فلاش باك
شوفوا أولا احنا اصولنا تركمانية جدي جان عايش بكركوك قبل ما يتزوج وجان ضابط يبووووو الهيبة تكتل المهم جان عالراتب عايش وبروحة من روحاته لبغداد شاف بيبيتي طبعا بيبيتي لو احجيلكم على جمالها منا لباجر ماكدر اوصفلكم جمالها تجنن بمعنى الكلمه شگرررررة كلش وطبعا اني طلعت عليها بالجمال بس هي احلى مني شگارها اكثر المهم وعيونها اصفر ووجها مدور وبيييضة و قصيرة طبعا ماحجيلكم شكد حلوة بحيث جانوا من يشوفونها يكولولها ماعندج بنيه تشبهج😂 المهم شافها وحبها وطبعا أهل بيبي جانوا بهذاك الوكت منو يكدر يحجي وياهم زناگين ومحد يكدر يحاجيهم وجدي جان على گد حاله وفوگاها تركماني مو بغدادي المهم عشگها يحجيلنا جان جدي يكوللنا جان كل يوم يروح يراقبها من تروح للمدرسه فد يوم متحمل وراح صارحها وراحلها بالبدله العسكريه عود هيبه وكذا 😂 هيه هم محجت شي ووافقت خصوصا جدي جان هيبه وهاي هيه متدري جان على كد حاله راح خطبهة من اهلهة ورفضوا وكتلكم جان منو يكدر يحجي وياهم بذاك الوكت حاول وعالج موافقوا إلى مفديوم خطفهة وطلع بيها لكركوك وطبعا بيبي هم جانت تحبه لذلك وافقت أهلها دوروا دوروا ملكوهم مالهم اثر واهناك جدي تزوجهة وخلفت عمي الجبير بيبي جانت بنت خير وهاي فمقبلت تبقى بكركوك كالتله ارد ارجع لبغداد اله ترجعني اني ماتحمل هنا العيشه جانت مدللة المهم جدي رجعهة وسكنوا ببغداد وبهذاك الوكت جانت بغداد منو يكدر يطبلهة غير بس سكانها الاصليين عاد سوا جدي جنسيته بغداد يعني خلص تسجل هو مو تركماني ومو من كركوك خلص هو بغدادي ورجعوا لبغداد هنا بيبي اشتاقت لاهلها كلش ولحت على جدي تروح وتصالحهم وبالفعل راحتلهم هيه وعمي الي هو ابنها وجان بالگماط بعدة وطبعا بيبي عافت دراستهة هنا علمود جدي المهم طبعا اهلهة من شافوها وبيدها ابنها بعد ماعدهم حل وافقوا لان لا بيهم يطلكوها لان هاي سمعه ومدري شنو ولا بيهم يسوون شي تقبلوا الأمر الواقع وهنا بيبي خلفت درزن جهال😂ماشاء الله وجان ابويه الصغير بحيث المدلل وأبويه يحجيلنا قصصة ويه بيبي تموت ضحك يكول من جنت أصيح ماما ومالكيها أكول وين خاتله بكبر جدج اليوم اله اطلكج واوديج لهلج😂😂😂😂 ابويه طبعا كلش مدلل وهاي . كبر ابويه وطبعا نسيت اكولكم أهل جدي جانوا مموافقين ابد على بيبي وشلون تتزوج مو تركمانيه ومدري شنووانقطعت العلاقات المهم كتلكم كبر ابويه وحجزوله بنت خاله اممممم😤 شطيح حظنا غير الكرايب😂💔 وبت خاله لبابا جانت كلش تحبه وحاجزيلهيا اله يعني خلص ابويه لبت خاله بس ابويه مجان يحبهة مدري ليش معنو هيه فد حبابه بس ميحبهة إلى ما فد يوم مرت عمي التقت بماما وشافتهة وعجبتهة عاد كالت لبابا عليها ابويه موافق ليش لأنو من غير طائفه ابويه جان شويه طائفي فمقبل كلتله بس شوفهة متخسرشي عاد وافق وشافهة اول مشافهة ابويه انعجب