TELEFON (papiamentu)

#3 UN FABOR POR FABOR

Chris ta yega kas habri garashi parker su trùk i kué kuminda basha pa e kachónan. E ta drenta paden den kas bai dirèkt den baño kita paña i ba baña. E ta para bou di douche i e ta sinti kon kada gota di awa ta laba su kansansio bai kuné. E ta sali seka i benta su kurpa riba kama. E ta rèk kué e telefon ku Blo Blo a dun'é I sende. E ta mira ku e telefon ta sende i ku e tin un lòk riba dje. E ta saka e Simcard di su telefon hoga i hink'é den esun aki. E ta pensa ''djaluna mi lo wak un nobo pero mi mester di unu wikènt aki. Hey Warda Deja.'' E ta bòltu riba kama kue e telefon di kas ku tin riba e nachtkastje i primi e number.

Na e otro banda di liña un stèm di un dama alegre ta kue e telefon ''hallo bonochi''

''AHORAAAA BON NOCHI Dejaaaaaa? Konta ku e dushi bida?''

''no dushi manera esun di bo...Chris'' Deja ta kontesta sarkástiko.

''ken a bisabu mi bida ta dushi? D''

''asina bo tin tempu pa bèl kansami bo tin dushi bida !''

''hahah e ta bon D ba gana... Tende aki: mi telefon a pasa pa un mihó bida I mi a wak un nobo.''

''oh tende aya tras shon tin sèn.'' Deja ta bisa ku un tono kaminda bo por imaginá e smile ku e lo tin riba su kara

''Bo sa tòg? Pero No, ta un ko barata ku Blo Blo a dunami, pero e ta di lòk..Biaha pasa Dave a yudami ku esun ku a daña puntr'é p'ami ora bo haña un chèns si e por feks e p'ami.''

Deja sakudiendo kabes ta puntra '' Anto dikon bo mes no ta bèl e meneertje?''

Chris ku a haña un oportunidat perfekto pa insultá Deja ta respondé : '' paso mi a pèrdè mi telefon i tur number sabi..i dor ku mi stimabu asina tantu mi ta kòrdá bo number for di kabes''.

Deja hariendo: ''Stima ki krou...bai yu. Pa kasualidat Dave ta na kas, warda un ratu mi .''

Chris ta tende na telefon kon Deja ta puntra Dave den background.

"hey Dushi Chris ta puntra si bo lo por yud'é drecha òf ta unlock un telefon pe.''

E ta sigui skucha i tende e stèm di Dave ta bisa ''si si klaro ki dia e ta pasa?''

Promé ku Deja por bisa algu na telefon Chris a bis'é ''mi por bini awe mes si e por.''

Deja ku no a pèrd'é pa gana : ''ooh bo ta ònbeskòp. Bo no sa ku ta mal manera tende hende su kombersashon? ''

''Ta kon ta hasi keda sin tende ku e stèm di bo ey? Lo bo lanta hasta morto.'' Chris ta bisa

'' No mòrs ba tende?'' CHRISTOPHER.

Chris ta bolbe tende kon Deja ta puntra Dave den background si e por awe i kon Dave ta kontesta ku awe lo no ta un problema i ku e lo por pasa libremente.

Deja ta bini telefon bek i ta bisa'' mirando ku bo lo a hasi ònbeskòp tende kaba. Bo por pasa numa i no bini man bashí sinbèrgwensa, trese ko'i smak.''

''Hahah lo mi trese mi mes...anto ta ami ta sinbèrgwensa? Tende ken ta pidi i ta ami ta sinbèrgwensa... ban serio D''

''CHEEEE, bo no sa ku mi ta na diet Chris. Mi no ta kome karni porko''

Chris ku awó si no tin un come back pa e palabra nan aki ta bisa ''ayoooo D te aki ratu''

Dejanira Martina – Streden ta un dama sumamente alegre inteligente i ku un boka skerpi. E gusta diskutí i no ta tímido pa kompartí su opinion. E ta sumamente bunita ku un kolo di kueru hopi skur. Su sonrisa ta asina agradabel ku e lo por iluminá kualke persona su dia. Kabei largu natural di vlègtu gueni. Su estatura ta kòrtiku pero diki. Na bon Papiamentu bon bala.

