زول متعلم مثقف عندو امكانيات تخليهو يتزوج اربعه بدل الوحده وجيه ما بسكر و ما بلعب قمار ، بسجر بس دي ما مشكله طالما هو صلاي و بعرف الله ، أسرتو مفتوحه شويه بس ما مشكله برضو لأنهم ناس محترمين جدا ، رياض الولد الكبير راجل البيت الوحيد بعد وفاة ابوهو المانعو يتزوج شنو و هو داخل على التلتين و ما كده بس ، كملت شبابك كلو يارياض ماخليت بنت ماعرفتها و ما خليت وحده ما طلعت معاها المانعك شنو تتزوج ! ما حاسي انك اكتفيت من العلاقات الكتيره ! ما جا الوقت انك تتزوج و تكون اسره بعد ده ! ياسمين البنت المناسبه مؤدبه و مهذبه و بنت ناس معروفين و باقيه عليك و دايراك من قبل ما تدخلوا الجامعات انتظرتك لحدي ما خلصت و اشتغلت و هي لسه منتظراك ؟ ماشايف انو الوقت المناسب جا بعد كده ؟ بتأخر في موضوع العرس ليه ! ياتو ظروف دي البتقولها لي ؟
" ده كان الحديث الصباحي اليومي البتبداهو لي امي و احنا بنشرب في الشاي و قبل طلوعي للشغل القصه اليوميه بس بدل تكون قبل النوم ، اسمها قصة رياض و ياسمين الصباحيه 😂😂 بختصرها بي انو ظروفي ما بتسمح لي اعرس هسي و امي طبعا زيها زي اي حواء سودانيه تفكيرهم كلهم واحد ، ظروفك شنو يا رياض ! انت ما ناقص شي! ليه السودانيات كلهم كده نفس التفكير و نفس العقليه ! ، لازم طبعا الوحده تخت في راسها انو طالما عندو قروش و جاهز يبقى مافي شي بمنعوا من العرس ، ده كان فهم البنات الاقيتهم في حياتي ، اي ما خليت ولا بنت و ماعرفتها لكن ولا وحده فيهم حسستني انها عايزه تتزوج عشان هي عايزة تتزوج ، كلهن عندهن اسباب للعرس . العايزة تعرس عشان صحباتها عرسوا و العايزة تخلص من نقة اهلها ح تعرسي بتين ! و العايزة تعرس عشان العريس يساعد اهلها و العايزة تعرس عشان تلبس زفاف و حفله زي بقية البنات و العايزة تعرس عشان تطلع و تنفذ احلامها الاتحرمت منها ، كل البنات عندي واااحد لأني ما اتعرفت على وحده الا و سألتني ح تتقدم بتين ! جاي البيت بتين يا رياض ؟ ده الكان بزهجني من العلاقه الشفقه على العرس ، كنت بفتش على وحده بس وحده بس العايزة تتزوج و فكرت بكل الاوضاع الحتكون بعد العرس ، عندها رغبه بي انو رياض ده يكون راجلها و حتتحمل منو اي حاجه بعدين و اي وضع ، ما تنجذب لي انو شاب وسيم و مروق و بعدها تحلم بالعرس ، امي كانت بتعكر مزاجي الصباح كل يوم بنفس القصه ياسمينه ! بنت جميله و رايقه بس ما بعرف عنها شيء ، بعاملها عادي جدا زيها زي بنات اهلي ما بحس اتجاهها بشعور مميز ، انا زول بحب التميز في اي شيء من قمتا ف كيف ح اعرس ياسمينه الأنا شايفها عاديه جدا رغم حلاتها و تهذيبها بس فهمها واحد زي كل البنات ! كنت بتسائل ياربي بناتنا السودانيات كلهم كده ! ، فكرة العرس دي انا لو كرهتها ف بسبب امي العايزه تموت على ياسمينه بت صحبتها ، كم مره حاولتا اقعد معاها بس حتى ونستنا بتكون عاديه , ما بحس بيها مختلفه و لا حتى روحها فيها شي مميز ! ، الحمد لله اني طلعتا طيار و الا لو ما السفريات دي كنت ح اموت بسبب موضوع اسمو رياض ح تعرس ياسمينه بتين ! ، بعد زهجي الصباحي ده اول زول بلاقيهو زين اذا كان وقتنا مناسب مع بعض ، بنقعد الصباح في كافي ظريف بنشرب القهوه و بعدها بنتفارق ، زين بحكم انو صاحبي شدييد ف اكتر زول عارف معاناتي مع امي و ياسمينه😂😂 تقريبا هو زاتو حافظ الرصه ، زين كان معجب بي ياسمينه زمان لمن كان بجي بيتنا و احنا في تانيه جامعه بس ماعارف ليه زين نسى فكرة اعجابو دي و اتجلطت انا بي ياسمينه ، كا يوم روتيني ممل بعد اتلاقينا