#المتسولة والضابط

البارت الثاني

المتسولة
بقلم #ام_مصطفى
البارت الثاني
ام قيصر 
سمية سمية
ها عمه اجيتي اي  ليش باب الشارع مفتوح
دخلت عمتي للمطبخ ذبت العلاكة وذبت العبايه
واجت للمغسلة تغسل وجها 
اكلج ليش باب الشارع مفتوح
لا عمة مفتوح سديتة وراج
لكيتة مفتوح
زين جهالج وين
امولي نايم
ومرام تتفرج ع افلام كارتون بالصالة
كالت لا ماكو مشفتها
شنووو
يا ولج عزه بس لا هي الفاتحة الباب
ولج مصخمة من شوكت مافاكدتها
لا عمة هسه قبل ربع ساعة كعدتها
لعد وينها
مرام مرام مرام
وينج ماما
مريومة يمه بنيتي
مرام
ولج اطيني عباتي اطلع اشوفها بره
خاف راح تشتري
لا مااخذت فلوس
اني انطيتها قبل لا اطلع
ها يجوز صدك لعد
انطيني انطيني
اخذت عمتي عبايتها
وأني كلبي يلوب ابد ماارتاحيت
لزمت باب الحوش
مكدرت افوت
كلت من تجي اله اطيح حضها
شميت ريحت حرك يبوووي احتركت الشعرية  نسيتها
ركضت لكيتها معطبة
يبووي هسه عمتي تشبعني رزايل اليوم
طفيت الجدوره ورجعت مديت راسي
من الباب
شفت عمتي شايطة تمشي وماكو مرام ورياها
طلعت بطرك ثوبي
ها عمة
ولج اش هاااا ماكو البنية  لا يم الاسواق ولا بالشارع
صخام الصخمج سمية وين بتج
عمة والله هسه كعدتها بالصالة
كمت ابجي كلبي انقبض حسيت بيها شي
عمة خلي اجي ادور وياج
ارجعي شدورين الولد لا يفز ويختلس وحده
عمة اجيبة بيدي واجي
ارجعي اني رايحة ادور
كمت ادك ع وجهي وين رحت
ولج مرام ماما وينج واصيح بالبيت
شفت نعالها  اي مطالعة
بالبيت خاف لبدت لو صعدت فوك

ولج مرام ماما  وينج
صعدت الدرج  وصلت للبيتونة مسركة بالسركي يعني ماطالعة
كلت ميخالف خلي افتحة
طلعت بالسطح مثل الخبلة
مرام اطلعي ماما وينج
فريت السطح كلة ماكو
نزلت جوه سمعت صوت امولي يبجي
ركضت شلتة وابجي
واصيح مرررام مررام
اخذت ابني وطلعت اباب الحوش وكفت
الرايحة والجاي اسئلة مشفت بنتي مرام
ماكو محد يعرف شي
تخبلت تلفت اعصابي انوب عمتي ماكو
تاخرت
وابني يبجي بيدي
مااكدر ادخل جوه وارضعة ايدي متاخذ
.......•••••...........
مرام نزلتا من التكسي 
ودخلنا مكان متروس سيارات ووهوسة ناس صاعدة وناس نازلة
واكو ناس كاعدةتبيع
اني كوه امشي وتسحل بيه سحل المرة
اختتكت وخفت
عمة رجعيني للبيت
عتتني اسكتي
دست ع كزازه كلت اخخخخ
دنكت
كالت شبيج
تعورت عمة
ليش انت ملابسة نعال
لا طلعت ركض وره ابو الشعر بنات حافية
رفعت راسها كامت تباوع يمنة يسرى
شافت رجال كاعد بالكاع عندة بسطية
كالت تعاي
اخذتني يمة
كالها ها حجية الج نعال للبنية
كالتله لبنتي نعال انشلع نعالها
باوع ع رجلي وطلع نعال جان لونة احمر
كال لبيي هذا يكفيلج بله
لبستة اي ع كدي جان احمر وبي وردة 
فرحت بي
انطتة فلوس
كالت صيري عاقلة وكلشي اشتريلج
عمة مااريد بس رجعيني لامي
كالت اي اي
بس غير اريد اشوفج بنتي وارجعج
جانت اكوو سيارات اتصيح وناس تصعد
بعدين صعدنة سيارة
جبيره وبيها هواي ناس
والسايق يصيح ناصرية ذي قار
والناس تصعد
شوية وانترست ناس
وسد الباب السايق وشغل السيارة ومشة
بديت ادووخ من السيارة نمت
وماكعدت اله ع صوت المره اكعدي بيه حيل اشيلج انة
شفت السيارة واكفة والناس تنزل
نزلت جلبت بعبايتها ونزلت
وارها اشرت سيارة وصعدتنا بيها
ونزلنا
مشينا شوية وصلنا لبيت فتحت الباب وفتنا
.........سمية ........
بقيت واكفة
شفت عمتي من بعيد تاشر علي 
وأني ااشر الها
كامت تصيح ها اجت لكيتيها
وأني اكلها ها لكيتيها
خرطت خدها ولج وين البت
مرام وين
عمة والله كعدتها ع التلفزيون
ولج يا تلفزيون البت ماكو
كامت تعيط
اطيني المبايل
جان عدنة مبايل مشترينة للبيت هستوه داخل نوعية طابوكة يسموه
ركضت عليه جان ع ميز التلفزيون مخلينا
وينة ايي هذا
ايدي ترجف عمتي تصرخ وتحجي راحت البت يمة دخيلك يا ربي
ابني يصرخ
مااعرف اووصف الي جاي يصير كلشي داير مدايري صار اضلم وبس صوت عمتي
انت ثولة انت مهملة
شلون محسيتي ع بنتج تطلع
جرت مني المبايل
وخابرت
الحكلي ابو قيصر 
مرام طالعة من البيت وماكو
صار ساعة فريت المنطقة كلها عليها ماكو
الحكلي فدوه وسدت الخط
مددت رجليها وكامت ادك
وأني مصدوومة وبس ادموعي تنزل
يمة بنيتي صارت صدك ماكو
امولي يصرخ عاطت عمتي
ارضعي الولد ثولة سكتي مات بجي
مديت ايدي ع صدري وطلعتة وكام يرضع
كالت عمتي مااكدر انتضر ابو قيصر ع ما يجي
رايحة اصيح بالجامع
عمة اخذيني وياج
وين رايحة اتونس اني
وتلطم ع وجها راحت البت
اي راحت
وين الكلها بعد
طلعت وطلعت وراها
كعدت بالباب ابجي واسئل
الناس بدت تسئل والجوارين تطلع
خير خير
بنتي ماكو طالعة وماكوا
التمن نسوان يمي يسئلن
من شوكت
وشلون محسيتي بيها
ووين راحت
وشكد عمرها
وأني ساكتة وابجي جهال التموا يمي
نزل عمي من تكسي
كال هااااا
اني شفته وصرخت عموو عمو مرام ماكو
شنو ماكو وين راحت
ماادري عمو طالعة من البيت وماكو
الجامع كام يصيح
فقدت الطفلة مرام  عمرها خمس سنوات ونصف ترتدي ملابس ......
فعلى من يعثر عليها تسليمها لجامع.........
كالن النسوان اي صاحوا بيها الجامع
هسة تلكوها
عمي عافني وطفر
شفتة من بعيد طلع مبايلة خابر اكيد خابر
قيصر يكلة اي اكيد
كتلتني الشمس بره
الجوارين كالن فوتي خالة
الوليد موزين عليه الشمس
طبيت بالحوش
شويه اجت عمتي
منتهية بجي
سمية البت سمية ولج بتج ماالها اثر
وتصرخ
اجة قيصر
مثل المخبل مرام مرام بابا مراااام
وينها لكيتوها لولا
عمتي تصرخ راحت بتك ماكو قيصر

