احببت_صديق_الطفولة(باللهجة الجزائرية)

Part*05*

____________________________

 شديت هذيك الورقة بستها حتى قريب قطعتها و قريتها و عاودتها ألف مرة و أنا منيش مأمنة واش راه يصير معاي!

كي فاتت 15 يوم بعد عرس اخته عيطتلي سعاد من التاقة قاتلي حبيت نحكي معاك ،غير شافوها لبنات جاو لينا يجرو "واش كاين كاش جديد "قاتلهم ارواحو تسمعو آخر الأخبار ، موح خويا راح يهبلها يما قالها روحي تخطبيلي أمال بالسيف نخاف يدوهالي ههههه

قلتلها بركاي ما تتمسخري صح، قاتلي و الله ماني نتمسخر ، من قبل عرس زهرة و هو ياكل في روحه ، قاتله يما خلي نفوت العرس و نروح ليهم ، و انا البارح برك باه قاتلي ماصبت وقتاه يطلع النهار باه نقولك بلي راح تولي مرت خويا هههه،
لبنات شبعوا ضحك و سمير ، قالولي "ويييي أمال زعمة درناه لك تحدي و خسرتي فيه ، و هو وحده كان معول عليك هههه ، و عشيتي اتخطبتي قبل لي جونفي تاع لاسيتي يا ستوتة ، ضرك يولوا يشوفوا ارواحهم كامل بايرات هههه.

المهم قسرنا و ضحكنا حتى شبعنا هذاك النهار...و قاتلي سعاد المهم ديري حسابك راهي يما جاية غدوة عشية تحكي مع يماك .
انا كنت ميتة بالفرحة بصح علابالي راح توليلي كامل زعاف بسكو علابالي مازالني صغيرة و بابا مستحيل يقبل يمدني .
درت روحي ماعلابالي بوالو ماقلتش ليما راهي جاية يمات سعاد خليتها جات و انا زعما نسقسي واش بغات هاذي ؟
قالت ليمة" شوفي يا فاطمة الزهرة ختي ، باه ما نكثروش الهدرة بزاف انا جيتك علاجال بنتك امال ، موح وليدي راه هبلني عليها "
قاتلها يمة "ياك حكى مع باباها و قال له لالا ، و انتي ماعلابالكش بلي أمال قد بنتك سعاد !! كيفاش درتي عليه و حبيتي تخطبي طفلة ما لحقتش 15 سنة حتى!
قاتلها "يا ودي علابالي مازالت صغيرة و راهي تقرى
هو قالكم اعطوه برك كلمة و هنوه بلي راهي ليه و وقت ما كملت قرايتها نرفدوهاله "
يمة ماحبتش تبقى تكثر فالهدرة قاتلها نقول لباباها و نردلك خبر .
جاء بابا و حكات معاه و مع هو منارفي قالها "تزيدي تعاودي تجبديلي هذي الحكاية ترفدي ولادك و تطيري لداركم ، الطفلة ما طلعتش لليسي تحوسي تدخليلها في بالها زواج و تخليها تضيع قرايتها !!" 

يما تخاف من بابا تموت من هذاك النهار مازادتش جبدتلو السيرة و قالت ليماه "باباها ماحبش قالك حي و ميت ..كي تكمل قراية عاودي ارواحي ، و اذا راهي من مكتوبه تطول ولا تقصر يديها يديها ..و ما تخافيش ، مادامها تقرى باباها ما يمد كلمة لحتى واحد كوني هانية "

راحت يماه خبراته ايا سكت و قال نستنى و خلاص .
المهم انا طلعت لليسي نقرى ، و نسيت نقولكم بلي
في جماعتنا كاين غير انا و ليلى اللي كنا نعرفو نقرو ، سعاد عاودت 2eme شحال من خطرة ماجابتوش و منال بطلوها كي رودوبلات و دارت سطاج خياطة ..انا و ليلى نتاج فالعمر بصح انا دخلت صغيرة للمسيد و كنت نقرى مع اللي كبار عليا بعام ،و كي طلعت لليسي ليلى كانت مازالت فالبيام ، و انا كان لازم نركب البيس بسكو مكاش ليسي وين نسكنو .
و مام كي طلعت ليلى لليسي العام اللي بعده ، ختها الكبيرة تقري فالسيام في مدينة اخرى و عندها طوموبيل أيا بدلتلها للليسي اللي قريب على سيامها باه تديها و تجيبها ، معناها طلعت وحدي لليسي ما نعرف حتى وحدة نروح معاها و نجي معاها ،
كانت كاينة غير أمينة جارتنا اللي طلعت كيما انا في عام واحد ..أمينة شابة بيضاء و مسرارة فور بصح مسكينة يماها مطلقة و معاودة الزواج و ساكنة في جهة اخرى ، و هي عايشة غير مع جداتها يمات يماها عجوزة كبيرة في لاسيتي(فالصف اللي يسكن فيه موح ) . هي كبيرة عليا بعام برك بصح كانت دخل روحها و تخالط البنات اللي كبار عليها ، على ذاك كانت تقسر مع لي جونفي تاع لاسيتي مشي مع كليكتنا ..