#بنت_عمي
الفصل الثالث
الدكتور .. اطمنو كسر بسيط في اليد والباقي كله كدمات تخف مع الوقت
انا.. الحمدلله
معتز .. بتجبسوها صح
الدكتور .. لازم بس مش حيطول ممكن اسبوعين بس وتحوله
انا.. تمام شكرا يا دكتور
الدكتور .. هذا واجبي وحنطلع معاكم للجبس بيش يجبسوها وهيا راقدة
وفعلا كرينا الباريلا اللي راقدة عليها ومشينا بيها للجبس وجبسو ايدها وكتب ليها الدكتور على مرهم للكدمات ومسكن للوجع ورجعنا للحوش وماحد فينا غفا دقيقة ودارت لينا اسماء قهوة
معتز .. انا بنطلع تو الساعة 9 يادوب نغير دبشي ونحكي لباتي الموضوع على السريع ونطلع نكملك الاوراق
اسماء.. اوراق شنو
معتز .. اوراق سفركم لمصر
اسماء .. كيف بنسافرو وكيان بالوضع هذا
معتز .. احمد تو يفهمك هيا سلام
انا واسماء.. سلام
اسماء.. فهمني يا احمد
حكيت لاسماء كل شئ مخطط ليه وبنديره وماسحبتش كيان واعية وسمعت حديثنا كله
كيان بصوت واطي .. صباح الخير
جيناها بسرعة سندناها .. صباح النور
اسماء.. كيف حالك يمي تو
كيان .. من الله الحمدلله
انا.. تحسي في حاجة كانو حاجة توجع فيك
كيان بابتسامة خفيفة .. كل حاجة توجع في يا بابي
انا قمعزتها وخذيتها لحضني .. سلامتك ياروح بابك
اسماء.. انديرلك حاجة تاكليها يمي
كيان .. والله ماعندي نية لكن كباية حليب دافية من يديك وكاشيك عسل مانقولش لا
اسماء.. حاضر ياقلبي
على وعيت عبدالله .. حتى نا نبي
اسماء.. وين صباح الخير قبل
عبدالله .. صباح الخير كلكم وبعدها انتبه لكيان وجاها يجري وحضنها
انا.. بشوي عبدو على اختك مريضة
كيان .. عادي يا بابي هو ماهوش قوي
عبدالله حط ايده على وجه كيان .. كنك كانو من ضربك هكي
كيان بدموع .. لا طحت يا عبدو
عبدو .. لا شكل حد ضاربك تو قوليلي نعدي نضربه
انا.. لا يا عبدو وخيتك طاحت بس
عبدو .. به عمو رواد وين وليش مش معاك مش انتي على اساس عروسته وبتقعدي عنده مش اول امس هكي قلتي ليا لما مشيتي معاه
كيان معرفتش شنو تقول ولا انا لكن جتنا المنقدة
اسماء.. حبيبي انت ليش ماتكملش في اوس ولد جيرانا
عبدو بلفت وجه .. زعلان منه
اسماء.. حتى كيان هكي زعلانة هيا وعمو رواد وبتقعد معانا
عبدو .. احسن اصلا انا مانبيهاش تمشي وتسيبني ونقعد بروحي
كيان بدموع .. خلاص يا حبي نا معاك ديمة مش حنسيبك
عبدو يمسح في دموع كيان .. خلاص كانو بلاش دموع وقعد يبكي
حضناته كيان وقعدو يبكو واسماء شيرت ليا بمعنى خليهم وعدت دارت الحليب اللي كيان من لما هيا صغيرة مخرومة بيه وعبدالله طلع زيها لدرجة كان الحقير رواد يقوللها حنجيبلك بقرة ونحطها لك في السور عشان ديمة تلقي حليب كانو كانت ماتحبش لاتشرب قهوة ولا كابتشينو ولا نسكافيه ولاشاهي حمرا الحاجة الوحيدة اللي تحبها شاهي خضرا او هوت شوكلت او حليب دافي مع كاشيك عسل ومرات اضيف في رشة قرفة او زنجبيل
كيان انسانة هادية بطبيعتها وماعندهاش صاحبات قراب واجد لكن بنات عماتنا يعتبرن صاحبتها بس وآية اخت رواد لان بطبيعتها ماتحبش تخالط واجد لانها ديمة تخاف من الخسارة وماحد يلومها بعد عيلتنا كلها خسرانها في يوم واحد وبعد ماشربت الحليب هي وعبدالله هدت شوي
أنت تقرأ
( سلسلة أقرباء ولكن) الجزء الاول بعنوان بنت عمي
Kurzgeschichten#بنت_عمي كل علاقة ليها عمقها واخطائها وحسناتها وحتى حزنها وفرحها لكن علاقتي ببنت عمي علاقة من نوع ثاني مانقدرش نعطي ليها اي اسم او اني نقدر نعطيها وصف يناسبها.... #حياة
