#بنت_عمي
الفصل التاسع عشر الماقبل الاخير
اسماء بعيطة .. الحقني يا احمد
جيتها نجري نا ومعتز اللي وقف مصدوم ومريم تتلوى ومعرفناش كنها وبسرعة فطنت لاني عارف رفيقي تو في دنيا ثانية
انا.. حطي يا سومة وشاح على راسها
اسماء.. به باه
وطلعت ولعت السيارة ومعتز في مكانه جامد ماتحركش وخشيت على عبدو وقلت ليه يدير باله من وتين
وطلعت ضربت معتز كف بقوتي بيش رجع من صدمته وبعيطة قلت ليه يطبها واسماء لبست وشاحها لانها مازالت بعبايتها وطلعنا بعد مامعتز طب مريم وهيا تعيط وعياطها خوفني حتى نا صح هيا في اخر اسبوع في السابع لكن عياطها يخوف خصوصا اني سئلتها ان عندها لية من الصبح او لا قالت لا ووصلنا المصحة واتصلو بدكتورتها اللي جت و قررت ولادة مبكرة ومعتز واقف غارق في خوفه ورعبه اللي بيقتله
انا.. معتز معتز سمي بالله
معتز بتنهيدة .. بسم الله الرحمن الرحيم
انا.. وخيي اقرا مايخطر على بالك من سور القرأن بيش تقدر تهرب من افكارك السودا وبأذن الله مايصير الا كل خير
معتز بهزة راس بمعنى باهي
وخليته بعيد عن مكان غرفة الولادة اللي قررت الدكتورة قيصري ونا وقعت بدل معتز لانه غارق في دوامته ويجاهد انه يطلع وبعد ممكن ساعة طلعت الدكتورة وطمنتنا على مريم وان هيا وولدها صحتهم كويسة وشوي تفيق من البنج ويدخلوها جناحها ومعتز مش مصدق ولما جابوها وشافها فاتحة عيونها نزلن دموعه بفرحة وضمها نين سمعنا انتها من ضغطه عليها
انا .. معتز اهدا مريم قيصري والده راه جرح العملية واعر اهدا ياخوي جابت على خير
مريم بصوت تاعب .. ولدي وين كويس ولدي
معتز .. بخير الحمدلله حتى جسمه كامل النمو الحمدلله وتو يجيوه لينا
على خشة الممرضة ادف في سرير البيي وطبعا كلنا اندهبت شيرتنا ما كلمناش حد لكن اسماء لما طمنتنا الدكتورة على مريم وولدها اتصلت بعمي محمد ومسك معتز ولده بين ايديه وقعد يبكي بصوت عالي ومريم دموعها دارو خطوط على وجهها على خشة عمي محمد وخوات معتز كلهن بين زغاريد وبين دموع فرح وشوي جو هل مريم وفرحت عمي ناصر وراحته ان اخيرا حتى بنته خذت نصيبها الكويس من الدنيا وقررو يسموه محمد وروحنا قريب مع الفجر وبعد حطيت اسماء خذيت الدبش اللي مجهزينه لي مريم ولي ولدها ورفعته للمصحة وروحت انريح عظامي شوي لكن النوم مجافيني فاقد كيان رغم فرحتي لمعتز وسيبنا معتز معاها اللي الحمدلله هدا والفرحة والبسمة شاقة وجه شق ان مرته وولده معاه واطمنت على عبدو و وتين انهم راقدين وماقدرتش نرقد فاقد كيان واجد وسومة حاسة بيا وماحاولتش تكلمني وتقريبا قضيت وقتي ونا نصلي واذن الفجر وصليته في الجامع ودعيت لربي يهون بعد كيان عليا ويسعدها
معتز براحة كبيرة واضحة وكأنه صغر عشر سنين .. حمدلله على سلامتك يا عمري
مريم .. الله يسلمك يا حبيبي كيف مر عليك الوقت
معتز بتنهيدة .. لولا احمد راه ممكن جتني جلطة او حاجة اخرى صارلتي
مريم .. كيف قدر عليك احمد وهو اكيد مالحقش يحطلك منوم
معتز بضحكة .. بالقرأن كل مايصبي احذاي يقولي اطلع من افكارك السودا بالقرأن اقرا اي سورة تخطر على بالك وكنت هكي لما تجي صورة وتين وهيا مكفنة وبحذاها ولدي نقرا ايات حافظهن وسور طوال وقصار نين نهدا وهكي نين طمنتا الدكتورة
مريم .. ربي يدوم الود والمحبة ومايفرق شئ بينكم
معتز براحة كبيرة .. امين يارب ... تعرفي (ان مصائب قوما عند قوما فؤادا)
مريم باستغراب .. كيف
معتز .. جيبتك واللي صارلك لهى احمد على بعد كيان عليه تعرفي قبل ماتعيط اسماء علينا كنت متوقع شوي واحمد يمشي لكيان
مريم .. صح حتى اسماء معاي نست بكاها على بعد كيان
معتز وهو يعدل في سرير مريم وفرده ليها وغطاها كويس ولم شعرها كويس وباس جبينها بحب .. هيا حبيبتي ارقدي اكيد تاعبة
مريم .. ماتعديش من احذاي
معتز بحب .. ونا نقدر نبعد عنك اهو قاعد بينك وبين ولدنا
ورقدت مريم من التعب ومعتز قاعد بين سرير مريم وولده وعينه مرة عليها ومرة عليه كأنه يبي يصدق انهم معاه وانهم مش حلم حيوعى منه وهو فاقدهم
أنت تقرأ
( سلسلة أقرباء ولكن) الجزء الاول بعنوان بنت عمي
Short Story#بنت_عمي كل علاقة ليها عمقها واخطائها وحسناتها وحتى حزنها وفرحها لكن علاقتي ببنت عمي علاقة من نوع ثاني مانقدرش نعطي ليها اي اسم او اني نقدر نعطيها وصف يناسبها.... #حياة