وهو لزمني ولج وين مرام سمية بتج وين وين
احجي البنية وين
صرخت ماادري والله كعدتها ع التلفزيون ورحت اطبخ
ولج عساج كلتي سم شطبخين بتج وين ويييين
طلع دفر الباب برجلة حيييل
وطلع
عمة والله كعدتها ع التلفزيون
اوف مريومة وين رحتي
دخل عمي
تعالن فهمني شلون طلعت شوكت اخر مره فكدتنها
كتلة عمو والله كعدتها ع التلفزيون
ودخلت للمطبخ
ماكو ربع ساعه اجة عمتي كالت ماكو
أندار ع
وج مديحة خاف البنية لحكتج للسوك
كالتلة لا ولا ماكو اني بطبيعيتي من اطلع اتلفت وراي
رادت ربع انطيتها وكالت اشتري شعر بنات
من يجي
اي هنا الحجي يعني طلعت البنية تركض حافية وره ابو الشعر بنات
زين وين اختفت وين راحت
ابو الشعر بنات تعرفنة شايفاتة
عمتي كالت اي دايما يجي منا
هسه شلون ننتظر لحد ميجي
اجه قيصر يباوع بالوجوه
هااا
كلة عمي ماكو طالعة وره ابو الشعر بنات
كام يعيييييط 
وانت شنو جايبج خراعة خضره هنا
كم مره كايلج الزمي جهالج واكعدي
مانريد تنظيف مانريد سم 
انت متفهمين متحسين
كمت ابجي بصوت عالي والله دايرة بالي عليهم
والله والله كمت ادك ع وجهي
اكل بروحي مابية حيل اجادلة
كال كوم بوية نروح لمراكز الشرطة للمستشفيات
كام عمي
كتلة اروح وياكم
عاط بيه ضلي يم  ابنج حافظي عليه
عمتي هم رادت تروح
مخلولوها
كتلها عمة اريد امي خابريلي امي
بساعتها اختنكت حسيت روحي بحاجة امي
تحضني واطمني  وتواسيني
كامت جابت المبايل وخابرت
اهلي
وخابرت حمواتي زينب وانتصار
كامت الناس تجي
مرام محبوبة وبنية عاقلة وفاهمة ذكية ولسانها حلو كلشي تفتهم  وتحجي
مرات نكللها  لسانج شطولة جنج عجوز  ونضحك عليها ...
كلها انصدمت وتاثرت عليها
طبن حمواتي وحده ورة الخ يتعايطن
وراها اجت امي حضنتها يمة يمة مرام راحت من ادية
كالت اسم الله عليج حبيبتي لاتسوين هيج
كولي يا الله كولي يا الله
اذكري الله
الا بذكر الله تطمئن القلوب
والنعم بالله
يمة كلبي محروك والكل يلومني
ومحد حاس بالنار البيه
هاي بنتي معقولة ماادير بالي عليها
يمة راح اموت اريد بنتي صار المغرب وهي ماكو
كأنما تقويت بأمي
كمت اعيط واصرخ بنتي اريد بنتي مرررام
امي تزلم بيه وتقرأ ايات قرانية علي
عمتي تلوم بيه
حمواتي ييبجن
صار نص الليل واحنة بس ندك ونلطم لا اكل ولاشرب
رجعوا عمي والولد خواني وقيصر
كالوا فرينة بغداد شبر شبر ماكو  فص ملح وذاب
وللحكاية بقيه اممصطفى