#بنت_عمي
الفصل الاول
انا ونضرب في رواد وهو حتى دفاع مايدافعش على روحه .. انت من سمحلك تمد ايدك عليها مهما دارت او فعلت تجيني نا ونا ناخذلك حقك منها لكن تمد ايدك عليها وتجيبها ليا شبه فاقدة والسبب شنو لحظة جهل وتخلف ماتقولش انك خريج جامعة
رواد بوجع .. اضرب يا احمد نا نستاهل كل اللي تقول فيه
انا.. لو نقتلك حتى بالقتل مش حيرتاح بالي لكن مانقدرش اندير هكي لانك ماتستاهلش نخش الحبس بسببك
وقعدت نضرب وبس ونا مافيش في بالي الا كيان كيف وهي تبكي ووجها متورم وعيونها زرق والكدمات اللي في جسمها كلها نضرب بكل غلي وكل قهري لاني سلمته امانة وماحافظش عليها بسبب تخلفه وجهله شك في حب عمره معقولة في يوم نعطيها له زي الوردة المفتحة يردها ليا ذابلة ومقهورة ومكسورة
انا ومازلت نضرب .. هضا وانت تحبها امنا لو مكنتش فتحت على ايديك شنو درت فيها (وبعيطة ) قولي رد عليا
على طلعت باته وخوته
اب رواد بعد مافك ولده مني .. استهدى بالله يا احمد كنك معاه
انا وبنفس متقطع من الضرب .. ولدك اللي سحبته راجل وسلمته قطعة مني جابها ليا تقول خابطتها سيارة بسبب جهله وتخلفه
ايمن اخ رواد .. غير شنو في يا احمد وبعدين شنو السبب اللي يخلي عريس يضرب عروسته ويردها لهلها ثاني يوم فرحه
انا وبحمق وبصوت عالي .. اسئلو ولدكم المتخلف اللي تقول عمره ماداس في الدنيا وتعلم منها حاجة عطيته امانة وبسبب جهله ماعرفش يصونها
اب رواد ويصبي في ولده .. شنو في يا رواد كنكم شنو اللي صار بينك وبين مرتك وانت كان ماخذيتها راه ممكن رحت فيها
انا وحاولت نكون هادي .. انا بنتي وصلتني وحق ضربتها رديته لكن حق تهمته فيها نبي فيها حق عرب وغير هكي (وبتنهيدة ) يطلقها
اب رواد.. استهدى بالله يا احمد الامور ماتنحلش هكي
انا حاولت انكون هادي على قد مانقدر .. هضا اللي عندي يوم ماحطيت ايدي في ايدك يا حاج موسى وقريت الفاتحة عطيتكم قطعة من قلبي مش بنت بس وسحبت روحي عطيتها لراجل يصونها ويحافظ عليها زي ماكنت نسحاب سنين معرفته بيها يصون فيها لكن للاسف لاول مرة نطلع مانعرفش نحكم على الناس هضا اللي عندي يا حاج موسى بنتي يطلقها وحق العرب ناخذه بالك ماتسحاب عندي حد ومش معنى اني ماكلمتهمش في الفرح اني منقطع عليهم
الحاج موسى .. يا احمد غير فهمنا قبل وبعدين الحق اللي تبيه خوذه وبعدين كل حاجة ليها حل مش معقولة عروسة تطلق ثاني يوم فرحها شنو بتقول الناس
انا .. طز في الناس واخر همي الناس وهضا اللي عندي
وطلعت معاش نفرز في حاجة ونمشي وبس ولقيت رجليا رافعتني للشارع الثاني عند صاحبي ورفيقي
معتز بفجعة من منظري .. كنك يا احمد شنو في كنك رايح هكي
انا ودمعة معاش قدرت نشدها حاولت قدام اسماء نكون قوي على قد مانقدر لكن هنا خلاص معاش قدرت وانهرت بكا صح واعرة بكيت الراجل لكن اللي شفته يخليني نعيط بعلو صوتي
معتز وهو يحضن فيا .. ماتخوفنيش عليك كنك يا احمد عمري ماشفتك هكي ولاعمري شفت دموعك حتى يوم ميتت هلك كنك يا احمد
انا وحاولت نهدا .. كيان يا معتز
معتز بخوف .. كنها فيها حاجة وبعدين هيا خش جوا نحكو بركحاة
انا .. صدري ضايق مانبيش سيسان نحس في روحي بننخنق
معتز .. به اصبر نجيب مفتاح سيارتي ونطلعو للبحر
انا بهدوء .. به
أنت تقرأ
( سلسلة أقرباء ولكن) الجزء الاول بعنوان بنت عمي
Nouvelles#بنت_عمي كل علاقة ليها عمقها واخطائها وحسناتها وحتى حزنها وفرحها لكن علاقتي ببنت عمي علاقة من نوع ثاني مانقدرش نعطي ليها اي اسم او اني نقدر نعطيها وصف يناسبها.... #حياة
