ماكنت عارف حقيقة الحوار الحصل بين أمي و زين .. سألتها قالت لي ضرب يسلم علي رغم اني ما مقتنع بي جوابها الا اني مشيتها بس اليوم داك متذكر بعدها ضربت لي سندس تلفون و قلت ليها عايز اشوفك و اتلاقينا تاني يوم بعد انتهت من الوكاله .. كانت جميله🌷 أول مره اشوفها لابسه عباية و طرحهه كانت بسيييطه جدا .. اصرت نمشي نفس المكان الشربنا فيهو القهوه عشان عايزة تشرب شاي بلبن قريب للعصر يعني 😂😂 ما حصل شفتا زول بشربوا في المواعيد دي ❤ بس دي سندس و دي طقوسها الغريبه .. قعدنا عند نفس الخاله الكانت متذكرانا من اليوم داك و بقينا زباين ليها ❤ كانت متخيله اننا مخطوبين فكانت بتتبسط لما تلمحنا جايين من بعييد .. قعدنا و جبنا الشاي كانت زهجانه حاولتا اعرف منها زهجانه ليه ؟ قالت لي انها خايفه على اخوها ساجد قلت ليها ما حيحصل ليهو شيء كنت بتطمن فيها و انا زاتي ما مقتنع بالبقولوا ليها .. حاولتا اخفف عليها انو اخوها ما حيموت و انها تطمن بالها بس هي زاتها كانت حاسه بي خوف وقلق نفس الأنا حاسيهو اتجاه ساجد ❤😢 تاني عرضتا عليها اساعدها و رفضت حاولتا اقنعها انو العناد ما لمصلحة ساجد بس رفضت برضو .. كنت خايف على ساجد لأني شايف حب سندس ليهو في عيونها .. عارف انها ح تتكسر لو حصلت ليهو حاجه عارف انو روحها الحلوه دي ح تتغير ملامحها حتذبل و حتموت لو ساجد حصلت ليهو حاجه .. حاولتا اقنعها بس راسها قوي شديد و دي حاجه ما اتغيرت في سندس.. من أسوء صفات سندس العناد الشديد انتهى يومنا و هي لسه زهجانه و شايله همو .. وصلت البيت انا زاتي بديت افكر في ساجد .. انا عايز ساجد يتعالج لأني ردتو من ريدتها ليهو بقيت بحاول افكر اقنع كيف سندس ؟ اتصلت لي زين و كلمتو بي وضع ساجد اداني فكره انو اصل للمنظمه الدعمتهم بنص المبلغ و اتبرع بالباقي و بدون ما هي تعرف .. فكرتو كانت حلوه رغم اني خايف من ردت فعل سندس لو في يوم عرفت بالغلط و عارف تفكيرها كيف .. تلاته ايام كنت برتب في المبلغ و سحبتو .. جا اخطار من البنك لناس البيت انو في مبلغ كبير اتسحب .. امي عرفت بالمبلغ و عرفت اني سحبتو جات سألت لينه لأنها اقرب وحده لي اذا بتعرف حاجه عن المبلغ بس لقتها هي زاتها ماعندها علم قالت ليها اعرفي منو لمن يجي .. وصلت البيت و فعلا بعد العشاء لينه جات قعدت معاي في الصاله و انا بتفرج على الاخبار .. سألتني رياض جانا اخطار انك سحبتا من البنك مبلغ 30 مليون قلت ليها ايواا نسيت انو الرساله بتجي هنا .. قالت لي عايز تعمل شنو ؟ قلت ليها و من بتين بتدخلوا في القروش البسحبها قالت لي رياض عادي يعني سألتك مالك بتتلائم معاي؟ قلت ليها استثمار صغيرووني .. قالت لي وين ؟ قلت ليها لينه في شنو ؟ قالت لي احسن توريني عشان امي لو عرفت ح تجي تزن ليك والله بعدين .. انت عارفها لمن تحقق في المواضيع قلت ليها و امي عرفت كمان 😂 قالت لي لأنك ساحب القروش من حسابك وتامي الباقي من حساب ابوي .. قلت ليها طيب ياستي شلت القروش لعلاج زول محتاج .. قالت لي لمنو يعني قلت ليها لينه ما تقرفيني رديت ليك وخلاص والله تكرهوني قعادي معاكم تاني من الشغل ما برجع ولا بتشوفو خلقتي ياخ كلها ثواني البقعدها و بعد ده تنقوا لي كلكم ؟ قمتا منها و خليتها من وراي مشت لي امي و كلمتها قالت ليها رياض سحب القروش لعلاج و كونوا علاج طفل ف ده اكيد اخو سندس لانو كان كلمني قبل كده اخوها عيان .. امي سكتت و ما ادتها اي رد فعل و طلعت تاني مسكت التلفون وضربت لي زين قالت ليهو سندس عندها اخو عيان صحي؟ قال ليها ايوه قالت ليهو القروش الاتسحبت دي لي اخوها ؟ قال ليها ايوه .. قالت ليهو يبقى ولدي جنا عديييل البت دي الا تكون كاتباهو ..