TELEFON (papiamentu)

#4 TA HOLE BON

Porfin e dia di BBQ a yega. No tin ni un nubia na shelu dunando bo e konfiansa ku esaki lo bira un bunita dia. Solo ta bria i un bientu dushi ta supla. Deja ta entusiasmá i nervioso alabes ta bisa Dave '' hala e stul mas einan, no but'é aki tòg aki banda, kuidou ku e paña di mesa.''

Dave ta kana bini Deja su direkshon bras'é i bis'é ''dushi tur kos ta perfekto mesun kos ku abo, kalma bo mes. Mi tin sigur ku tur hende lo bini pa abo i nan lo no wòri si nan bebe djis awa'' . I dun'é un sunchi pashonal te ku su rudia nan ta bira suak.

un pitu di outo un Kia Picanto ku bo ta mira ta klaramente di hür ta yega para dilanti porta di kas, interumpiendo e momentu di amor ku Dave i Deja ta eksperensiando. Nan dos ta bira wak i mira dos hende den outo.

Bianca ta bula baha i ta hariendo di orea pa orea man den laria i bisa '' haalloooooooooooo"

Deja ta saka un kareda kore bai brasa Bianca " spreek je nog papiamentu meid"

Bianca ta hari inkómodo i bis'é "een beetje poko hoor"

Nan ta brasa otro un biaha mas. E abraso ta asina fuerte ku nan ta sinti otro su kurason ta bati. Niun di dos no por konten'é nan mes i lágrima di felisidat ta kore for di nan wowo. Porfin nan ta laga otro bai for di e brasa ku ta a sinti manera un eternidat.

Bianca ta tuma e oportunidat pa introdusí e persona ku tabata kuné den outo. '' esaki ta mi frei Martin.''

Deja amabelmente ta brasa Martin dun'é tres sunchi na kada banda di kara i bis'é '' porfin mi a sera konosí kubo, mi a tende asina tantu historia di bo ku kasi kasi mi ta sinti manera mi konosébu años.''

Martin tambe ta smile i kontesta '' mi por bisa mesun kos, ta un plaser porfin sera konosí ku abo tambe.''

Bianca ku Dave tambe ta brasa otro i interkambiá palabra. I despues Dave ta duna Martin man i bis'é ' hopi ratu pasa, kuantu tempu a pasa e tabata? 10 aña? 11?''

Bianca ku Deja tur dos ta wak otro sorprendí i bisa pareu '' bosnan konosé otro?''

'' si nos a bai skol huntu na UNA. Despues di skol nos no tabatin masha kontakto mas. Tende ma tende ku e a bai Hulanda i pa kasualidat awor e ta frei Bianca. Mundu ta chikitu.'' Dave ta splika.

Martin Hoffman - Meskos ku Dave e tambe tin afiliashon ku kòmpiuter aunke e ta mas den e parti finansiero ku tin di haber ku teknologia. E no sa papia hopi I ta gusta warda tur kos pa su mes. E ta kolo kla di desendensia Hulandes. E a nanse na Hulanda pero a biba gran parti na Kòrsou pa despues bai biba I traha na Hulanda bek.

Manera un temblor. Pero no, ta djis e zonido duru ku e motor di e trùk ku Chris ta kore. E ta yega parker su trùk banda di e Picanto ku ta parse un ko'i hunga banda di dje i bula baha. E ta hari miéntras e ta kana bini i duna Bianca un abraso grandi manera un Oso i his'é den laria. Bianca ta grita di alegria i bras'é bek duru.

Chris despues ta laga bai i ekstendé su man ''mi ta suponé abo ta Martin''.

Martin ta dun'é man bek i sakudí kabes mustrando e ku en bèrdat e ta korekto. Chris ta duna Dave tambe man i brasa Deja.

''Bo ta lat manera semper'' Deja ta bis'é chèrchandó.

''No no tabatin hopi tráfiko D no ta mi falta''

Basta di gaña CHRISTOPHER. Tráfiko riba Djadumingu? . Deja ta grit'é miéntras e ta klap e na su man.

Hinter e grupo ta hari i nan ta bai paden.

Músika den background ,diferente persona hariendo i pasando bon. Holó di karni hasando riba BBQ . Zonido di eis moviendo rònt den glas ku kos di bebe. Diripiente e telefon di Chris ta rin. Deja rabia ta bisa ku un tono firme''no apsolutamente ku no bo no ta kué. De mano tur hende buta nan telefon riba mesa. Nos ta gosando huntu i nada lo no interumpí e dia aki.''

Tur hende ta kumpli ku e deseonan di Deja i saka nan telefon but'é na silent i bola nan tur huntu manera un toren riba e mesa. E dia ta sigui bai alegre te ku nochi ta sera.

