#حب في أرض الخوف
#بقلمي شمعة امل
#الجزء الثاني والعشرون
....رعد .....فاتحت هدى ثاني يوم من اجتي من يم اهلهه
وجان تقوم القيامه
رعد ......ديري بالج تعلين حسج عليه افتهمتي ...
اني اجيت اخبرج مااجيت اخذ رايج
ولأن احترمج وصاين عشرت السنين الي بيناتنه.......
والولد الوحيد الي يربطنه خبرتج
.......والا اكدر اتزوج حتى بدون علمج
وانتي تدرين بيه..... اذا احط شغله ابالي اسويهه
هدى ...بس اريد اعرف بشنو اني قصرت وياك ...
تحملتك بكلشي ...
وسمعت كلامك ...وحتى من كتلي نزلي الي ابطنج ...
........هم رحت ونزلته للطفل
وتحملت تحرمني من ابني الوحيد وتخليه يعيش بعيد عني ...
وبقيت هنا أخدم بيكم انت وامك واهلك
تالي هاي مجازاتي تتزوج عليه
رعد .....كلامهه كلش عصبني ...
ولج شنو أخدم بيك وبامك واهلك ...
ليش اني من تزوجتج مو كتلج هذوله اهلي هسه همه اهلج
وانتي قبلتي ...
يعني انتي من تشوفين طلبات اهلي هنا
انتي خدامه
انتي مو كلتي امك مثل امي واداريهه مثل مااداري امي . .
اشو تالي صرتي يوم تداريهه وعشره لا
وخليتيني اشتريلج قطعة أرض واسجلهه باسمج حتى تدارين امي عدل
وهم سويتهه كلت ميخالف
زوجتي وهم الهه حق لان اني على طول عايفكم واصلا اني مضامن عمري وانتي جنتي تردين فد ضمان أو سند الج للزمن
وجنتي شتطلبين مجاب
من طلعات ومن فلوس ومن ذهب
ومن كلشي محارمج
وما فد يوم حرمتج من طلعه أو روحه لاهلج أو صديقات أو زياره ....
وجنت اكول حقهه لان ماعدهه شي يملي وقت فراغهه......
......لعد مو بس تبقه تشتغل بالبيت وتتعب
لازم اكو وقت راحه الج
.......وأما سعد فإنتي تعرفين ليش اني طلعته
والله على عمه عيني طلعته
لان اخاف عليه
وانتي تعرفين هو قطعه من كَلبي .....
.......وهم ماحرمتج من شوفته
هم بين فتره وفتره اخذج ونروح نشوفه
وهم جنتي تستغلين الفرصه واخذج انتي وياه ونروح نفتر بالمنتزهات والمولات وهم حتى تتونسين
وجنتي ترجعين محمله بالغراض والهدايا
.....الج ولكرايبج
هدى .....اي من حقي اشتري
رعد ....واني ماكتلج مو من حقج
وخليتج براحتج
....كلشي ردتيه جنت انفذه الج ....
هسه كافي بعد ....مثل ماانتي جنتي تعيشين حياتج مثل متردين اني هم من حقي اعيش حياتي مثل مااريد ....
......رعد .....تركتهه وطلعت من الغرفه ....
هيه ضلت بس تبجي ....
كانت والدتي كاعده بالهول وسمعت كل الحجي
الي دار بيناتنه ...
الوالده ....يمه رعد ليش هيج قهرتهه
موخطيه مريتك ...
وهاي عشرت عمر ومو هين عليهه تكلهه بهيج شغله وتسكت ....
رعد .....اعرف يوم ....بس اني ممسوي شي غلط
هذا زواج يعني حلال الله
وادري هيه حقهه من تزعل وتنقهر ...
