أنت قدري
الحلقه السابعه
وكان التعب قد نال منا جميعا فإستأذنت لأنام وصعد وليد مع جدي لغرفته وبعد عدة دقائق سمعت صوت نقاشهما عاليا فخرجت من غرفتي وإقتربت من غرفة جدي لأسمع مايدور فوجدت وليد يقول غاضبا:
-بس يا جدي إنت وعدتني هتساعدني في مشروع المستشفى دلوقتي جاي تقول مافيش سيوله إتصرف، أنا عملت حسابي على مساعدتك وإستلفت فلوس وكتبت شيكات وكده هاتسجن، طب إكتب بيت من البيوت بإسم بابا وأخد عليه قرض من البنك
-إنت عايز تورثني وأنا عايش؟؟لما اموت تبقوا تورثوني إنما طول ما أنا عايش ماحدش هياخد حاجه
-ياجدي أنا سمعت كلامك وإتجوزت زي ما طلبت مني ليه بقى بترجع في كلامك؟؟ إنت كده هتدمرني وتحطم مستقبلي، ليه مصمم تعاقبني لأن أبويا خرج عن طوعك؟؟أنا طاوعتك أهو بتعمل معايا كده ليه؟؟
-صدقني ما عنديش سيوله خالص، خلي أهل أمك يساعدوك
-لو كان معاهم ما كانوش إتأخروا عني ولا ذلوني زي ما بتعمل يا جدي عموما شكرا وهادور على حد تاني يدخل معانا شريك وهانفذ المشروع
دخلت حجرتي مسرعه حتى لايدرك أني إستمعت لما دار وبعد لحظات دخل غاضبا وصفع الباب والشرر يتطاير من عينيه وقال:
-جهزي نفسك عشان نمشي حالا
-ليه حصل إيه؟؟هتيجي معايا يالا على بيتنا
-حاضر بس اهدى وإحكيلي بالراحه إيه اللي حصل يمكن أقدر أساعدك
-جدي بيذلني بفلوسه عشان عارف إني محتاجها لتحقيق مشروع عمري الحلم اللي عشت طول عمري أحلم بيه ووعدني إنه هيموله دلوقتي بيقولي مافيش سيوله
-مشروع إيه؟؟
-مستشفى كبير للجراحه وهيكون فيه كل التخصصات بس قلنا نبتدي بالقلب والمخ والأعصاب وهنعمل فيه يوم مجاني للفقراولما نكبر نفتح فروع أكبر لكن خلاص الحلم ضاع بسبب عند جدي
-المشروع ده هو اللي خلاك تتجوزني عشان ينفذهولك؟؟
نظر إلي للحظات ثم قال:- أه
-وليه مافكرتش تهدده بطلاقي لو مانفذش؟؟
-إنتي مجنونه؟؟ إنتي بنت عمي لو طلقتك واحنا ما كملناش شهر تتفضحي، وبعدين مش أنا الراجل اللي يستغل مراته و يساوم عليها
-ما جدي ساومك قبل كده ووافقت
-كنتي مجرد بنت عمي وأنا أصلا مش مرتبط بحد وطالما فكرة الجواز مطروحه يبقى إنت أقرب لي من أي واحده غريبه على الأقل إنت من دمي ،وقلت يمكن الجوازه دي تصلح العلاقه بين والدي وجدي وبرضه هاستفيد منها لكن دلوقتي إنتي مراتي يعني أنا وإنتي شخص واحد فمستحيل أساوم عليكي مهما كانت العلاقه بينا شكلها إيه، إنت كمان ضحيه لجبروت جدي وتحكمه، جوازنا ده قدر وأنا رضيت بيه لكن ربنا مايرضاش باللي بيعمله جدي ده.
