و انا بفكر في البحصل معانا ده، امي جات داخله علي لقتني راقد متمدد .. قعدت جنبي في السرير وسألتني كويس انت ؟ قلت ليها ايوه يا امي ، هبشت شعري كده بي يدينها وقالت لي تعال رقدتني في رجلينها قالت لي تتذكر لمن كنت صغير كنت بتجيني جاااري جرري عشان تنوم النومه دي ، ابتسمتا و قلت ليها ما بقينا صغار قالت لي اي كبرتوا و بقيتو بترتاحوا بي حاجات تانيه غير حضن الام ، قلت ليها و انا ببوس في يدها امي انتي مكانك ما بتغير ولا بتبدل بالزمن .. قالت لي رياض الحمى ما رجعت تاني ؟ قلت ليها لا مارجعت، قالت لي عشان انا خايفه تكون بتجيك في الشغل و تكون داسي مني عشان ما ازعجك كل شويه بالكمادات ضحكتا تاني وقلت ليها امي 💙 انتي ماعارفه اهتمامك ده نعمه قدر شنو ياخ ، عارف انها بتحب الكلام الحلو ده مني و اني ولدها الوحيد فما بتحب تشوف اهتمامي بي اي زول غيرها .. قالت لي اخت ليك تاكل قلت ليها الحمد لله شبعان و بعدين عندنا حفله عرس زميلنا من الجامعه قالت لي خلاص اخد ليك نومه شويه .. قلت ليها انتي عارفاني اساسا ماعندي حاجه للحفلات ، بمشي متأخر و بطلع طوالي قالت لي بس ده زميلك قلت ليها اي برضو ما بحب الجوطه ، قالت لي رياض و زين و مرتو ح يجوا ؟ قمتا و عاينت ليها قلت ليها امي اي ح يجوا ، قالت لي بتعاين لي كده مالك ؟ ضحكتا وقلت ليها مستغرب في زين و مرتو دي ؟ بتذكري فيني انها مرتو يعني ولا شنو ؟ قالت لي لا والله بس يعني ساي طلعت مني قلت ليها طيب خليني ارتاح عشان اقدر افتح لبعدين .. نمتا حبتين كده وقمتا بعد العشاء اتجهزتا و اتعطرتا للحفله بدله سوداء وقميص ابيض مائل للبيج و بنطلون بني مائل للبيجي .. و الساعه و شلت التلفون و مرقتا للحفله كنت خاتي احتمال الاقي سندس هناك و خايف من ملاقاتها و برضو نفسي اشوفها مع متيم ، شفتو مره وحده و هسي بقى عمرو تلاته شهور .. وصلت الحفله لقيت لمه من اصحابي العذابه قعدتا معاهم واحد منهم اسمو يس فرحب بي اووو اخونا الرجع تاني للعذوبيه سلمت عليهو بضحكه و قلت ليهو والله صدقني احلى من حياة العذوبيه دي مافي .. قعدنا في تربيزة وحده و بقينا نتونس و في نص الونسه كده جات داخله💔 لابسه توب حرجلي مع حنتها و سمارها و شعرها الاسود ، و شايله ولدها و معاها زين داخل .. شلت عيوني عنها لاني قبل لحظات دعيت ربنا مايعلقني بيها ابدا .. انشغلت بالونسه و لخمت نفسي زين جا سلم علينا في مكانا انا و الشباب و بعدها رجع قعد معاها ، شلمت على العريس وباركتا ليهو واتخارجتا قبل ما اسلم عليها طلعت بره الصاله وقفتا جنب العربيه مساااافه ما قادر اسوق طوالي ، كنت متوتر و طوالي بديت ازهج مما شفتها .. بعد دقايق جات طالعه بره شايله متيم وبتتكلم بالتلفون لانو جوه صوت الحفله اتلفتا شفتها💔 المره دي عينها وقعت علي و ما كان ممكن اتجاهلها .. عاينت لي و هي ساكته منتظره تشوفني بهرب من ملاقاتها ؟ لازم طبعا اتماسك و امشي اسلم عليها فقربت منها وقلت ليها عادي جدا سندس كيفك ؟ قالت لي اوو رياض المختفي كيفك ؟ قلت ليها الحمد لله وولدنا ده كيف بالله ! يا متيم يا بطل .. مديت يديني اشيلوا منها كانت بتعاين لي في عيوني ، كان ظاهر اني بحاول اتجاهل حاجات كتيره و بحاول اظهر اني كويس شديييد بعد ما شفتها ... ما كنت بقدر اطيل النظر في عيونها فقربت منها اشيل الولد ، رجعت مني لورا طوالي تقريبا اتذكرت ! متأكد انها اتذكرت الحصل بينا ! رجعت انا برضو شويه كده للخلف .. لمن شافت انها اتصرفت بطريقه واضحه مدت لي متيم و ابتسمت شلتو منها ، عاينت ليهو بشبه زين اكتر مما بشبهها قلت ليها بشبه ابوه ، ابتسمت وسكتت جا زين طالع من الصاله شافنا واقفين بره ناداها من بعيد سندس ؟ طلعتي بره مالك ؟ لاحظت انو بتنهر ! بتكلم معاها بالطريقه دي ليه ؟ تقريبا شوفتنا مع بعض خلتو يتنرفز ! قالت ليهو كنت بتكلم في التلفون قال ليها طيب تعالي داخله ، اديتها الولد عشان ما ينهرها اكتر قدامي ، متأكد اني ما ح اتحمل زول يكلمها بالطريقه دي حتى لو كان راجلها .. قلت ليها ادخلي جوه و مع السلامه و مشيت ركبتا و دورتا سريييع ، زين ! لأنو هو ما نضيف و جواهو ما نضيف غضب لمن شافنا واقفين ! دي نوايا الزول لمن تكون وسخانه .. بعد اسبوعين مما لاقيتهم سمعتا انو متيم في المستشفى ، جاهو ربو حاد و رقدوهو بعيد عن كل المشاكل الحاصله دي انا جريت المستشفى عشان عارف سندس ح تكون في ياتو حاله ! .. كلها ساعات مما رقدوهو و كان خلاص بيلفظ في اخر انفاسو😢 جانا الدكتور المتابع حالتو وقال انو متيم اتوفى ، سمعتا الخبرو انا كنت مع زين جنب الغرفه سندس كانت بعيده شويه مننا لمن جات علينا لقتني واقف متصنم ماعارف اعمل شنو ! جسمي بارد و مخلوع و لقت زين قاعد في الكرسي بيبكي قالت لي في شنو يارياض؟ عاينتا ليها وسكتا قالت لي زين مالوا ؟ بقت بتعاين ليهو و هي ما دايره تسمع الخبر و كأنها بتكذب في روحها .. بتعاين لي جوه عيوني و بتقول لي رياض في شنو ؟ انا كنت مع الدكتور فوق و قال لي انو ولدي كويس .. ولدي وينو ! زين جاوبها قال ليها ولدك ماات خلااص ، كان بيبكي هو زاتو و ما طريقه يهاجموا بيها الزول بس هو زاتو ما كان مصدق طوالي كوركت لالا ما مااات متيم ما مااات 😢 قلت ليها سندس ان لله وانا اليه راجعون .. اتفجرت بالبكا و بقت بتكورك المستشفى كلها وقفت تعاين ليها .. ماشفت ردت فعلها لمن مات ساجد بس شفتها لمن فقدت ولدها المن دمها و لحمها .. كانت بتقطع في شعرها و بترجف و بتكورك .. زين قام عليها و حضنها بالعافيه عشان يمسكها اعصابها كانت مشدوده و يدينها قويه و كأنها حجر .. مرت بنفس الحاله المرت بيها لينه اختي لمن انهارت عصبيا في البيت .. الدكاتره جو جاريين بره و طعنوها حقنتين لانها كانت بتقاوم في زين بطريقه مخيفه و قويه شديييد .. كنت واقف بعيد بعاين لي انهيارها و ماقادر اعمل شيء ! لحدي ما دخلوها الغرفه جوه و ماعارف ركبوا ليها دربات ولا مهدئات ! كنت واقف مع زين و بديت اضرب و اكلم الاهل اهل و اهلو و اهلها و اهل ياسمينه و كل الناس .. و كطفل لسه ما عندو عزاء 💔 سندس كانت قاعده في بيت اهلها بعيييده عن مكان العزاء ، الدكتور منع زين من انها تنهار تاني لانو وشعها الصحي تعبان شديييد ، مرا شهر على العزاء و رجعت سندس القديمه 😢💔 فاقده طعم الدنيا و ناسيه ببتسموا كيف ، سبب الوفاه انو متيم ادوهو حقنن منتهية الصلاحيه ، و كطفل مستحيل يقدر يقاوم فمات مباشرة .. سندس شهرين ما قادره تقيف او تاكل او تشرب زي الناس عايشه على الدربات و الاكل بالحقن بالغصب ، ماكنت عارف انو ابوها عندو علم بقصتنا الا لمن مشيت ازورها في البيت استقبلني و دخلني صالونهم قلت ليهو جيت اشوفكم اذا محتاجين حاجه ! و هي اتحسنت ولا لسه ؟ قال لي لسه بتتهيأ مرات انو متيم عايش و بتسال مرات منو ، قلت ليهو ربنا يصبرها ويشيلوا من قلبها زي ماشالوا من عينها .. قال لي رياض عايز اتكلم معاك في موضوع ياولدي قلت ليهو اتفضل يا حاج ؟ قال لي سندس قعادها طول عندنا قلت ليهو ايوه عشان كده احسن بعد صحتها تتحسن ترجع لي بيت راجلها ، قال لي لا ما عشان كده قلت ليهو خير ياحاج ؟ الحاصل شنو ؟
#يتبع