David-John Streden – Hopi inteligente bon siña i versá den tur loke tin di haber ku teknologia. Un hòmber ku tipo, loke bo ta yama un metroseksual semper bon bisti i kuida. E ta hasi su esfuerso pa tene su kurpa den kondishon i ta bishita gym de bes en kuando. Su focus ta unu di águila. Ora e hinka algu den su kabes e lo hasi todo por todo pa logr'é. E tin un postura normal. Kolo di kueru habri i kabei fini nechi peña ku gel semper.

LONGTIME NO SEE

Chris ta yega kas di Deja ku Dave. Nèt Dave ta den kushina I e ta hisa man pa Chris I habri e porta di kura elektróniko pa e drenta. Chris ta hasi seña ku Dave pa e keda ketu I e ta pasa slùip di porta patras. E ta drenta poko poko. Deja ta para ku lomba ta papia ku Dave. Ma kere ma tende e porta a zona. Mi a kere ta Chris a yega. Nèt e momentu ei Chris ta bula bras'é spant'é. Deja ta spanta I grita. E ta bira dal Chris poko moketa riba su chest I bis'é bo tin ku ''stòp ku e ko'i Chonbong nai..bo ta basta grandiii''.

Nan tur ta kompartí e momentu di euphoria aki huntu pa despues Chris duna Dave e telefon. Nan dos huntu ta kana bai e kamber kaminda e kòmpiuter nan ta. Dave ta pega e telefon na e kòmpiuter i splika Chris: ''e telefon ta di lòk. Mi por unlock e pero lo mi tin ku delete tur kos for di djes si. Lo bo pèrdè tur kos ta di save ariba.''

''Dal bai numa Dave, delete tur kos e no ta di mi tòg.''

Chris ta sali bai for di e kamber kaminda Dave ta i bai den sala. Den sala tin vários potrèt kologá na muraya. Apesar di a wak nan mil i un biaha nan ta keda un bunita bista i dushi rekuerdonan kada bes ku Chris bini di bishita. E centerpiece di tur e potrèt nan ta e potrèt di e matrimonio entre Dave ku Deja. E sonrisa ku tur dos tin riba e potrèt i kon nan ta brasa ta otro ta sin igual. Sigur un bunita pareha. Djis banda di e potrèt ei tin unu mas ku semper lo keda bunita pa Chris.

Chris ta keda di lòk riba e pòtrèt. E potrèt ta unu di Chris, Deja ku Bianca brasa despues ku nan a kaba di gradua Havo temporada nan tabata mas hóben. Deja ku ta sinta den stul sinta ta wak Netlfix ta ripara esaki i lanta kana bin para banda di Chris i wak e potrèt e tambe. Bo ta mira ku e potrèt aki ta nifiká hopi pa nan sin mester deskribié ku palabra. Chris ta bira wak Deja i bisa ku un tono kalmu i amabel'' Bianca a keda di bini otro siman di Hulanda tòg? Ban sòru pa nos hasi algu leuk. E Crew ta bek.''

''Sigur sigur pero AMI manera semper ta master'' Deja ta bisa ku un tono di superioridat ''Mi a planeá un BBQ kaba pa asina e yega wikènt. I WAK pa bo no mester yega lat manera semper.''

Chris ta keda hari so. Deja ta saka su telefon I bisa Chris ''hey mi tin algu di mustrabu riba e telefon aki.'' E ta buta un video i bisa Chris wak e.

E video ta kuminsá ku un kantika suave tokando.. i bista riba un kaminda solitario. Un teksto ta aparesé riba e pantaya bisando bo si bo tende e kantika ku konsentrashon lo bo mira e letra nan aparesé riba e kaminda. Chris ta legumai tur kos i focus riba e pantaya pa e wak si enbèrdat e por mira e letra nan. Tur su atenshon ta riba e kaminda i e muzik ku ta zonando. BOOOM un kara di karpachi ta bula sali spant'é. E ta hala e telefon for di kara i hala rosea aden di spantu.

Deja ta grita hari i bisa Chris. '' drechi p'abo esei ta bo pago paso bo a spantami''

Chris ku ya kaba a lubidá e spantu i ta hariendo ta bisa Deja '' den krili bo mes muhé''

Bianca Smeets ta un dama hopi ketu. E ta gusta analisá tur situashon promé e aktua. Pero no laga su aktitut pasivo kere ku e ta mansu. Bou di e kapa di inosensia ey tin un diabel. E ta manera un modelo. Kolo kla kabei blond i haltu. Semper e tabata kreativo ku pintamentu i fèrfmentu.