TELEFON (papiamentu)

#1 TILLING TILLING

Miéntras solo ta baha su último rayo nan ta karisia e paisahe. E paranan ta hasiendo nan último vuelo di e dia ku a yega su fin direkshon pa nan nèshi. E asfalt pretu di kaya ta parsialmente muha I ta bria manera un spil dor di e gota nan di awa ku a kai algun ratu pasa. Ya kaba bo por tende poko kriki ku ta yenando e silensio di anochi ku nan kansion. E lusnan di kaya ta knipper sende

Vroom- un Honda Civic kòrá ta kore pasa riba un velosidat haltu, kitando e rùst ku e anochi hóben ta trese kuné. Den e vehíkulo tin un pareha ku ta konsistí di un hòmber I un dama.

E hòmber ta tras di stür I e dama sinta den su banda ta wak pafó mirando e mesun kosnan pa di 100 biaha ora e ta riba e ruta aki kaminda pa kas. Tur dos ta ketu ketu sin ta papia, e radio ta sende pero na un volúmen abou ku bo no por saka afó ta kua kantika ta tokando. E momento pasífiko aki ta wòrdu interumpí pa e tilling tilling di e telefon ku ta den e hòmber su saku di kamisa.

Tilling tilling tilling...un rosea grandi di e dama..dos tres tilling mas.

Nan ta para den lus di tráfiko I e guy ta saka su telefon unlock e, type i smile. Apénas e ta buta e telefon bek den su saku e telefon ta zona atrobe. E dama no por kontené su angustia mas I ta grita rabia" kasi sigur ta e putanan ku bo ta hode kuné ta message bo atrobe".

E hòmber tambe su tono ta kambia "Den tonto....bo no ta kansa? "

E diskushon ta sigui intensifiká"Kansa kiko? Ki dia bo ta respetá mi? Tur kos mi ta hasi p'abo I wak kon bo ta tratami. "e dama ta bisa ku un stèm ku ta birando mas emoshonal kada sekònde.

"agt hòmbu tur be bo ta bini ku bo ko'i kèns nan basta ku payasada, nada un tin "

E lus ta kambia I e tráfiko ta sigui. E hòmber ta saka e telefon bou di kareda unlock e. Su atenshon aworakí ta parti entre e kaminda i su telefon ku e ta bezig kuné.

E dama ku ainda ta serka di eksplotá di rabia "TUR ORA BO TA BISA NO TIN NADA."

Diripiente e ta sinti manera un koriente a pasa den dje i e no por kontené su furia mas I ta ranka e telefon for di e hòmber su man. '' MALDISHONA BO TELEFON. I FUCK BO''

E hòmber a sinti manera ta ranka nan a ranka su kurason saka for di den su kurpa. I ta rèk man pa por tuma kontròl di su poseshon bek. Den su eksitashon su pia ta primi tròt hisa velosidat. Su konsentrashon ta kompletu pa ranka e telefon awor i no riba kaya mas.

SILENSIO

Un fiesta di lus kòrá I blou ta iluminá un suela dòrná ku heru machiká I glas kibra. Vários Polis presente na e sitio di aksidente. Nan ta kana rònt di un pròp kòrá ku ta simbolisá loke tabata un outo djis par di ora pasa. E Ambulans ya kaba a bandoná e sitio indikando ku e personanan ku tabata envolví den e aksidente ya no ta na bida. E vehíkulo ku nunka no ta trese alegria ta presente. E Wa,I Morto di El tributo. E lo tin e deber di transportá e kurpanan sin bida di e hòmber I e dama ku algun ora pasa tabata diskutiendo riba kosnan di bida sin sa ku enbèrdat e suseso aki lo kosta nan bida.

Agente nan Polisial ta hasi nan máksimo esfuerso pa por sigui guia e tráfiko ku ta slow kasi para ketu ketu pa wak kiko ta pasando. Hopi ta esnan ku ta slow pa wak si kisas ta un famia òf ta hende ku nan konosé. Tambe tin esnan ku ta un tiki bijgelovig i ta djis wak ki number e out ku a aksidenta tin pa nan por purba nan suerte den wega di number aki ratu.

Kisas un su desgrasia por bira un otro su grasia?

E momentu ta tenso. E airu di anochi ku normalmente ta friu i fresku anochi diripiente ta parse pisa dor di e vèrdrit ku ta zueif . E lusnan ku normal ta lusa kaminda manera un solo awor ta parse manera un bela ku ta pagando. Apénas e ta sufisiente pa iluminá e skuridat.

Un di e agente nan ta saka su telefon ''Bon dia nos mester di un kran na altura di Promenade banda di Hot Pepper.''

SAKA RATON

Poko dia despues.

Un persona adikto na droga ta kanando riba kaya. Solo ta kima I pika manera ta míles di vruminga ta mordiendo su kueru. E pober no por ni pensa na drechi, e gana di droga I hamber ta básikamente úniko kosnan ku e por pensa riba dje. Su kabes ta sinti asina pisa ku e ta kana wak abou so. Den su desesperashon e ta kana pasa tur PIN outomat wak ku niun hende por a lubidá sèn atras pa e por sasia e hamber di alimento I droga ku e tin. E a kaba di kana check na e ATM na Tony Romas.

''NADA NADA shit..hamberrr''

E ta sigui kana I un di e funshon nan mas primitivo natural ta interumpié, PISHI.

Ku tempu hinter Kòrsou a bira básikamente su kas I su wc ta naturalmente tur kaminda. E ta bira pishi na e mata nan ku tin na Citco Bank. E alivio ku e ta sinti pishiendo ta kasi mesun dushi ku e droga ku e sa tin kustumber di uza. Pa 2 sekònde e ta lubidá hasta ku e tin hamber. Su kabes ta hasta sinti ménos pisa ku e por his'é porfin i wak su dilanti.

''ki e kos ku ta lombra ei ta? Por ta un oloshi plata? Un djamanta? Porfabor si ta algu ku mi por haña sèn pe mi ta hura ku mi lo legumai e droga ei, please papa dios please.''

Ora e drogadikto yegá serka e ta mira ku e ta un telefon. Djis banda di e telefon e hañá e tapa i e bateria tambe tirá , e Simcard si e no ta mira.

E telefon ta sende sin problema pa su sorpresa ora e purba sende.