احببت_صديق_الطفولة(باللهجة الجزائرية)

Part*07*

  ___________________________________________

قالي" لوكان نقولك واش صرى تأمنيني عمري ؟ هذاك النهار اللي رحت من هنا ..وصلت لاgار تاع التران و جيت رايح نعيطلك ..بصح تالمون زعفت و لحقت نغلي تماك قالي وحد الجان "اخبط هذاك التلفون اقسمله ربه على زوج "..لابيس و والله ما اديتها خليتها مرمية فالراية تاع التران بقيت ربع ايام و انا نخمم كيفاش ندير كنت محتاج نكون وحدي باه نقدر نقرر ..البارح برك باه شريت تلفون جديد و رحت ريكيبيريت لابيس " .

هو راه يحكي هذا كامل و انا باقية غير نبكي ،عنقني و ولى يمسحلي فالدموع " سمحيلي عمري علابالي تقلقتي عليا ..ماشي قصدي و الله كنت مقلق "
مسحت دموعي و هديت شوية امبعد قتلو " قلت بلي كنت تخمم ياك ؟ وين وصلت ان شاء الله ؟"
قالي " باباك يحوس على الباك ياك؟ ها نعاودوه كونديدا ليبر و خلاص" ..

قلتله "واش تعاود الباك !! "

قالي " ايه عمري نعاود نجوز على جالك بالاك تجي فالصواب ..تعرفي بلي ما نقدرش نخسرك ، و امبعد اذا جبته و ما قبلنيش باباك هذيك حاجة اخرى ، ساعتها و الله غير نخطفك و نهربوا بعيد و نتزوجك بالسيف ههه " 

ضحكني جاني على غفلة قتلو " استنى ضرك نهرب معاك ههه ، خياتك يخرجوا بالشان و الزغاريد و انا نهرب تقولشي كاش ما خسرت معاك !! لالا حنوني هذي ما تعاودهاش " 

ولى يضحك قالي "نقصر برك يا مهبولة تاعي ههههه، بصح شفتي شحال تولي شابة كي تضحكي ، ما نحبش نزيد نشوفك زعفانة فهمتي !!" و منبعد جبدلي ساشي فيه باطة جابها معاه قالي "شوفي واش جبت لحنونتي بصح قوليلي سمحتلك باش نوريلك واش جبتلك .."

تبسمت و ولاتلي الروح قتلو ما نقدرش نزعف منك
فتحلي باطة تاع قلب اللوز قالي "علابالي مكيش تاكلي مليح و شفتك تحبيه جبتلك شوية".
و منبعد قالي "غمضي عينيك جبتلك كادو" ، قتلو "علاه نغمض ثاني ؟ اجبدو بركانا من السمير" قالي "لالا و الله غير تغمضي باش نجبدو"،تبسمت و غمضت و بقيت نستنى ..حسيتو شدلي يدي فتحت عيني نلقاه يلبسلي في خاتم تاع ذهب و باسلي يدي ! انا بقيت مدهوشة ، قالي " نتي مرتي انا، و واحد ما يديك غيري ، هذا الخاتم ما تنحيهش من يدك حتى نديرلك في بلاصته تاع الخطبة فهمتي ؟" ما قدرتش نحكي من الفرحة وليت نبكي قتلو "ايه عمري "
مات عليا بالضحك قالي "نتوما لبنات وحدكم ، تزعفو تبكو تفرحو تبكو ما فهمنا فيكم وااالو !! "
ضحكنا و نسيت كلشي و كلينا انا و اياه ..و أخيرا قلبي رجعتله الحياة ، وصلني للاسيتي و راح  

  المهم سجل موح للباك و بدا يريفيزي من قلبه ، ماليه مخلوعين منين جاتو يعاود الباك هذا !! ما ولاش يجي بزاف ، مرة في 15 يوم و تفاهمنا ما يعيطليش باه ما يتلهاش ، كان يقرى كل ما يكون عنده فراغ ..و كي يجي لعندي نفهمه فالرياضيات اللي كانت تجيه صعيبة ، اما الباقي كان فور فيهم ، هو ما حطش بالو باش يجيب الباك المرة الاولى و الثانية سينو هو راسه خفيف و بلخف يفهم ، بقينا هكاك هذاك العام ولحق الباك ، عقبه و النهار التالي اللي كمل جاني قبالة للاسيتي ما راحش لدارهم ..رحنا للجنينة و كان ميت بالفرحة قالي" راني حاس بلي خدمت هذي المرة ..وقيلة فيها ان شاء الله"
فرحت بزاااف قتلو ان شاء الله ..