#بنت_عمي
الفصل الرابع
معتز باستغراب ..كيف
انا بهدوء.. كيان ماتعرفش الا رواد وماحبتش غيره واللي صادمها تو نحس فيه ردت فعل رواد علي صار بينهم وانها كيف بتكمل حياتها من غيره
معتز .. يعني انت ماتتمناش ان يطلقها
انا.. بالعكس
معتز .. ااااايه عاد لخبطتني
انا.. لما يطلقها تو ويرجع ليها بعدين تكون هيا سامحته ونست جرحها وهو عرف كبر غلطه وجرب شعور بعدها عليه
رواد
نشوف في ضنا عمتها معبين الحوش ومعاها ضنا عم معتز حتى هما واقاربهم من طرابلس نوقف بالك على امل انهم يسيبو الحوش شوي بيش نلقى فرصة نشو كياني
اه يا كياني شنو درت فيك بايديا ضيعتك لا هيا ماضاعتش مني انا نبيها وطول عمري ماحبيت غيرها لكن اللي حارقني انها مسكرة كل شئ من وسائل التواصل على النت وهاتفها مقفل طول الوقت وسرحت ونا نفكر في اليوم اللي روحت من الجامعة بعد ماكملت امتحاناتي وحكي ليا ايمن قصتهم وهيا جارتنا لكن نحن في بداية الشارع وهيا في نهايته وتاثرت واجد بقصتهم وكيف كانت هادية وخاشة في بعضها كان وقتها صيف بعد ماكملت ثالثة اعداي عمرها 14 سنة واني عشرين سنة ثانية جامعة و لفتت انتباهي بشكلها الهادي واللقاء الاول بينا اللي كان يعتبر عادي ورغم انها ماتحطش في شئ على وجهها ولبسها طول الوقت الغامق الالوان لكن كانت ديمة في نظري زي الملاك كياني بشكلها رغم ان جمالها بسيط عيون بنية متوسطة ورموش كثيفات وبشرة قمحية فاتحة وطول متوسط رغم ان احمد واسماء طوال وحتى عبدو رغم صغر سنه باين انه بيطلع طويل لكن جسم قمة الرشاقة مليان في المناطق الصح وشعرها وقتها مانعرفش شنو لونه او شكله وعلى قد ماحاوالت ماعرفت نين انقريت الفاتحة وتمت حلالي عرفت ان لون شعرها اسود سواد الليل ورطبة لكن كثيفة وطويلة لخصرها وملوية زي مريام فارس واحلى اخرى كيف سحرتني وكيف تلعقت بيها ومن اول ماخشت للثانوي كلمت احمد عليها لكن قالي استنى نين تكمل الثانوية وحتى نتأكد من مشاعري وفعلا صبرت لاني متأكد من مشاعري ونا نحكي معاها باستمرار يعني كنا على علاقة كانت ماتخالطش في حد الا عيال عماتها وبناتهن وكنت انا من اخترق قوقعتها واحمد شجعني بالذات لما شاف تاثيري عليها وكيف بدت تطلع من حزنها وحتى لبسها تغيرت الوانه شوي مش واجد وحتى برغم ان جامعتي كانت في مدينة ثانية بحكم تخصصي الا اني عمري ماخليتها بروحها وديمة معاها اتصالات ونت ورسائل غير الزيارات لاني مانتحملش بلاها لدرجة جروبي اللي في الجامعة مسميني مجنون كيان بسبب غرابة اسمها اللي تقريبا مافيش الا هيا مسمية بيه نين ننصدم في الاخير براي امي الرافض رفض قاطع اني نتزوجها وكنت واتي ماناقصني شئ لاني من لما خشيت الجامعة ونا نشتغل ونقرا بيش كونت روحي والحمدلله شريت شقة بمساعدة باتي والباقي كملته بروحي ومع هذا شهادتي خذيتها بتقدير مرتفع وكنت بعد شهرين من زواجي بنسافر نا وياها لكندا بنحضر وتو مش عارف شنو بيصير وشنو يبي احمد او هيا بالزبط لانها ماعطتنيش فرصة ندافع او نبرر مع ان غلطي لا ليه تبرير ولا دفاع
انا.. سومة كيف حال كيان تو
اسماء بتنهيدة .. جسديا تقدر تقول بدت تتحسن لكن نفسيا مش عارفة يا احمد
انا.. ربي يهون عليها
اسماء.. تخيل انها تحكي وتضحك مع عبدو عادي ومع البنات كأن مافيش حاجة
انابتنهيدة.. عارف وخايف من ردت فعلها هذي
اسماء.. احكي معاها يا احمد انت عارف كيف هيا تفضفض ليك اكثر حتى مني
انا ..مع اني عارف مش حتكي جديد لكن حاضر مشكلتها لما نجي نحكي معاها تبدا تبكي ونا دموعها تحرق فيا
اسماء.. تحمل يا احمد لو انت تنهز نحن من بينا
وحضنت اسماء.. حاضر ياقلبي والله مارايح قوي الا عشانكن
عبدو.. بابي تبيك كانو
انا.. هيا جاي
عبدو .. بابي استنى
انا.. شنو
عبدو .. عطيني فلوس
انا.. في شنو تبيهم
عبدو .. بناخذ شوكلا لكانو عشان معاش في الثلاجة قضو عليها بنات جديتاتي (اللي هنا عماتي وبما انهن خوات جده فيقوللهن جداته )
انا بضحكة .. عيب ماتقولش هكي
عبدو بلوية فم .. شنو نكذب عليهن وهنا ياكلن (يقلد فيهن ) يمي شوكلا واللي تقول نموت في هذي نين كملنها وانت عارف ان كانو تحب الشوكلا واجد
انا بضحكة اكبر على عبدو وهو يعايب عليهن .. هاك وعدي جيب ليها واجد اخرى وكان لقيت عمك معتز عدي خوذ منه فلوس اخرى بيش تجيب واجد
اسماء.. عيب عليك يا احمد
انا .. خليه يتحمل شوي امنا عمها من فراغ
اسماء بضحكة وجع .. اما انت
انا..هيا بنعدي لكانو نشوفها
أنت تقرأ
( سلسلة أقرباء ولكن) الجزء الاول بعنوان بنت عمي
Short Story#بنت_عمي كل علاقة ليها عمقها واخطائها وحسناتها وحتى حزنها وفرحها لكن علاقتي ببنت عمي علاقة من نوع ثاني مانقدرش نعطي ليها اي اسم او اني نقدر نعطيها وصف يناسبها.... #حياة