نظرت إليه متعجبه وقلت:
-إنت حقيقي بتعتبرني مراتك يعني أنا وإنت شخص واحد؟؟أمال أذيتني ليه؟؟
-دي وزة شيطان وإنتي إستفزيتينيي أوي بكلامك وحسستيني إني مش راجل وأنا عمري ما إتعاملت مع بنات ولا أعرف المفروض في موقف زي ده أعمل إيه وكمان طبيعة حياتي خليتني عصبي وباغضب بسرعه وده غلط، أنا أسف سا محيني وأوعدك مش هتتكرر تاني
بكيت لأني تذكرت الإهانه التي تعرضت لها ووضعت يدي على خدي مكان صفعته التي صفعت قلبي قبل وجنتي،فقام من مكانه وقبل رأسي فمسحت دموعي وقلت:
-خلينا ننام والصبح ربنا يحلها من عنده بلاش نسافر وإنت متنرفز كده
-طيب زي ماتحبي تصبحي على خير
إستيقظت عند أذان الفجر فقمت لأتوضأ فوجدت وليد يصلي ويدعو وهو ساجد ويقول يارب حلها من عندك، توضأت وطلبت منه أن يصلي بي جماعه، فصلينا وبعد الصلاه قلت له:
-إسمع أنا عندي حل أنا كان ليه عند أخوالي ورث لأمي من أمها وهم صمموا ماتاخدوش أرض ولا بيوت إنما تاخده مال لكن جدي إعترض وهم قالوا لي الفلوس موجوده وقت ماتعوزيها تعالي خديها إيه رأيك نروح لهم ونجرب؟؟ ولو مارضيوش عندي حل تاني بس خلينا نجرب ده الأول
-معقول؟؟هتقفي جنبي بعد اللي عملته معاكي؟؟ أنا إفتكرت إنك هتستغلي الموقف لصالحك وتقفي ضدي أو تشمتي فيه او تستغلي الفرصه وتطلبي الطلاق
-إنت إعتذرت وأنا قبلت وزي ماقلت ده قدرنا ولازم نرضى بيه، يالا خلينا نمشي قبل جدي ما يصحى
ذهبنا إلى بلدة أخوالي وكانت قريبه وسألنا على بيت خالي العمده وذهبنا له ، عرفته بنفسي وبوليد ففرح كثيرا ورحب بنا وقال:
-على عيني يا بنتي ما أحضرش فرحك ده إنتي بنت الغاليه لكن جدك الله يسامحه بقى
-أنا عارفه يا خالي ومقدره الظروف ومش زعلانه منكم إنتوا أهلي برضه والضفر ما يطلعش من اللحم بس أنا جايه لك في موضوع الورث بتاع أمي اللي وعدتني بيه
-وأنا عند وعدي حق أمك في البنك هو وأرباحه عايزاه إمتى ؟؟
-النهارده قبل بكره
-خلاص ده شيك بالمبلغ وأرباحه إسحبيه وقت ما تحبي
كتب الشيك وسلمه لي فقبلت يده وشكرته وهممنا بالإنصراف فقال:
-والله ماتمشوا قبل الغدا والعيله كلها تيجي تسلم عليكم
قضينا اليوم مع خالي والعائله وسط تبادل التهاني والتعارف على أهلي الذين انقطعوا عني بسبب خلافات ماليه لا شأن لي بها، حان وقت الإنصراف و قال لي خالي:
-لو إحتجتي أي حاجه كلميني أجيلك على طول، ثم همس قائلا: شكل جوزك راجل محترم ربنا يسعدك يا بنتي
-متشكرة أوي يا خالي
عدنا للبيت وقلت لوليد:
-أنا هادخل معاكم شريك بفلوسي وبما إني محاسبه فأنا اللي هامسك حسابات المشروع كله، بس قبل كل ده لازم أقعد مع الشركا الباقيين وأشوف دراسة الجدوى ونتكلم في كل حاجه ويكون بيننا عقد مكتوب
-إيه ده كله إنتي بيزنس وومن وأنا مش عارف؟؟
-دي فرصتي عشان ألاقي شغل يملا فراغي في تخصصي منها أراعي مالنا ومنها أشتغل مع ناس إنت عارفهم ومطمن لهم
-لو دي رغبتك ماعنديش مانع، من بكره نتفق على ميعاد ونتقابل ونتكلم في كل التفاصيل شركائي أعز صديقين عندي وعشرة عمري من أول سنه كليه.
نجلاء لطفي
