#المتسولة
بقلمي ام مصطفى
البارت الخامس
تعودت يومية تكعدنا الصبح
ونروح من غبشة وي بداية الدوام نجدي
بالشارع كامت امي سليمة تروح لشارع واني توكفني لو يم ا٠شارة مرور
لو يم سيطرة
وهي تروح مكان واني ابقى بمكاني
دائما يجون جهال صغار يجدون
بس تطردهم سليمة إذا شافتهم يم مكانة
دكلهم روحوا منا هذا مكانة
اكو بنية صغيرة تجي هي واخوها
تجدي بنفس الشارع
مرات تشوفها سليمة تطردها
لان ينطوها هواي
الجنود الي واكفين بالسيطرة ينقهرون عليها ويخلوها توكف يم السيطرة
من تروح سليمة وتعوفني اروح يمها
احجي وياها
ومرات نلعب غميضان
وره السيارات
مره صار دنيا الظهر كعدنا اني ونورة واخوها حمودي
كتلها انت وين امج
كالت امي مريضة بالبيت
متكدر دكوم
واني واخوي نشتغل ونجيب لامي مصرف ومسواك
ليش وابوج وين
ابوي كتلوه الامريكان
وبيت جدي طردونة بالشارع
وامي كعدتنا بالمدرسة اكو غرفة يم الحمامات مع
كعدنا بيها
امي يومية تكعدنة من الصبح حتى نطلع نجدي
واذا ما طلعنا تكتلنا وتحرمنا من الاكل
كتلها خاف مو امج معقولة امج تضربج
كالت ليش هسه امج مو اضربج
كتلها هااا اي اي
خفت اكلها هاي مو امي انوب سليمة تسمع تجويني
بس ليش ماهي تطلع تجدي وياكم
مو خوالي ميقبلون وهي تستحي يشوفها أحد
ها
بقينا نسولف
اجت سليمة خزرتني ولج اني مو كتلج لا تصفين بصفها
يمة الشرطي كعدها يمي
ودنيا ضهر ماكو سيارات
كالت دمشي للبيت
جرتني حيل
وكامت تغلط وتسب والله انت مال كتل مو مال انقهر عليج
وصلنا للبيت وهي اتدردم
كالت اطيني الفلوس
اطيتها الجنطة
جنت البس جنطة صغيرة صفح
واخلي الفلوس بيها
حسبتهن واني كمت اغسل بوجهي
يطيح صخام بادي من وجهي
من دخان السيارات
عاطت مرييييم مرييييم
طبعا غيرت اسمي هي سمتة مريم
اجيت ها يمة
وغمة شني هذن تباوع ع الفلوس
فلوس يمة
شني بس ذن حصلتي اي
اي هنة ذن والله وج بس ٣٠ الف من الصبح لهسة
طبعا شلون تحصلين ونورة واخوها يمج كامت لزمنني من اذاني
توبي منها
اخخ يمة والله الشرطي يكلها اكعدي يمها
يكول إذا ماتردينها روحي منا
اوووف يريدنة نعوف السيطرة الها شنو
اخخ اليوم ماكو غدة الج
ليش يمة شعلي اني والله ميتة جوع
حتى فات ابو الجرك ومااشتريت
كلت خاف ماترضين
لا عوزج تشترين والله اموتج خلاص
كومي يلة روحي للسيطرة ولا تجين إذا مامحصلة اقل من ١٠٠ الف
يله
طلعت الدنيا حارة شمس موت
وبطني تصوصو من الجوع
شفت نوره ع كعدتها
ويمها اخوها واكل بماعون سفري
جاي تاكل
كالت تعاي اكلي
الجندي ذاك اطانياه
جاي اكعد صاح علي واحد من السيطره تعاي عمو
شال ماعون واطاني
كتلة شكرا
فرحت كلش لان جنت جوعانة بوكتها
كعدت اكل لحد ماخلصت الماعون
كمت اركض وره السيارات واتوسل بيهم وابجي ع مود اجمع فلوس
اخاف سليمة تذبني للجلاب
بقيت للساعة ١٢ بالليل اركض رجليه طاحن ع ما حصلت فلوس بس مااعرف شكد
رجعت للبيت حسبتهن سليمة ٧٥ الف
كالت مو كتلج اقل من ١٠٠الف اشمرج للجلاب
يمة والله اركض همة بس ذول اطوني سامحيني هالمره فدوه
سكتت ماحجت
جانت تجمع فلوس تريد تشتري البيت الكاعدين بيه
جان عارضة بخمس ملايين الرجال
وهي كالتلة اني اخذه ...
بهاي الفترة اني ونورة كلش تصاحبنة
وكمت احبها هواي
نسولف ونلعب
حتى اهل السيطرة الجنود عرفونا
وامنوا النة كلش
فديوم فاتت دورية ايطاليه
وجان اطك عبوة ناسفة زرعتها مجموعة مسلحة يسمون المقاومة ضد الاحتلال الامريكي
جنا اني ونورة نشوفهم الظهر يحفرون
شباب ملثمين يحفرون بالكاع بس مجنا نعرف شنو يسوون
مره اتقربنا منهم كال وخرن منا
وواحد منهم انطاني فلوس
وكال لا دكولن اي شي
بيوم الي انفجرت العبوة
نورة جانت مكعدة اخوها بالجزرة الوسطية
وهي تجدي من صفحة السيارات الراجعة
واني من الشارع السيارات الجاية
اجة رتل مال سيارات ودبابات إيطالية
تعدة شويه مسافة منة
وجان يصير صوت قوي
حسيت روحي انشلت ونشمرت
بعد عشر مترات
كلشي مااشوف بس دخان وضباب ونار وصياح ورمي صار قوي
بقيت خالة ايدي ع راسي وختلت وره صبة زحفت زحوف جانت قريبة مني
اريد اباوع انتبه ع شي ماكو بس رمي طلق عبالك فلم اجنبي لمن يصير رمي
اتذكرت نورة وين راحت
رفعت راسي
ورجعت نزلتة من الطلق
بقيت ابجي بصوت عالي
كام جسمي يون علي ون من الوجع
سمع صوتي الجندي
اجة شالني ودخلني بالبرج مال السيطرة
واني اسئلة ع نورة واخوها
كال مااعرف ماشفتهم
وللحكاية بقية ام مصطفى
أنت تقرأ
#المتسولة والضابط
Chick-Litطفلة تخطف من اهلها لتصبح متسولة في الشوارع وتكبر وتلتقي بضابط فيقع بحبها الضابط قصة باللهجة العراقية للكاتبة ام مصطفى
