قلت ليهو اتفضل ياحاج خير ! قال لي والله في خلاف حاصل بين سندس و زين ، قلت ليهو خير بس يا حاج ؟ قال لي من يوم وضعت و رجعت بيتها مع زين .. حصلت كم مشكله كده والله بينهم ، قبل كده اتناقشوا نقاش صعب كده و ضربها كف .. ضربت لي تلفون و هي بتبكي قالت لي تعال سوقني يا ابوي و انا طبعا ابو ياولدي رياض و بتي ضربت لي و هي بتبكي و منهاره ؟! كيف ح اقدر اتفاهم في وضع زي ده ؟ كانت يادوب طالعه من الاربعين بي اسبوعين .. مشيت جرري على بيتها لقيتها منتظراني سألتها و حاولتا افهم منها كانت بتبكي و في حاله صعبه شديد عيونها منفخه و وشها مورم من اثار الضرب ! شايله ولدها ومنتظراني .. قلت اسوقها البيت و منها افهم و فعلا ركبنا امجاد رجعنا البيت هنا خليتها ترتاح و بعد كده سألتها الحصل شنو ؟ قالت لي يا ابوي زين متغير معاي من ايام انا حامل ، داخل طالع شاكي فيني بقى يلقاني قاعده براي يقول لي قاعده هنا ليه ؟ شايله التلفون بتتكلمي مع منو ؟ طلعتي من غير ما تقولي لي ليه ؟ و هي يادوب واضعه ! ما راعا لي وضعها الصحي حتى؟ .. قالت لي منعها من انها تجينا تزورنا .. سألتها طيب هو ضربك ليه ؟ قاالت لي جا راجع من الشغل كنت بتونس مع صحبتي و لمن هو جا قفلت منها عشان هو رجع فسألني كنتي بتتكلمي مع منو و قفلتي لمن شوفتيني! قالت ليهو ما بوريك داك التلفون .. لو في فهم في راسك امشي اتأكد منو فهي اتلائمت معاهو عشان زعلانه من حركاتو وهو كان غضبان ف إتفشى فيها بالضرب و كأنوا زول بنتقم من زول ! سألتها يا سندس االخلى زين يشك و يتغير معاك شنو ؟ قعدت تبكي قالت لي يا ابوي غلطتي انا كلمتوا انو كان عندي علاقه بي زول قبل العرس و ما توفقنا للزواج .. الموضوع انا زاتي عرفتو منها سألتها انتي كنتي بتعرفي منو ؟ و نحنا ليه ما عارفين بيهو ؟ قالت لي امي بتعرفوا و شافتو ، قلت ليها طيب كدي خلي زين وريني ده منو الكنتي دايراهو ده قالت لي مديري يا ابوي الشفتو في العزاء اسمو رياض ، قعدت شويه كده ما مركز مديرها منو و رياض منو ! بعدها اتذكرتك جيت العزاء فعلا .. قلت ليها اي اتذكرتو جا و عزاني و اتذكرت طوالي انك جيت مع زين ؟ عشان تطلبوا يدها .. قلت ليها سندس ؟ الاتنين جو مع بعض عشان يطلبوك مني ! قالت لي اي رياض بس هو زاتو الانت اتذكرتو ده .. قلت ليها سندس انتي كنتي دايره صاحب راجلك ؟ و وافقتي بي زين يبقى راجلك ؟ و صارحتي زين بالحاجه دي ؟ قالت لي لا يا ابوي انا ما قلت لي زين انو رياض الكنت دايراهو ، كنت عايزة اصارحو بس ما قدرت والله حكيت ليهو القصه بس قلت ليهو انو ده واحد من الجامعه ، قلت ليها و انتي حكيتي ليهو ليه قصه انتهت ؟ انتي مره متزوجه قالت لي حسيت بي اني مخنوقه و بغش عليهو .. قلت ليها و شفتي براك ردت فعلوا بدا يشك فيك و الشك لمن يدخل بين الراجل و مرتو تااني ما بمرق يا سندس .. قالت لي ابوي انا ما عايزة بيتي يتخرب و انا عندي ولد منو لكن ما قادره استحمل نظرات زين بتاعت الاهانه و محسسني اني وحده رخيصه كل ما يعاين لي .. سألتها سندس عرستي ليه ؟ قالت لي عشانكم يا ابوي عشان اساعدكم و لمن نحتاج حاجه ما نقع تاني ، عشان لو زول من اخواني مرض ما يموت بسبب الفقر العايشين فيهو .. قلت ليها سندس زواجك منو غلط يا بتي و انا هسي ما ح الومك انك كنتي دايره صحبو بس ح الومك انك عرستيهو و انتي عارفه انو العرس ده غلط من البدايه .. قلت ليها احتمال زين عارف بيكم ؟ احتمال غضبو و زعلوا و الضرب الجابوا جديد ده بسبب انو عارف علاقتكم الزمان و عارف انك بتكذبي عليهو ! قلت ليهو لا مستحيل زين يكون عارف و يتزوجني .. " هنا انا قاطعتو وقلت ليهو زين عارف يا حاج " كمل كلامو و قال لي ده الأنا اتوقعتوا من البدايه ، انا ما عندي استعداد اخسر بنتي سندس و كفايه ساجد و كفايه العذاب العاشت فيهو بعد ساجد مات و كفايه الحياه الغصبت نفسها عليها عشان خاطر اهلها .. كانت خايفه من الطلاق و من كلام الناس عنها ، و من انها تخسر الوضع الساعدتنا بيهو ، قعدت معاها و كلمتها قلت ليها يابتي سعادتك و راحة بالك عندي اهم من الدنيا و قروشها ، ما تخافي من الناس و ما تخافي علينا احنا كنا عايشين قبل ما انتي تتزوجي و هسي نحنا ح نستمر في حياتنا .. ما تجبري نفسك و تدوسي على طريق سعادتك عشان خاطر الناس ، لا انا ولا امك ولا كلنا ح نزعل منك لو كنتي من البدايه صارحتينا ، لو كنتي جيتي حكيتي لي ابوك عن زين و عن رياض ما كان وصلنا للمكان ده ! سألتهاا بعدها رياض ما كلمتيني بيهو ليه ؟ قالت لي يا ابوي رياض اهلوا ما راضيين بي وضعنا و امو ما دايراني .. طريقنا واااضح وضووح الشمس يا ابوي ، قلت ليها خلاص فهمتا هسي انتي تعملي الح اقولوا ليك ترجعي بيتك و اصبري على زين شويه احتمال ربنا يهديهو و يتغير .. فعلا سمعت كلامي و المساء رجعتا بيتها بدون ما اجيب سيره لي زين لاقيتو و قعدنا سوا حتى ما جبتا ليهو سيره عن انو ضربها ليه ولا حاولتا اتدخل غيهم ، كنت متوقع انو زين ح يتغير معاخا و انو دي حاجات قديمه حصلت و انتهت ، بس لسه كان متمادي في تصرفاتو .. بحرجها قدام الناس و بتنهر فيها و كم مره حضرت ليهو موقف شاكلها قدامنا كلنا عشان ما عملت الشاي و جابتو! اهلوا بدوا يلاحظوا انو تصرفاتو دي ما عاديه معاها و انو في شيء حاصل فيوم جات امو قابلت مرتي هنا و سألتها اذا في مشاكل حاصله و زين ما بحكي ليهم ! مرتي ما حاولت تدخلها في الموضوع و قالت ليها بتكون نقاشات عاديه بين اي راجل و مرتو .. و قبل ما متيم يمرض سندس زاتها مرضت تعبت و رقدناها المستشفى كان عندها ضعف دم و هبوط ملازمها طوالي ، فحصنا ليها و طلع عندها سكري 💔 كنا قايليين انو سكري عارض بس الدكتور قال ده حسب وضعها هي و البيئه العايشه فيها .. المفروض تبعد من المشاكل و التعب .. و قدر الله انو متيم يتوفى و الحمد لله على كل حال .. المشاكل ما خلصت لحدي ما متيم اتوفى ؛ انا ما رضيت انها تكون قاعده هناك بعد الحصل من زين ف جبتها قعدتها هنا و للآن وضعها الصحي تعبان شويه ، اتحسنت بس لسه مع الفراشات و الدربات و الأدويه ..
#يتبع