بيها أمي جانت هم كلش حلوة الشعر طويل وأشقر بس مو مثل بيبيتي بيبي ماكو بجمالهة وعيونها عسلية وبيضة المهم عجبته كلش وكال هاي الي ومحد ياخذها كال لجدي عليهة بس مقبل لان جان رايدله بنت خاله وجان محد موافق عليها بس ابويه بطريقته كدر يقنع جدي وكله أنت مو هم انعجبت ببيبي والحب يجي من الله مو بيد الإنسان جدي اقتنع لان حجيتلكم القصة فمكدر يرفض طلب بابا وخصوصا جان يحبه كلش اتزوج ماما وهنا رح تبدي قصتي قصتي لي مرح تنتهي ولا اعتقد راح تنتهي طبعا تعرفون المجتمع الشرقي مالتنا انو البنيه مو مثل الولد ابد ومعرف شنو أمي جانت تريد ولد وتقريبا كل الأمهات العرب هيج تريد عود يصيحولهة أم الولد ومدري شنو عود هذا فد شي جبير ونسيت اكولكم أمي جانت من العرب يعني من الريف فالولد عدهم فد شي المهم حبلت بيه و بالسونار عرفت اني بنيه ويبوووووووووو أمي انقهرت وبس رادت توگعني كالت الابويه كال الحمد الله والشكر شيجي من الله زين بس امي مجانت تريدني خصوصا من جانت تشوف الچناين يجيبن ولد وهيه حبلت ببنيه هيه هاي عقلياتهم بعد المهم ظلت طول فترة الحمل وهيه تحاول توگعني بس ماوگعت إلى ماجابتني وطبعا جابتني من ورة خشمها بس من شافتني اجيت للدنيا واجيت طبعا نسخة من بيبي بس هيه احلى فرحت هيج من شافتني العيون زرك جانن واول طفله الها عاد فرحت ومهتمت كبرت واني مخلوا شي بنفسي شريد يجيني قبل لا اقول كبرت شويه وصرت ابتدائيه وجنت كلللش شاطره ناار جان حلمي اطلع دكتورة أو صيدلانية امي هم حبلت وجابت ولد و جانت الدنيا ماواسعتهة من الفرحة دللته دلال مصاير تگولون عبالك جايبته ورة عشر بنات طبعا نسيت اكولكم انو بعائلتنا الچنه من تجي ميصير تخلف بنيه گبل يطلكوها ويذبون عليها لبنيه بحيث بفترة حمل ماما كالت لبيت جدي انو هي حامل بولد بس من جابتني ابويه يحجي يكول صارت مشكله بنص المستشفى والصياح لان بقانون عائلتنا ميصير يجيبون بنات عود حتى لا تجيب العار💔 بس من اجيت بعد ماجان عدهم حل غير يتقبلون الأمر الواقع بس بيبي حلتهة بوكتهة ، حلتهة ومهتمت انو حياتي رح تدمر ورة هالقرار شلون حلتهة هذا ما سنتعرف عليه في البارت القادم☺️
..........
شلت هم على ظهري ما شالوه زلم كبار ...
صغيرة اني ووعيت عالدنيا
لي بكدي يلعبون بلعاباتهم ويضحكون...
واني مكابله جهنم وبرجلي اروحلها
............................................
شنووو رايكم ببارت اليوم طبعا هسه يللة حتبدي القصة مالتي صدك بس هم بعدها الاحداث مباديه طبعا هسه بلله رح تفتهمون وترقبوا البارت الجاي أكول شنو القرار لي دمر حياتي!
أنت تقرأ
خيال مراهقة (باللهجة العراقيه)
Romanceيخذلني الواقع كثيرا ودائما يجبرني ويغصبني أن اتجه للخيال الوحيد الذي يحقق ما أتمناه وها انا اسرد لكم الدوامة والروايه التي عشتها في خيالي # خيال مراهقه
