بارت ثاني لعيونكم
#المتسولة
بقلمي ام مصطفى
البارت الثالث والعشرون
طبت سليمة تصيح بنتي مريم
رجعولي بنتي
شافتني كاعده رادت تجي علي مريم انت بنتي
بنتي معليج بيهم
حقيقة مااكدرت اتحمل الموقف خليت ايدي ع وجهي وكمت ابجي
امي ضلت تحجي
الله لا يوفقج ياحرامية
يامجرمة حرمتيني من بنتي عشر سنوات
وبعدج تصيحين بنتي
الله يحرك كلبج ياضالمة
سليمة تصيح بنتي لا دكولين بتتج
وامي كامت تصيح عليها
كلش تأذيت من الموقف
لومها يكون ابقى عشرة عشر سنوات
بيني وبين سليمة والعشرة ماتهون بس ع ابن الحرام
رغم كل الي سوته بيه انقهرت على وضعها وحالها
كمت ابجي بصوت وطلعت
امي تصيح الله لا يوفقج
خبلتي البنيه سوتي بيها حالة نفسية
سديت اذاني مااريد اسمع شي
لا صوت امي ولا سليمة
كعدت ع مقعد مال مركز
بره
طلع وسام ورياي
واني ابجي ع الموقف الاني بيه
كال مريم كافي لا تبجين
وانسي كولشي صار وجره هنا
وابدي صفحة جديده
كتله شلون أنسى مااكدر
مو شويه الصار وياي
تعبت وسام تعبت
من صغري وتحملت ضيم وجوع وضرب وحر وبرد وحرمان
وفراك امي وابوي
ليش ليش
من دون الناس اني هيج يصير وياي
ليش ليش
كال احمدي الله مريومة رجعتي لاهلج
تره هواي مثلج ولهسه ميعرفون اهلهم
وباقين بالشوارع
ضابط محمود يكول كلش هواي حالات تجينة هيج مخطوفين من اهلهم
ومانعرف اهلهم
الحمد لله انت رجعتي
كتله الف الحمد لله
بس صعبة والله صعبة
كال اكيد بس شدة وتزول
دمسحي دموعج ياعيني
والله محلوه وانت تبجين
رفعت عيني عليه
كال اويلي لا حلوه يمعوده
شوف عينج كامت تجدح بالدمع
تره مااتحمل اني
ابتسمت كال اي ابتسمي يمعوده
بعدين هذا ضرغام مدري شسمة
لا تكعدين هواي يمة
تره اغار منه كمت وكلبي كام يلعب
خايف
كتله اني وين وانت وين
اجت امي عصبيه
وسليمة اخذوها فاتت مني وهي تصرخ
كالت تعالي فوتي يمة
شلون عليها عين كوية
صدك لو كالوا فوك شينة كواة عينه
كتلها يمة ماافوت اختنكت عوفيني هنا
اجت كعدت بصفي ووسام واكف ع راسي
كال هسه اجي طلع ورجع
جايب عصاير الي ولامي
كال مريم اشربي عصير ليمون
هدي اعصابج بي
امي اشكرت منا بيش اجازيك
ياخالة عيوني اشلعهن الك
مااوفي
كلها خاله الله كريم يجي يوم وتجازيني
وطب جوه
كالت شلون مفهمت شيقصد
كتلها مااعرف
مرام انت تحبيه
هااا
كولي بنتي
لا ماما بس هو خوش ولد ساعدني
وفتحلي بيتهم
واهلة استقبلوني احسن استقبال
اي اعرف ماما
بس احسج تفرحين بشوفته
وهو احسة عينة منج
كطع حجيها ابوي وخوالي طلعوا
وطلع ضرغام والضابط محمود
ووسام
الضابط محمود
كال مرام صيري قوية اريدج
باجر محكمة وراج
مااريدج تنهارين هيج
شلون لعد بالمحكمة
جاوب ضرغام من يمة لا تخاف
مدام اني موجود يمها ان شاء تصير قوية
بسرعة رفعت عيني ع وسام
شفته عكد حواجبه وضاج
...