Bianca ta atmití kon dushi e ta pasando i e no ke dia kaba. ''Mi lo tin gana pa nos hasi mas kos huntu promé mi mester bai bek.''

Chris ta haña un idea'' mi ta renobando un wikènthùis na Westpunt kantu di awa. E ta práktikamente kla. Mi tin e yabi. Mi tin bon kontakto ku e doño mi ta 100% sigur ku e lo no wòri ku mi fi'é un wikènt. Lo mi bis'é pa e deskont'é for di e trabou nan ku e debemi.

E grupo eksitá i kontentu ta bisa si lo ta algu hopi agradabel bon idea. Pero na e mesun rosea nan tur babuká ta kuminsá puntra unda? Westpunt na unda?.

Pa evitá ku nos ta brua mi ta hür un bus lag'é baha nos einan i bin buska nos bek despues. Chris ta komentá miéntras e ta wak rònt.

Deja ku ta sinta banda di Chris ta klòp riba su kabes i bisé '' ooh e kabes grandi ei ta sirbi pa algu tòg''

Tur hende na harimentu. Despues di hopi historianan alegre i interkambio di chiste i rekuerdonan agradabel e enkuentro a terminá.

BUSJE KOMT ZO

Un siman despues.

Tur hende un biaha mas a reunié na kas di Dave I Deja e siguiente wikènt pa warda e bus ku lo hiba nan Banda Bou kaminda nan lo pasa 3 dia huntu. Nan ta hinka outo paden den kura i para na porta warda e Van ku lo hiba nan Westpunt. Pa nan sorpresa asina un konvoi grandi ta presentá. Tur hende ta bira wak Chris stail di WTF.

Deja ku nunka no por stòp di molestiá Chris '' serio serio bo a wak asina un konvoi pa 5 hende ?''.

Chris ta kontest'é ''bo sa di mi tòg? Ora mi hasi algu mi ta hasié bon''

Bianca ta hari i bisa ''ménos kushina, BBQ so bo por BBQ. Lastu biaha kubo a purba traha te mes ba kima e awa''

''E ta bon asina, boso drenta pa nos bai, nos ta lat kaba.'' Chris ta bisa ku bèrgwensa i alabes hariendo.

Tur hende ta hari drenta bus. Una bes paden nan tur ta kuminda e shofùr i bai sinta patras. Bianca ku Martin tur dos ta sinta wak pafó yen atmirashon. Nan tin un ratu sin bini Kòrsou i ta gosando tur tur di e paisahe. Algu ta hala nan atenshon i Martin ta puntra '' Dikon tur e palu nan ta kibrá riba alsera asina? Ki a pasa?

Dave ta bira wak nan direkshon '' par di tempu pasa mas o ménos un luna pa dos tabatin un aksidente aki nan. Un pareha a pèrdè kontròl di nan outo i a aksidenta. Lástimamente tur dos a fayesé.''

Un silensio ta reina den e konvoi. Esaki ta wòrdu brutalmente kòrta pa tur su telefon ku ta hasi un zonido manera ta un mensahe a drenta. Nan tur ta kue e telefon wak. Pero tur e telefon nan no ta mustra nada. Nan tur ta wak otro ku un kara di huh? Pero no ta wòri mas i sigui kombersá wak pafó en ruta pa nan destinashon.

Bianca ta bira bisa Chris ''No tumami na malu pero mi ta sintimi un tiki inkómodo ku abo so ta sin pareha kiko a pasa ku kon yama e mucha aya atrobe?''

Chris ta bira wak den su direkshon I bisa ''no mi no ke papia di e tópiko.''

Deja manera semper no por keda ketu i ta bisa ''e bitch aya bo lo kemen. Mi sanger ta kushi djis pensando riba dje..grrrrrrr''

Dave ta purba plakia e situashon ''Dikon bo ta yama e dama bitch, mester tin un splikashon tòg?''

Deja ya kaba eksitá ta bisa ''Paso e ta un bitch. Si e ta kana manera un bitch, papia manera un bitch, aktua manera un bitch e ta un bitch. Yama e kos na su nòmber.'' I e ku Bianca ta high five.

Martin ta bisa ''wèl e berdadero definishon di un bitch ta un muhé ku a drumi ku tur bo bròder nan ménos ku abo...esei ta un bitch mes mes haha òf no hermanos?

Chris ku Dave tur dos ta hari kuné.

Bianca ku Deja si ta krusa man demostrando ku pa nan si e joke aki no ta niun tiki prèt.

Bianca ta bolbe puntra Chris ''pero ki a pasa anto eigenlijk?''

Chris ta bis'é " lo mi kontabu tur kos pero laga nos focus riba e wikènt aki so. Ban riba kosnan positivo so nada ku negativismo.''