'ghoNia hBaaaaL

______________________________

رحت غدوة الصباح لعندو  للجامعة شافني جاء يجري لعندي قالي "واش بيك خلعتيني يا ربك بتت قاعد !!" قتله "شوف و شوف واش صرا "..السيد اتخلع مخه حبس !!
قتله راك تشوف كيفاه السيد لعب على بابا بالدراهم و الذهب .. ماراه قاري ماهو صغير ...بمرته و بنته و رايح يمد في ليه! .. انا نقولك وين جاي حانوت الصياغة تاعه و انت دبر راسك واش تدير ..و ضرك نقولك حاجة ؟؟ و اذا بعد هذا الشيء اللي درته كامل علاجالي و ما قبلش بيك بابا، ما عنديش le choix .. نقبل نهرب معاك و نتزوجو هذا آخر حل " .
قال لي خليني انا ندبر راسي ..رجع معاي هذاك النهار ما قراش .
غدوة منذاك راح لعنده قال له انت فلان ؟ وي شكون معاي ؟ قال له نحتاج نحكي معاك بصح ماشي هنا فالحانوت ..حاب نكونو آليز .
راح معاه لقهوة حكى هو و اياه و منبعد كي رجع للدار عيط لي
قلتله واش درت فيها ؟
قال لي ما تخافيش راني حكيت معاه و فهمته ، ما يزيدش يدور بيكم خلاص ..قلتله واش قلتله بصح؟
قال لي " قلتله هاذي الطفلة راني معاها ملي كان في عمرها 12 سنة و مكاش اللي يديها من غيري ، و حكيته حكايتي معاك و كيفاه عاودت الباك على كبري باه يقبل بي باباك "
قتله زعمة قنعته ؟ نخاف يجي يقول لبابا يا جدك!
قال لي ما تخافيش ..قال لي نعطيك كلمة تاع راجل و الله ما نفرق بينكم ، انا تاني حبيت واحدة هنا و ما حبوش يزوجوهالي بسكو كنت زاوالي ، رحت لفرنسا و كونت روحي هناك و تزوجت بواحدة ما نحبها ما تحبني و النهاية كانت الطلاق ...المهم ربي يهنيكم"
اوووف اتهنيت منه ان شاء الله ما يبانش واحد آخر برك ..  

بابا استنى السيد حتى عيا و ما بان عليه حتى خبر ..يمة فاقت لي بلي كاش ما درت عيات في باه نحكيلها قلتلها ماعلاباليش ..بالاك ما عجبناهمش بسكو هوما لاكلاس و احنا نبانو طلابين قدامهم ..
المهم سكتت الحالة و لحقت آخر السنة ..محمد دار لا سوتنونس تاعه و جاب العام و اخيرا كمل جامعة .
عنده خاله طالع فالجيش طاح و ناض معاه لقاله بلاصة فالحماية المدنية ،قال له بصح لازم تدير ستاج عامين بسكو يدوموندولك باك +3 ، تستاجي و منبعد تولي اوفيسيي فالحماية تقري اللي اللي يدخلوا يديروا اعوان حماية .قال له لالا منيش حاب نستاجي لوكان نزيد نهار نخاف يدولي الطفلة من يدي
ههه أيا زاد صبر شوية لقاله بلاصة في لابوليس اوفيسيي بالليسانس تاعه ...بصح كان يخدم لا بيرمانونس يعني يخدم 48 ساعة و يريح 4 أيام .
انا تاني لقيت خدمة فالسبيطار تاع العسكر و خاله هو اللي تدخل معاي باه صحتلي بصح ما قلتش لبابا ..هو غير استقر فالخدمة عاود ولى لبابا قال له هي راهي تخدم و انا تاني ، ضرك نقدر نجيب يمة و بابا و نجو نخطبو ؟ بابا شافه ما قطعش لياس هذو السنين كامل و زيد نجح في حياته عيا عيا و وافق ..قال له معليش ارواح مرحبا بيكم ..اذا راهي من مكتوبك ما ننحيهالكش .
انا علابالي كان رايح يحكي معى بابا بقيت نستنى فيه على ناااار وقتاه يخليه باه يعيطلي و يقولي واش دار فيها ،
عيط لي رفدت عليه ملهوفة "واش يا درى!! "
هو بقى ساكت و يدير لي فالخلايع قال لي "واش حبيتيني نقولك ؟ تعرفي باباك اكثر مني، كلشي بالمكتوب "و زعمة يحكي معاي بلعقل و زعفان و انا فشلت قريب حبس قلبي عيطت عليه عيطة قلتله " ااااه !!!ما وافقش !!!! "
ولى يضحك قال لي "بصح واش بيك تخلعتي هكا ! قتله قل لي واش قالك ما تهبلنييييش!!
و هو ولى يضحك مات بالضحك و انا قاعدة نغلي فالتلفون قلتله " يعطيك ضربة طلعتلي لاتونسيون قل لي واش قالك ؟؟" قال لي " حبيت برك نعرف عمري شحال تحبني هههههه " قلتله و الله و ما تحكيش غير نكوبيلك في وجهك و نطفي التلفون سمانة " قال لي خلاص خلاص ضرك نقولك ، راني حكيت معاه و قال لي قل لاماليك يجوا نهار الجمعة مور الجمعة باه نتفاهمو و نقراو الفاتحة ...معناه نهار الجمعة ان شاء الله رايحة تولي مادامتي رسميا ههه"