توادعنا وياهم
مع السلامة مع سلامة
وصعدنا بالسياره
عيني ع وسام
كلش ضاج واكف ويرفع بشعره وفرك راسه
ويباوع علينة
ابوي كال شلون درة هذا ضابط وسام
كتله اي بابا كلش حباب بصوت
امي كرصتني ع كيف اسكتي
فشلت منها حسيت ع روحي
وسكتت
رجعنا بالطريق صار وقت غده
نزلنا كولنا تغدينة بمطعم
شكد صعبة
كلت لامي مااعرف اكل هيج
كالت اكعدي واني واوكلج
استحي ماما
معليج
كعدتني ع كرسي وقربت كرسيها يمي
نزلوا الاكل
ريحتة تشهي وطك بالخشم
جان كباب شوي وطماطة ومقبلات
وكص دجاج
كعدوا ياكلون
وامي توكلني
ضرغام كلها عمه خليها تاكل
شنو جاهل توكليها
كلتله معليك اني اريد اوكلها بيدي
ابوي كال عوفيها يمعوده الناس تباوع علينه
وشعلي بالناس اني
اكلي بنتي اكلي
خلصنا ورجعنا صعدنا
وصلنا لبغداد
امي كالت لابوي اخذني
لشارع فلسطين اريد اشتري
لمرام ملابس كلها تدلل
ذبنه وكلها رايح
من تخلصون خابروني
كامت تدخلني للمولات
وتختار الي ملابس
واني بس اباوع
مبهوره بالناس
ولبس البنات
صراحة ماشايفة هيج
بنات لابسات قصير وبله حجاب
نفس التركيات
بقيت فاكة حلكي عليهن
وامي اجر بيه
الى ان امي احسها اشترت شبيك
يا مول وياسوك
تاخذ وتاخذ
وراها خابرت ابوي
يجي ياخذنه
ورجعنا للبيت
وهي محملة كولشي وكلاشي الي
ملابس بيت طلعه وملابس داخليه
وحجابات واكسسوارات
وجنط واحذيه وووو كومة غراض
صدك تغيرت نفسيتي وفرحت بيهن هواي
من شافهن بابا كال لازم
أفرغ الغرفة الفوك ونسويها الج ولشجن
كال راح اطلع عمال يصبغون الغرفة ويرتبوها
وراها اشتريلكم لغرفة اخشاب
الي عرفته اهلي ناس ع حد حالهم
عايشين ع راتب ابوي
وجدي الله يرحمة
وابوي عنده بيت وسياره
ومامحتاج شي
الراتب يكتر منه ع صفحة
وعايشين الحمد الله
امي وبيبي بهاي الفتره
دللني ادلل
ابوي اخذني وقدملي خارجي
كال مافوت سنة
وحتى لو رسبتي ميخالف
الاعاده افاده
جاب سبورة واقلام ودفاتر
وكتب صف اول
وبذل كل جهده وياي
اني احب الدراسة
ومثل ميكولون عطشانة للعلم
بسرعه استوعب
وكلها تشجعني بديت اعرف كم حرف
حتى امولي يقريني
اسبوع وخلصت الغرفة اثثها ابوي من كامل
اسبوع كامل امي تعلمتي ترتيب البيت والنظافة والاتكيت
شلون اكل كدام الخطار
شلون ارتب
حبيت حياتي الجديده اريد
اتعلم بعد وبعد
بدينا نصعد بالغراض فوك
وامي تعلمني شلون ارتب غرفتي
هاي المجرات خلي النواعم بيها
هاي الطلاقة مال الكنتور علكي ملابس الطلعه
هاي الخانة سفطي ملابس البيت
رتبت كل اغراضي
واني اساعدها
ترسولي الغرفة
كل شي احلم بيه عبالك طفله ويدللون بيه
امي حتى لعابات جابتلي
وطلعت دبي ولعابتي
كالت هذن جنت محتفظه بيهن مالاتج من جنتي صغيره
خلتهم ع جربايتي
وصعدت اغراض شجن هم يمي
صارت الغرفة النه اني وشجن
بهاي الفتره
ولا خابرت وسام ابد
ومرات الكاه مخابر
بس مااكدر اخابره
لان اهلي يمي ماعايفيني
امي من يروح ابوي تستلمني
تعلمتي ع الترتيب
وابوي من يرجع يستلمتي يدرسني
وبالليل انام يم بيبي
فما اكدر
اول ما خلصت غرفتي
ونامت شجن
كلت خلي اتصل عليه
هواي لكيت مكالمات
أول ماخابرت
جاوب
مريم
كتله شلونك
وهو استلمني صياح
انت وينج وليش مجاوبين
ونسيتيني
وعيني بعد ماافيد ومااعجب
اكيد ملتهيه بضرغامج
وسام ع كيفك بس احاجيك
احتركوا اهل وسام
زين تذكرين اسمي
روحي مني روحي وسد الخط
يااا شبي هذا
وللحكاية بقية ام مصطفى
أنت تقرأ
#المتسولة والضابط
ChickLitطفلة تخطف من اهلها لتصبح متسولة في الشوارع وتكبر وتلتقي بضابط فيقع بحبها الضابط قصة باللهجة العراقية للكاتبة ام مصطفى
