بعد كلام ابوها السمعتو ده حسيت اني المذنب الوحييد في البحصل لي سندس ، ضعف شخصيتي و استحقاري بمشاعرها و اني عفصتا على قلبها اكتر من اللازم انا الخليتها تضوق الايام المره دي كلها .. اتاكدتا انها مما اتزوجت لحدي اللحظه دي ما شافت طعم للسعاده و لسه انا مقيد من كل النواحي ما قادر اسعدها ولا عندي طريق بجمعني بيها .. سألتا ابوها يا حاج انا المطلوب مني شنو ؟ قال لي خليني اتم ليك الباقي ، بعد ما متيم اتوفى و جات قعدت هنا الشهر الاول كلو زين ما سأل عنها .. الشهر التاني من تالت يوم فيهو جا و شايل معاهو ورقة طلاقها ! لآخر لحظات و لعد معاملتو السيئه سندس ما طلبت الطلاق منو ؟ و لا حتى انا قلت ليهو طلقها .. استغربت من ردت فعلوا الفجأة و تصرفوا الغريب اتخيل والله ياولدي رياض زين ده جا قعد زي قعدتك دي و طلع لي الورقه وقال لي دي ورقة بنتك خليها توقع عليها .. اتهجمتا والله شلتها من التربيزة و عاينت ليها لقيت مكتوب فيها طلاق رجعي اول سؤال سألتوا ليهو طلاق رجعي لشنو وانت قررتا تطلقها و براك ؟ السبب شنو ؟ قال لي السبب انها ما بتسمع كلام زوجها و هي ما زوجه مطيعه قلت ليهو بتين بنتي ما اطاعتك ، وقف على حيلوا بدون اي احترام اتنفض و قال لي الداير اقولوا قلتو خليها توقع ، قدمتو لحدي الباب و قبل ما يطلع قلت ليهو زين انا بحمد ربنا انو بنتي اتحلت منك انت ما الزول البتستاهلها ، دخلتا ليها هي جوه بعد داك راقده تعبانه كلمتها بتصرف زين العملوا " قتطعتوا و قلت ليهو يعني سندس مطلقه ليها شهر؟ " قال لي اي ، كلمتها بالعملوا زين انهارت لي بالبكا و بقت تقول لي انا ما كنت عايزة الامور تصل للدرجه دي سألتها يابت احمدي ربنا الحلاك من زول زي ده متهور متسرع بفكر في نفسو ، زول اناني .. العشره دي ما بالساهل و الحياه طويله حتعيشي كيف مع زول زي ده غدار ما صانك ولا احترمك و بسرعه و تهور عمل الحاجه وختاك امام الامر الواقع؟ يابتي لو الزول ده لي قدام حصلت ليك معاهو اي مشكله يبقى هو ببساطه ح يسيبك ده ما زول طويله يا سندس ، المره بتعيش ورا ضل راجالها و تحت حمايتو انتي كيف عايزة تعيشي مع راجل اتصرف معاك تصرف زي ده ، قلت ليهو والله يا حاج انا ماعندي اي فكره انو زين اتصرف كده ليه ولا عارف انو قعدت سندس هنا قعدتها بطلاق ، انا قلت امر عليكم و اسال من صحتها و الله ده كلوو ما عارفوا صحي البيوت اسرار ... البشوف الناس و احوالهم من بره يتحسدوا سااي ماعارفين هم عايشين حياه مره كيف ، عموما ياحاج اعتبرني ولدك الحاجه الدايرها بس تقولها و بتلقاني عندك و ده رقمي ح اكتبو ليك في ورقه .. لو سندس تعبت ولا احتجتوا لي اي شيء حتى لو الوقت متأخر اتصل بي بس ، ودعتو و قمتا على حيلي مشيت البيت لقيت امي قااعده بتحضر في الصاله قعدتا معاها و شويه كده كنت متردد افتح الموضوع معاها بس بعدها قلت ليها امي عارفه انو زين طلق مرتو ! عاينت لي مخلووعه سندس ؟ ضحكتا وقلت ليها غريبه ! ما كنتي بتقولي مرتو .. لينه جات طالعه سلمت علي و قعدت ، امي قالت لي ليه مالهم ؟ لينه قالت لي في شنو يا رياض ؟ قلت ليها زين طلق سندس و خلفتا رجلي و رجعتا لي ورا الكنبه متكل عايز اشوف ملامح امي كيف ! قالت لي اتطلقوا ليه ، قلت ليها زي ما خليتهو يتزوجها وسهلتي ليهو كل الطرق اضربي ليهو تلفون و أسأليهو طلقها ليه ؟ و قمتا على حيلي طلعتا فوق لشقتي .. قعدتا افكر في كلام ابوها و زعلوا عليها ومرضها ، جاني احساس انا مصعب الدنيا علي ليه ؟ انا كنت بدعي انو ربنا ما يعلق قلبي ب حاجه هي ما حقتي و الحصل بعد كده انو الامور كلها بقت لصالحي و دي براها حاجات بتدل انو هي حقتي❤ ليه اخضع لقوانين و عادات فرضوها الناس ، ليه اراعي لعلاقات و وجود ناس و اخاف من القيل و القال و الناس ما خافوا علي ! ليه دايما انا مراعي لي حاجات كتييييره ما مستاهله و حياتي ما مديها حقها ، قمتا على الحمام شلت الشفره و حلقت دقني المربى كتير ده ، معنوياتي كانت مرتفعه و حاسي براحه ما عارف السبب شنو بس في احساس سعادة كده واصلني من وين ؟ احتمال الاخبار السمحه السمعتها الليله ! ختيت خط يفصل حياتي الفاتت من حياتي الجايه ، ما ح اشيل هم لمشاعر زول و لا احرم نفسي من حاجه عشان خاطر زول انا اعز اصحابي عمل فيني كده ، ما ح يكون جواي في رحمه لي زول .. العملوا زين كفايه جدا عشان يوريني حاجات كتيره ، مرحلة الحياه الصعبه العشتها يمكن كانت بسبب الذنوب و الاغلاط الكتيييره العملتها ما انا براي سندس زاتها غلطت ، ودفعنا تمن العملناهو نحنا الاتنين عشنا مرحله حياه بائسه كان ممكن يجينا اكتئاب او نموت بسبب وجع القلب و الفتره العوييصه دي فقرررتا اني ح اعيش حياتي الجايه لي انا ، يومين ما قابلتا امي و كانت شايله هم الطلاق اكتر من زين وسندس😂✋ عارفها مالها وعارف التوتر اللهي فيهو من شنو .. عارف افكارها هسسي بتروح و بتودي لشنو .. مره جيت راجع من الشغل حللفت الا تقعد تتغدا معانا يارياض فقعدتا معاهم على صينيه واحده ، كانت بتعاين لي و متردده تفتح الموضوع و بعدها سألتني رياض ما في اخبار من سندس؟ باقي ليها كم و تطلع من العده ! ضحكتا وقلت ليها و الله يا امي ماحاسبها ليها بس تقريبا باقي كتير ، قالت لي و انت ما ناوي تصالح مرتك و ترجعها ؟ عاينتا لي لينه و سألتها اتكلمتوا مع ياسمينه ؟ قالت لي لا قلت لي امي طيب في شنو ؟ قالت لي انت المزعلها و هي اتطلقت منك عشان زعلانه بس صدقني انت لو راضيتها بترجع بسهوله انا بعرفها ، قلت ليها امي دي حياتي وانا ما مرتاح معاها ولا هي مرتاحه معاي قالت لي انا قلتا شنو هسي بس دايره مصلحتك والله يا رياض ، قلت ليها يعني كل ما اروق و اقعد معاكم تفتحوا لي مواضيع العرس ؟ قالت لي يا ولدي انت لسه صغير يعني ح تقعد لينا كده لبتين ؟ عايزين نشوف اولادكم بعد ده ، قلت ليها اولادنا ؟ قالت لي اي انت و ياسمينه يا رياض .. الله يرضى عليك يا ولدي تمشي ترضي مرتك دي و ترجعها بعد ده .. والله المشاكل دي كلللها عاديه شدييد و بتحصل بين اي اتنين ، امشي صالح مرتك و رجعها ماعرفتا ارد ليها بشنو الا انو نبرة الخوف كانت ظاهره في كلامها ابتسمت ليها وقمتا من الاكل قلتا ليها انا شبعتا الحمد لله يا امي ..
#يتبع
