ما إتفاجأت كتير من كلام لينه اختي ، انا كنت حاسي انو في حاجه حصلت بي وراي .. صدمتي في زين اكبر من صدمتي في امي على الاقل انا لاقي لي امي اعذار و خاتي غيرتها سبب لي العملتوا بس زين ما لقى بنت غير سندس! .. قلت لي لينه ما تشيلي همي الحصل حصل خلاص و الزمن ما برجع لي ورا خلينا في الحاضر سندس ح تبقى ام لي ولد زين و ده اكبر دليل على انها اتقبلت زين و نست تفاصيلنا كلها ، عموما اي زول يعيش قدرو الاتكتب ليهو قالت لي رياض على حساب سعادتك ؟ ضحكت بتريقه و قلت ليها سعادتؤ حسبتوها زمان و ختيتوني في الموقف ده انتو ، قالت لي رياض قلت ليها لينه خلاص انسي المواضيع دي كلها وشيليها من راسك و ابدي شغلك من اول ، و ركزي في تفاصيل حياتك ح تكون كيف قالت لي و انت ؟ قلت ليها انا مالي ؟ كويس و عايش الحمد لله و ح اكون مبسوط بجد لمن اشوفك عروسه يا لينه ، قامت على حيلها وقالت لي ان شاء الله خير .. كملت باقي يومي و رجعتا المساء البيت لقيت ياسمينه منتظراني بالعشاء و متأنقه و لابسه جميل و عامله شعرها ، عاينت ليها وضحكتا و دخلتا الغرفه اخدتا دوش و اتعطرتا وجيت طالع قلت ليها يومك كان كيف قالت لي بخير والله كنت في الاستديو و جيت راجعه بدري قلت ليها تمام طيب ، تلفوني رنا كان زين ما كنت داير ارد عليهو في البدايه بس تاني رديت سلمت عليهو و كنت عايز اعرف سبب اتصالوا قال لي سندس كان عندها نزيف و في المستشفى تعبت و هسي كويسه هي و الطفل ، إتفاجأت من الخبر و قلت ليها الف سلامه ليها ان شاء الله بنمر نشوفها بكره .. سألتني ياسمينه الحصل شنو ! قلت ليها زين قال انو سندس تعبانه ! قالت لي ايواا صح قبيل اتصلت ليهم كنت جاياهم واختصرني قال لي انو هم في المستشفى فقلقت عليهم اتصلت كم مره وما ردوا شكلهم ضربوا لي كتير و تلفوني بعيد فعشان كده بكون ضرب ليك يكلمك ، قلت ليها ايوا سلامتها ان شاء الله و سكتا ما اديتها اي اهتمام و انا من جواي كنت مقلق عليها 💔 ما عارف ليه قلقت عليها بس قلق جاني و خلاص ، كملنا عشانا عادي و قعدنا بعدها اتفرجتا على التلفزيون و كنت نعسان و مرهق قلت ليها ياسمينه انا ح ادخل انوم تصبحي على خير ، ما ردت لي عاينتا ليها قلت ليها تصبحي على خير ؟ ردت لي من طرف نخرتها و انت بخير .. قعدت في الكرسي قلت ليها ياسمينه انتي مالك ؟ في شنو ؟ قالت لي مافي شيء قلت ليها لا انتي متغيره الايام دي و من رجعتك من اهلك انتي متغيره في شنو ! قالت لي رياض انا ناقصني شنو ؟ قلت ليها بتسألي ليه ؟ قالت لي رياض رد مدام انت العايز تعرف انا مالي .. قلت ليها ما ناقصك شيء ماشاء الله ياسمينه انتي ما محتاجه تسألي سؤال زي ده ، قالت لي طيب ليه نحنا ما زي اي راجل و مرتو ! و لأول مره كانت ياسمينه تسألي حاجه من حقها انها تسألني عنها ، ماعرفتا ارد ليها بشنو ! اذا رديت ح احرجها اكتر من كده .. قلت ليها متهرب من الجواب ياسمينه انتي دايره سبب عشان تنكدي علينا القعده انا ح اقوم انوم و تصبحي على خير و قبل ما اصل باب الغرفه سمعتها بكت ! في داعي للدموع هسي .. دخلتا و ما جاني نوم بسببها دموعها دي حسستني بالذنب الأنا ما بحب احس بيهو و جانا الصباح بهمومنا و زعلنا الامس زاتو اتجهزنا سوا و بدون ما نفتح احاديث امبارح ركبنا العربيه متجاهليين بعض و طريقنا واحد مشينا لسندس و زين في المستشفى لقيتها راقده تعبانه و منتهيه 💔 منهكه من كل النواحي و باين عليها اثار الزعل سلمنا عليهم و قلت ليها سلامتك ما قدرت اذيد كلامي اكتر من كده💔 من شفتها كل الجمل المرتبه جواي اتكركبت و كأنوا حضورها بشتت الانتباه بشده ، قعدتا جنب زين و ياسمينه اتونست شويه و طلعنا طوالي كانت لاحقه شغلها في الاستديو و انا من دربي مشيت للوكاله .. نهاية اليوم رجعت البيت بنفس ملامح يوم امس و ايامي بقت متشابهه زي بعضها تعبت تاني و جاتني نفس الحمى 💔 نزلت ياسمينه مستعجله لي امي تحت بتنادي و تكورك بتقول ليها رياض جاتو حمى غريبه نفس بتاعت المره الفاتت ، امي جات طالعه جاريه بالمكمدات .. و اتلموا فوق راسي امي و اخواتي و لينه الكانت بتقرا لي و تحصن فيني .. كنت برجف و بتنفض فوق السرير و برجع تاني كلهم خافوا من العرق الكان صابي مني ، ياسمينه كانت بترجف و هي بتخت لي في المكمدات و لينه كانت بتبكي للحظه حسوا بي بلفظ في انفاسي الاخيره و قالوا يمكن ده مروق الروح😢 لحدي ما شويه شويه الحمى بدت تخف و العرق بدا يخف شويه ، و جسمي برد و تلج امي جابت بطانيتين غطتني بيهم و قعدوا كلهم حوليني هم و اخواتي و انا في حاله شبيها للغيبوبه قلت ليهم سندس وين ؟ كنت بهضرب و بقول سندس وين ؟ امي بقت تعاين لي ياسمينه ، ما عارفه انو ياسمينه اساسا عارفه فحاولت تبرر ليها و انا ماواعي .. قالت ليها انتو كنتو عند ناس زين ولا شنو شكلو بهضرب بيهم و لا حلمان .. ياسمينه عاينت ليها و سكتت اما لينه ما قدرت تمسك لسانها عليها كانت حاضنه راسي و بتبكي زعلانه ، قبلت على ياسمينه و قالت ليها اطلعي بره ده كلو منك اخواتي قالوا ليها لينه؟ قبلت عليهم هم زاتهم و نهرتهم اطلعوا بره كلكم .. انتو السبب في ده كلو اطلعوا بره .. لوضع لينه و انهيارها البحصل فجأة امي خافت تخسر ولدها وبتها فقالت لي اخواتي اطلعوا بره بي ياسمينه الا لينه قبلت عاينت ليها و انتي زاتك اطلعي بره معاهم ، كانت بتبكي و زعلانه و خايفه تحصل لي حاجه و انا في حالة لا واعي للبحصل ده .. امي خافت على لينه وما بتقدر تعاندها فطلعوا كلهم بره وقفلوا باب الغرفه ، كانت جنبي هي بتنادي براحه رياض اخوي❤ اصحى عليك الله 😢 ما تخليني اخاف اكتر عليك ، رياض انت ابوي التاني ماتخليني اخسرك برضو 😢 رياض عليك الله اصحى و اسمعني .. انا اسفه يا اخوي ...
#يتبع
