صحيت الصباح على صوت ياسمينة بتقول لي صباح الخير رياض ، مبتسمه و بمجهزة الشاي و اخر رواق ! صاحي كأني فاقد للذاكره تماما .. مستغرب من ابتسامة ياسمينه دي ! قلت ليها صباح النور قالت لي جهزت الشاي بره في الصاله تعال طيب ، و مشت بقيت بعاين ليها ومرخم شدييد ما قادر اقوم طوالي اتذكرت يوم امس بعد سمعتا الخبر منها و مشيت ليها جريتها من الكرسي و قلت ليها تعالي معاي و بعدها ما خلاص ، خايف انها تكون فهمت الحصل شوق مني ليها عشان غابت ؟ ده شنو العملتو ده ! ياخ ده شنو الجحيم العايش فيهو ده ! قمتا على حيلي بعد اخدتا دوش طلعت شربتا معاها الشاي و طلعتا طوالي للشغل بدون ما اديها وش للونسه ، قاعد في المكتب في الوكاله سرحان و مهموم و خاتي علب السيجاير جنبي ما كان عندي اي مزاج امشي المطار ، كنت بفكر في حياتي الإتقلبت بين يوم وليله دي ! كنا وين انا وسندس وبقينا وين ، دنيا غريبه يعني هي حتبقى ام ؟ ام لطفل زين ! زين صاحبي ! و سندس حبيبتي ! .. تقريبا لو زول تاني في محلي كان جنا او جاتو ذبحه و قتلتو والله طلعتا قوي يارياض ، سرحان بفكر سندس هسي مبسوطه بالبيبي! سندس عايشه حياتها فعلا .. لمن كنت بقول البنات بياعات و اللعب بيهم وااجب كان معاي حق البنات كلهم زي بعض مابستاهلوا انك تتعب عشانهم و توفي ليهم ؛ الوحده بتفتش على مصلحتها وين و بتجري وراها امي معاها حق سندس كان هدفها عريس غني يسترها هي و اهلها ، استغفر الله انا ماعارف مالي افكاري جايطه من الصباح طيب و المصيبه الفي البيت دي اتصرف معاها كيف ؟ انا متأكد العملتوا امبارح كان انتقام من كل البتعمل فيهو سندس و تاني ظلمت ياسمينه ! بقت قاعده في وشي عشان تذكرني كل شويه اني ظالم ، ده ما حل ياخ راسي ح يتفجر من التفكير .. بديت اكح و اكح من السيجاير الكتير الشربتو ده 💔 تلفوني رنا و ماعندي نفس ارد على اي زول من البشر ياريت يخلوني في حالي ياخ 💔 رفعتا التلفون لقيتها امي قلت ليها ايوه يا امي قالت لي رياض ما تنسى و انت راجع للبيت تجيب معاك غداء من مكان الحبش ديلك البعملوا الزغني رهييب قلت ليها تمام يا امي و انا مشغول شويه فما ح اقدر ارد على زول طيب ! و قفلتا منها و قمتا قفلت باب المكتب و جيت رقدتا في الكرسي ورفعتا رجليني فوق للمكتب ماعارف اتصرف كيف ! الحقيقه ضاعت ؟ الغلطان منو فينا و الظلم التاني منو ؟ ماعارف المذنب من البدايه منو ، ماقادر اصل لنتيجه و مشاعري ملخبطه الا ريدتي ليها ثابته ما غيرها الزمن ، معقوله بعد عرفتا انها حامل و حتبقى ام لسه بريدها ! ده مرض ولا ده اسمو شنو ؟ ما قادر اكمل في الزواج ده ، ما قادر اكذب و امثل على بت الناس دي اكتر من كده ؛ الاحسن اني اجرحها مره ولا اجرحها كل يوم بتصرفاتي .. الصباح كانت مبسوطه ياخ ! ليه ما قادر اتعود عليها ليه ما نستني سندس ! حبيتها بي ياتو طريقه دي الخلتني ما قادر اتخلص منها ! يا الله انا غلطت ياتو غلطه دي الخلتني اندم عليها كل يوم ، بنات الناس ! ده حق بنات الناس ؟ طيب هم زاتهم كانوا بلعبوا و بقضوا وقت و ما جاديين ! بس برضو كلهم كانوا منتظرين مني العرس و انا ما وفيت لي وحده ، القلب و مايريد ياخ انا حبيت وحده و كنت دايرها ، اها و الحصل شنو برضو هي مشت ، ما عندي حل غير اني انساها بعد ده .. انساها كيف و انا قريب منها ، ياربي سندس بتكون نست ! .. تعبتا من التفكير و ارهقت نفسي شديييد بالتساؤولات لدرجة اني نمتا على الكرسي مرهق و صحيت اذان العصر برنة تلفوني كانت ياسمينه بتسألني انت وين ؟ منتظرنك بالغداء كلنا ! قلت ليها يادوب خلصتا شغل خلاص تمام طالع .. طلعتا بعد ماصليت العصر و مشيت المحل جبتا ليهم الغداء و منها للبيت .. قعدتا معاهم اتغدينا كلنا مع بعض بعدها طلعتا فوق للشقه تاني نمتا ! جات ياسمينه لقتني ناايم ما صحتني و طفت النور و طلعت صحيت اذان العشاء صليت برضو وطلعت للصاله حاسي بجسمي معسم و مكسر .. قعدتا شويه احضر و هي جات قعدت سألتني باركتا لي زين ؟ حسيت بيها اتعمدت السؤال قلتا ليها لا لسه قالت لي اضرب ليهو قلت ليها لمن افضى قالت لي بس انت هسي فاضي! قلت ليها ياسمينه مالك ؟ في شنو لمن افضى بتصل ليهو ؟ قالت لي مافي شيء انت مالك اتعصبتا قدر ده ! قلت ليها عايني انا عندي مشاكل في الشغل و ماناقص ضغط و دخلتا جوه الغرفه شلتا تلفوني و الشاحن ومشيت الغرفه التانيه قلت ليها تصبحي على خير ، كانت بتعاين لي من سكات بس الدمعه واقفه في طرف عينها لحدي ما دخلتا و رقدتا في السرير برضو بفكر لمن جاني صداع هي تقريبا قعدت تحضر شويه و بعدها دخلت نامت ، صحيت الصباح و انا عيان نفس الحاله الجاتني لمن سندس قربت تعرس جاتني هسي ، فتور و حمى وصداع و تكسير ، لمن فتحت الباب ياسمينه عشان تماديني للشاي و نادت و مارديت عليها قربت مني و لقتني ناشل مووويه في السرير و تعبان بقت بتصحي فيني رياض ؟ رياض ؟ اصحى من النوم مالك ؟ في شنو ؟ قلت ليها بصوت مرهق انا محموم ، جرت جابت لي كمادات و بقت بتعملهم لي لحدي ما الحمى خفت شويه و قدرتا افتح عاينت لي بصره وش! سألتني بقيت كويس؟ بس بنهرة صوت ! قلت ليها ااي قالت لي تمام و طلعت رزعت الباب ، ما كنت فاضي اساسا اراضيها قعدت بره و انا ما قدرت اتحرك من سريري بغفى شويه و بصحى و هكذا ، تلاته ايام عدت و انا تعبان في السرير بجيبوا لي الاكل و المويه لحدي عندي .. ياسمينه كانت مستاءه من حالتي شديد ماعارف ليه مالها؟ و تاني عدت علي يومين و لحدي نهاية الاسبوع كده اتحسنتا و بقيت كويس ، لينه كانت ملاحظه لي نحيف 💔 سمرتا زياده 💔 وشي شاحب و عيوني منهكه .. كانت حاسه بالزعل اتجاهي و حاسه بي انو الدمار الأنا فيهو ده سببوا هم كلهم و امي بالذات ، و في يوم من ايام الشغل المهلكه جاتني لينه في الوكاله استغربتا من جيتها ، قعدت شربت معاي القهوه في المكتب و قالت لي رياض عايزة اقول ليك حاجه .. كنت حالف اني ما اهيج و اكورك و انفعل قدام لينه مراعي لوضعها الصحي و في الكقيقه انا المحتاج مراعاة لوضعي الصحي اكتر من اي زول 💔 قلت ليها لينه مالك احكي ؟ قالت لي اوعديني اول انك ما تجوط فيني ضحكتا وقلت ليها مستحيل اعمل كده قولي العايزة تقوليهو ، قالت لي رياض تتذكر لمن كنت بتحكي لي عن سندس ! قلت ليها ايوه قالت لي انا كنت بحكي عنها لي امي ، كنت بغير لمن انت بتحكي عنها و عن حلاتها حسيت بيها شالت اخوي مني فكنت بتفشى لي امي و بنبذها ليها مرات ضحكتا وقلت ليها اها ؟ قالت لي امي طلبت مني اخليك تجيبها البيت عشان هم البقيه يقابلوها قلت ليها ايوا اها يا الشقيه قالت لي بس في حاجه كعبه تاني حصلت .. امي في مره من المرات شالت التلفون تتكلم مع زين قلت ليها اي متذكر الايام ديك انا لمحتها بتتكلم بس قالت لي مافي شي سلام عادي بينهم .. قالت لي لا يا رياض امي قالت لي زين عن سندس وطلع برضو بعرفها منك لانك كنت بتحكي ليهو قلت ليها اها وبعداك ؟ قالت لي امي قالت ليهو انا ما عايزه رياض يتواصل مع البت دي اكتر من كده ابدا .. قلت ليها اها؟ قالت لي امي قالت ليهو البت دي لااازم تبعد من رياض لانها بت طماعه و ظاهر في وشها ناويه على شنو ؟ زين ما رضى فيها قال ليها لا ياخ سندس دي طيبه ياخالتي قالت ليهو والله ؟ عاجباك انت كمان ؟ قال ليها والله لو ما رياض عرفها كنت ما ح اخليها تضيع من يدي ، بت ناس الزوله دي و ادب و اخلاق لآخر حد امي قالت ليهو زين و ليه تنساها عشان رياض ، انت مش دايرها ؟ خلاص اعتبر علاقتهم انتهت و حلال عليك احنا اساسا مافارقه معانا يعرسها منو .. زين قال ليها قصدك شنو؟ قالت ليهو جيب لي عنوان بيت سندس و انا بتصرف و احللها ليك .. زين كان بساعد امي يارياض و هو الجاب العنوان و خلاها تمشي ليها في بيتهم و هو الوراها انك سحبتا القروش لي اخوها المات و هو الوصف ليها المنظمه عشان تسحب القروش و اخرها من العمليه ، كان عايز يدفع للعمليه هو عشان يظهر قدام سندس بس لما لقاك قلتا الفكره خاف انك تدفع واقترح ليك فكرة المنظمه عشان يأخرك بمزاجو .. رياض امي و زين اتفقوا من البدايه انهم يبعدوكم زين من الاول عينوا على سندس من اول مره شافها في الوكاله .. زين نظرتوا كانت بعييييده و لمن لقى امي رافضاها الطريق اتسهل ليهو يا اخوي💔 مافي زول غيرك اتأذى يا رياض ، واجعني يا اخوي وماقادره استحمل شوفتك كده و حياتك بتدمر شويه شويه و فاقد طعم الدنيا و المرض ملازمك انا خايفه اخسرك يا اخوي بسبب كتمانك الكتيير للمشاكل و انت عايش حياه بترضي فيها كل الناس الا روحك💔
#يتبع