في زول ما بعرف بت شدييد كده يسحب قروش و يديها ليها بالباارد كده لالا البت دي منها خوف بعد ده .. زين القروش دي ما تصلها كلوو كلوو سامعني قال لي بس يا خاله القروش دي لعلاج طفل و رياض ما ح يسحبها أبدا قالت ليهو زين اتصرف بس القروش دي تتسحب بي اي طريقه بعلم رياض ولا من غير علمو المهم .. قفل منها على كده و هي ما هدت على ده بس ضربت لي ام ياسمينه و كلمتها انو لازم نستعجل موضوع الخطوبه .. امي دخلتها خوفه غريبه من انو سندس تكون البنت البتشيل الولد من اهلو .. دخلت اوهام لي نفسها انو سندس ح تكون عملت عمل و سحر عشان تربط رياض .. ختت افكار انا عارف انها بتودي للهلاك بس الشيطان لمن يتحكم في مخ زول تاني ما بسيبوا ابدا ابدا .. اليوم التاني ضربت للوكاله و عزمت سندس للغداء ما كنت عارف تفاصيل الغداء ولا سندس ورتني انها معزومه عندنا ولا عارف انها لاقت ياسمينه .. مشيت المنظمه و تميت قروش العمليه كلمت زين اني عملت بي فكرتو .. زين الراسو بقى جاايط شديد و بوزن في امورو لي نفسو بعد الغداء و لمة امي مع سندس و ياسمينه من اليوم داك سندس ما بترد على تلفوناتي و انا ماعارف مالها فجأة ؟ اتغيرت ؟ في شنو ؟ حتى الوكاله بتغيب فيها كتير ؟ سألت نيرمين صحبتها في الوكاله و موظفه عندي سندس مالها المانع خير؟ نيرمين ورتني انو امي اتصلت للوكاله و اتكلمت مع سندس .. شلت تلفوني و ضربت لي لينه سألتها امي قالت ليها شنو ؟ ورتني انها عزمتها غدا و حصل فيهو كده .. ركبت العربيه و مشيت لحدي عندها في البيت .. كنت منتظر اشوفها لأول مره سندس تقابلني بالزعل ده لأول مره تكون ما طايقه تشوف خلقتي .. ركبت العربيه و هي زهجانه مني شديد كنت بحاول اوضح ليها اني ماعارف الحاصل شنو و اني ماعندي ذنب بس هي كانت مصره على موقفها انتهى نقاشنا بشكله و اي زول رجع مكانو .. قاعد براي بسجر و بفكر اعمل شنو و اتصرف كيف ! تلاته علب سيجاير ورا بعض و ماوصلت لحل .. بعد يومين قلت ارجع اتكلم معاها تاني سندس حنينه و انا عارفها .. اذا ساعدتني شوويه بس ح اقدر معاها نهدي امي بس كل المشكله انو سندس زاتها تخلي عنادها و تساعدني إتفاجئتا بي امي من بعيد واقفه بتتكلم معاها من خشم الباب .. امي الجابها شنو ؟ و عرفت كيف بيتها ؟ كنت عارف انها بتغلط في سندس لحدي ماوصلتا ليهم كانت سندس مدت يدها و ادتها كف .. سندس؟ كيف؟ مهما امي قالت من كلام كيف قدرت تمد يدها عليها اللحظه ديك ؟ ما كنت قادر اصدق اساسا انو البت الأنا شايفها بريئه وومسكينه تمد يدها على امي ؟ ياتو زول برضى حاجه زي دي ؟ رجعتا مع امي البيت و مافي زول فينا اتكلم حرف ولا اتناقشنا في حاجه .. عارف انو امي غلطت و سمعتها كلام فارغ شديد بس برضو ما اتخيلتها تتمادى للدرجه دي ؟ كنت زهجان وقرفان و ما طايق سيرتها .. شلتها من الوكاله نهائيا و جبتا غيرها بنت تقريبا القصه اتسربت للوكاله و البنات عرفوا من منو ! اكيد حتكون لينه اختي حكت لي ميعاد لانها صحبتها و ميعاد ماكانت مصدقه تلقى فرصه في سندس ... ما كان هاميني كل الحاصل و القيل و القال بس كل المزعلني موقف سندس مع امي .. جاني تلفون من ناس المنظمه انو احدد ليهم يوم يسلموا فيهو سندس القروش هجتا فيهم و كوركتا لأني مديهم ليها قبل ايام .. قالوا لي جاهم تلفون انو القروش تتأخر شويه .. استغربتا من التلفون الجاهم بس عرفتا انو وراهو امي ! طيب امي عرفت المنظمه كيف ؟ ما كنت فاضي ادقق في التفاصيل دي ورغم زعلي من سندس امرتهم يمشوا يوصلوها بأسرع وقت .. بعد يومين و انا في المطار جاني تلفون من زين كلمني انو ساجد اتوفى
#يتبع