اي زول فينا اتجه لشغلوا و مشاغل الحياه البتلهينا عن حاجات كتيييره ، اليوم كان ما بشبه اي يوم ، الجو غيّم 💜 و جات نسمات هواء في غير العاده ، جاني تلفون من اختي لينا اول مره كانت تطلب مني اشوف جدول امتحاناتها كانت تعبانه و عندها نزله و صوتها مرهق شدييد ، قلت ليها طيب ح امشي اغشى جامعتك و اشوف جدول امتحاناتك ده كيف ، كازول قاري في جامعة المستقبل ما حصل مشيت السودان الغربي الجو الجميل ده خلاني اوافق على طلب لينا من غير تردد ، كانت اول مره ازور فيها جامعة السودان ، بس بتذكر انو في مره ركب معاي دكتور و احنا متجهين للسعوديه ، كنت انا القائد الرحله و لمن و صلنا اتعارفنا على بعض في المطار ،رقم الدكتور الطلع معاي رحله لي السعوديه كان عندي من يوم التعارف داك ، اول ما وصلت الجامعه اتصلت عليهو ، لاقيتو في بوابة الجامعه و اكرمني بالدخول و الاستقبال ، عرفني على دكتور بدرس لغات طيب لينه بتدعي على الاساتذه كده ليه !😂😂 ناس طيبين والله بس اختي المتجننه ، استقبلني الدكتور فوق في مكتبو قعدنا و ضيفني و بعدها سألتو من مكان البورد المعلق فيهو الجدول ، لأنو كان مشغول بي حاجه ما متذكرها نزلت براي من السلم عشان اصور الجدول
كانت في بنت واقفه جنب البورد و بتفتش شكلها على الجدول ! منزله راسها نهاية الجدول و بتعاين ، سلمت عليها و ردت لي السلام سألتها من مكان الجدول لأني مستعجل ورتني مكانو ، بنت سمراء جميله🌸 كانت بتأشر لي و انا بشوف في عيونها ، ما حصل لاقتني عيون طبيعيه لونها بني محدده باالأسود ! مركبه عدسات ! معقول ! هي كانت بتتكلم و أنا بعاين ليها في عيونها الغريبه دي ! ملامحها السمراء الحلوه ! كانت بتجيب الطرحه لقدام لأنو شعرها بظهر كل شويه بتجر الطرحه بدون ما تشعر بتكرر الحركه ، يدها اليسار خاتاها في عينها اليمين و بتدعك في عضلات عينها تقريبا كان عندها صداع ! كانت بتأشر لي في مكان جدول سنه رابعه و انافقدتا تركيزي مع حركتها ، كنت متشوق اشوف ملامح وشها كامله و منتظرها تنزل يدها ، سألتها انتي من ياتو كليه ! و ردت لي انها من كلية حاسوب ، سألتها وين كليه حاسوب ؟ و الحمد لله اني سألت السؤال ده ، عشان تنزل يدها الكانت مغطيه بيها وشها و توصف لي بي ايدينها الاتنين ، ياسبحان الله💜 البت دي ما كانت مجتهده في روحها ابدا شوية كحل بس شكلو ، ما كانت مخططه حواجبها ولا عامله تاتو ولا كنتور ولا قصص اخواتي الفي البيت ديلك😂😂 كانت طبيعيه 🌸 طبيعيه جدا ، حتى كلامها طبيعي بدون تصنعات ، بدون جيم مخنوقه و لا سين مشدوده ، ردت لي برسميه و انا ابتسمت 💜 ما ابتسمت لي جوابها زي ماهي كانت قايله ، ابتسمتا لأني شفت الملامح الجميله دي و قدرت تقلب مزاجي كلو💜 الجمال ده نعمه ياخ .. شكرتها و هزت لي براسها عفوا ، ما قدرت اكتر كلامي معاها و لا اتلفت تاني اعاين ليها ، خفتا انها تفهم حاجه غلط ، اكتفيت بكلمة عفواً القالتها بصوتها الأنوثي الرايق ده ياخ💜 ، ركبتا عربيتي و دورتا و غيرت اتجاهي ، ما مشيت المطار ، رجعتا البيت زوله غيرت خططي و يومي و جهجهتني من اول لحظه دي يلقوها وين تاني 🌸 ، دغري مشيت لي لينه في غرفتها نسيت مرضها و تعبها و كلو و ما متذكر اني سألتها زاتو بقيتي كيف ، دخلت جوه و هي اتفاجأت سألتني رجعت مالك خير! مش رسلت لي الجدول في تلفوني ! قلت ليها اي رسلتو ليك ، قالت لي مالك يارياض! سألتها بتعرفي زول في كلية علوم حاسوب! قالت لي اي عندي صحبات , قلت ليها بس الحمد لله قالت لي رياض في شنو انجز ؟ انا حلقي واجعني 😒 قلتا ليها في بت انا شفتها هناك ، ما خلتني اتم كلامي وقالت لي رياض عليك الله اختاني بلا بت معاك ، يعني انت ليه ما عندك احساس قدر ده ! اختك عيانه و انت مشيت ليها الجامعه عشان تشوف جدولها ولا عشان تعاين للبنات ! قلت ليها انتي ليه محسساني اني بتاع بنات يابت ! قالت لي اي يااخوي انت بتاع بنات و عليك الله ماتخليني اذكرك هناء صحبتي الخربتا علاقتي معاها بسبب قصصك دي 😒 عليك الله بس حب بعييد من بنات جامعتي عشان ما ابقى انا هناك اسمي اخت رياض ، قلت ليها والله تصدقي انتي مابتستاهلي الزول يساعدك زاتو😒 طلعت منها و انا قنعان من مساعدتها ، ده شنو الغباء ده ! انا ليه ما مشيت وراها ! طيب كان اعرف اسمها😒 ، ما عارف الحصل لي شنو لمن شفت البت دي ، من اليوم داك انا ما كنت مركز في اي شي اعملوا بمشي الشغل و برجع ، كان عندي سفريه لتركيا كنت انا الماسك الرحله برضو اول ما هبطتا الطياره و نزلت لقيت ياسمينه منتظراني في صالة كبار الزوار ، كنت عارف انو امي مرضت شويه و انا مسافر و انها في المستشفى ف ما قدرت اتأخر ولو ثواني في المطار طلعتا طوالي عشان ما أخد زمن في السلام و لا السؤال ، و بعد كده لحقني الدكتور عثمان وانا ماشي على العربيه كان بنادي فيني اتلفت ليهو و سلمت و كان عايز يسأل من امي و اخبارها و الحاله عارف اني مستعجل و طالع سريع ، ركبت العربيه و ختيت حاجاتي ورا اول ما دورتها كانت في بنت واقفه قدامي بتعاين اتجاه الصاله 😒 ضربتا البوري مية مره و هي سرحااانه ، طيب ياخي اسرحي بعيد البوقفك في مكان زي ده شنو هسي ، اليوم ده عوارضو كتيره ياخ تاني ضربتا ليها و برضو ما اتحركت ، اضطريت انزل انبهها ، بلفت فيها برضو سرحانه لحدي ما انتبهت
كانت هي 🌸 نفس الزوله الجهجهتني اليوم داك هي زااتها ، كانت متغيره 💜 المره دي منزله شعرها كلو بره ، ملامحها حلووه شدييد ، نفس البت تاني وكأنوا جمال السمر خلقوهو فيها 🌹 بعد ماكنت ناوي اتزهج فيها ، الكلام كلو طار لمن عاينت لي بعيونها ياخ ، بقيت بتمتم جواي اقول شنو ! حسيت انو الكلام تقييل و ما بالساهل يطلع ، قلت ليها انتي شكلك سرحانه ! قالت لي معليش بعتذر و بعدها سألتني الباب بي وين ! يا الله شفتا يارياض انت محظوظ كيف😍 ربنا بريدني و الله ، كان ممكن اوصف ليها الباب و تطلع ، بس ما المره دي حلفتا ما اخليها تضيع مني ساي كده ، ركبت معاي قدام 🌸 عطرها كان غريب مميز و بنوتي💕 ، كانت متخجله كده و متحسسه من التوصيله ، و هي ماعارفه السعاده الأنا كنت فيها ، حاولتا األف حديث معاها عشان تتكلم و اسمع صوتها تاني🌸 اتشجعتا و قلتا ليها انا شفتك قبل كده ! و ردت بكل عفويه اي 🌸 ياخ اي ، هو انتي في زول بنسى ملامحك ياخ 💜 ، أول مره ارتبك و انا بتكلم مع بنت ، بحاول الف و ادور و اجيب سيرة الوكالات و الشغل عشان اصل لي اني اديها رقم ، برضو ما قدرتا اقول ليها عايز رقمك ! ما كفايه اني عرفتا اسمها سندس💕 وصلت لي اني اديها الكرت بتاع الوكاله ، كأني بتطمن في نفسي انو خلاص عرفتا اسمها و هي عرفت حاجه توصلها ليك ، بعد نزلت من العربيه ، حسيت بنفسي غبي المنعني اديها رقمي عدييل شنو ! خايف على منظرك يارياض ! البت دي لو ما اتصلت عليك ! ، تاني الخوف رجع لي .. فكرتا امشي الجامعه براي عدييل و اسال منها ، منظري ح يكون غبي و انا بسأل في الطلاب 😒 لينه ما ح تساعدني لو اذنتا ليها ، و الله ما فضل لي الا اتصل على وحده من البنات البعرفهم و اقول ليها امشي اسألي لي منها 😂😂 و الله يارياض عملتها فيك البت الشافعه دي😂
