مريودتي

٢

" الدنيا ليل و انا والخليل جالسيين سوا 💕" الغنيه الكتا انا و زين اول ما نتلمى نسمعها ، مستمتعين بالقعده في اوزون و بنشرب في قهوه مع الجو السمح داك و مولعين سجايرنا ، قلت لي زين امي تاني فتحت لي موضوع ياسمينه و انا والله قرفتا زاتو من العرس ، سألني رياض انت ما عايز تقعد مع البت دي مالك ! كدي حاول مره اتونس معاها و اخد و ادي معاها في الكلام يمكن ترتاح ليها ، ماهي امك دي ما ح تفهم ليك انك داير حاجه معينه بتفتش عليها بتشوف من وجهة نظرها ياسمينه جميله و ذكيه و بت ناس تاني شنو ، ده تفكير الأمهات وما ح يتغير بعدين انت بلمة المزز الفي الوكاله ديل و الله ليك حق تتجهه في العرس ياصحبي😂 قلت ليهو زين و الله ما ناقصك براهو راسي ده عايز ينفجر من النقاش ، قال لي و الله يارياض اقول ليك حاجه انت ما عندك حل غير ياسمينه ، قلتا ليهو زين انت ماعندك مشاعر اتجاهها ! ضحك و قال لي ده زمان ياخ ايام كنا برالمه هسي والله اتطمن سااي و خش في العلاقه دي برجلك اليمين انا ما عندي ولا ذرة حاجه اتجاه ياسمينه ، قلت ليهو ياريت لو كان لسه عندك كان فكيتني من الهم و النقه بتاعت امي دي ، ضحك و سكت ما اداني اي انطباع تاني قلت ليهو عارف يا زين في وحده شفتها في جامعه السودان لمن مشيت لي لينه ، و تاني اتلاقينا صدفه بت جميله جمال ماشاء الله 💕 قال لي طيب حصل شنو ! قلت ليهو طفشت ياصحبي ، تخيل بس اني ما شلت رقمها قعد يضحك وقال لي غريييبه دي والله ياخ انت في بت بتمر من جنبك بدون ما تشيل رقمها ولا تخليها هي تشيل رقمك ، قلت ليهو والله براهم عايزاات الرقم في واحد برفض يدي وحده سمحه رقمو ! قال لي في ! قلت ليهو طبعا مافي ، وقعدنا نضحك 😂😂 ما كنا ملاحظين انو في تلاته بنات من ورانا راميين اضانهم جوه التربيزة و سمعوا الونسه كلها، زين لاحظ ليهم بحمروا و بقلبوا في عيونهم قال لي رياض شكلو احنا وقعنا ياعمك قلت ليهو مالك ! قال لي في تلاته طيارات ورانا 😍 المشكله انهم سمعوا تريقتك على البنات ، قلت ليهو بعاينوا لسه ؟ قال لي اي بعاينو , قلت ليهو اسمع طيب انا بقوم من مكاني امشي العربيه و انت خليك هنا ، عاين للبتعجبك شديييد كده براها ح تجيك و تخترع موضوع معاك، قال لي رياض و انت تمشي وين قلت ليهو ح ارجع ليك بس اهمل القلتو ، مشيت خليتو وراي و فعلا الغبي قعد يعاين و أساسا البت كانت هايجه من السمعتو 😂😂 قامت من مكانها جات قعدت في وشو قالت ليهو خير! و رفعت حاجبها بقى بتمتم ماعارف يمشي وين ، قال ليها مالك ! قالت ليهو بتعاين لينا من قبيييل شايفاك في حاجه ! قال ليها لالا قالت ليهو طيب ممكن تغير نظراتك دي لأنو فلقتنا بالتنيح ! ، وقامت مشت طوالي زين شال تلفونو وضرب لي ، رياض يا كلب اسمعني انت وين ! ضحكتا وقلت ليهو راجيك بره يا زول في شنو قال لي لكن ما عملتها فيني ، جاني بره بضحك و لقاني بضحك فيهو قلت ليهو الوداك تسمع كلامي شنو بس😂😂 عموما خليك عارف بنات السودان ديل كلهن لئيمااات و قطيمات 😂 قال لي والله البت قربت تاكلني عديل مقلعه لي عيونها قدر ده .. وصلت البيت اخدتا لي حمام و طلعت الصاله كنت بحضر في الاخبار ما عارف الذكرني بي سندس شنو 💕 اتذكرتا ضحكتها في العربيه و احنا ماشيين اتذكرت لمن بسأل فيها و هي بترد بخجل 💕 ليه ما بتشبه بقية البنات ، ست البنات 💕 بقيت بتبسم برااي و انا بتذكر فيها بت بسييطه ياخ💕 امي جات لقتني قاعد في الصاله قالت لي خير ! شايفاك بتبسم زي المجنون ! قلت ليها لاحول ولا قوه الا بالله البتبسم في البيت ده مجنون يعني😂 قالت لي رياض انت ليه مصر تغضبني منك ! قفلت التلفزيون و عاينت ليها قلت ليها غضبتك في شنو يا امي ! قالت لي الله يرضى عليك لو اديت نفسك فرصه و اتعرفت على ياسمينه دي فيها شنو بس ! قلت ليها امي و الله العظيم انا البت دي ما بعتبرها حاجه غير اختي يعني لو غشيت عليك و مسكتا التلفون واتكلمتا معاها و طلعنا ، اغش على نفسي كيف ؟ قالت لي رياض ادي البت فرصه ، قلت ليها حاااضر مش عايزه كده من بكره بعد ارجع من الشغل ح اسوقها و اطلع معاها مشوار و احاول اتفاهم معاها قالت لي بس اي الله يرضى عليك ، مشيتها و قلت ليها سمح و انا ما عندي نفس للطلعه بس عارف امي ما حا تفهم لي حاجه تانيه غير اني اطلع معاها ، بعد الشغل فعلا اتصلت ليها تلفون و عزمتها غداء بره مشيت لحدي بيتهم سلمت على امها و سقتها ، طلعنا ناكل سمك اكتر حاجه بحبها ، سألتها اها الشغل ماشي كيف ! ياسمينه عمرها 24 و أنا 29 سنه ، اتخرجت و اشتغلت مديره لفندق ابوها من بعيد و مذيعه دارسه اعلام وعلاقات عامه ، بحكم انها مذيعه فأي مشوار بطلعوا معاها كان الناس بتلموا و بعاينوا و بعلقوا
طلعت كم إشاعه قبل كده في الجرايد اني خطبتها ، بس هي نفت الكلام ده في التلفزيون كانت بتوضح على مواقع التواصل اننا اصدقاء مقربين ، طيب و محاضرة امي الصباح دي لزومها شنو 😒 كنت حاسي بمشاعر ياسمينه اتجاهي و انها برضو نفسها تسمع مني كلمة دايرك ، ليه البنات قايلين انو الكلمه دي بتتقال بالساهل كده ! يمكن لأنه البت بتحس انها بتريد اي زول بسرعه بس المشاعر مختلفه عندنا الرجال ، ما بالساهل نحب و نريد و الاهتمام يطلع مننا الا لوحده نحنا نحس بإنها بتستاهل السماء و نجومه ، بس الفرق انو البت بتقدم لأي زول مشاعرها و اخلاصها و اي شيء بتقدر عليهو بس عند الراجل الموضوع بفرق ، حاولتا اقرب من ياسمينه و احاول اشوفها بزاويه تانيه بس ما قدرتا مرت الشهور و نقة امي ما وقفت ، كنت بحاول القى شغل يناسب لينه و وضعها الصحي زوله عندها السكري و جاها من هي صغيره ما ح تتأقلم الا في اماكن معينه ، الحاجه الما كانت قادره تستوعبها لينه ، كل يوم بتجوط و بتقول لي عايزة امسك واحده من وكالاتنا ، لينه اختي الصغيره القريبه لي 💕 بعد ما ابوي مات و بقيت بالنسبه ليها ابو و اخو و اي حاجه ، كنت بحس بالمسؤوليه اتجاهها اكتر من اي وحده في اخواتي ، جاها السكري من هي صغيره و كل مره ماشي متأزم معاها 💔 كم مره مشيت شلتها غمرانه من البيت و جريت بيها المستشفى ، ما كنت بحب ازعلها و لا بحب زول في البيت يزعلها ، كلنا كنا حذرين من زعل لينه لأنو التوتر ممكن يدهور صحتها اكتر و اكتر ، مع زحمة الدنيا و المشاغل انا ما نسيت وش سندس 💕 البت دي ما قادر اشيلها من راسي ، يمكن لأنها اول حاجه تعجبني و تفلت من يدي ! ، الجامعات انتهت و الناس نزلوا شغل و ناس خدمات و مالاقيتها تاني ولا بالصدفه ، يادوب حسيت بيها ضاعت 💔 ، ك يوم عادي و ممل و روتيني كنت ح امر على الوكالات اتطمن الشغل ماشي كيف و بعد كده امشي المطار كان عندي رحله ، مريت على الوكالات ولمن وصلت وكالة بيسان اتكلمت معاي وحده من البنات الشغالات قالت لي انو في بنت اتصلت و قالت عايزة تتواصل معاك ضروري ، انها الحت تصل ليك سألتها اسمها منو ! قالت لي سندس ، ما كنت قادر استوعب سندس زاتها ؟ متذكر اني استعجلتا و كتبتا الرقم بسرعه لمن البنت كانت بتعاين لي😳 مافي وحده فيهم بتعرف رقمي الخاص ، من استعجالي عرفت انو البت دي مهمه جدا ، وصيتها انو ترجع ليها و تديها الرقم 💕 .. لو كانت عارفه اني منتظر التلفون ده شهور ! انتظرت ساعات و ما اتصلت ، مشيت المطار لأنو وراي رحله لبست و كنت قاعد مع واحد من الكباتن بنتناقش في موضوع ، جاني تلفون من رقم غريب شلت تلفوني و مشيت بعيد رغم انو مواعيد الرحله قربت الا اني رديت 💕 كنت عارف انها سندس ، رديت عليها و قالت لي انها سندس ! حاولت تذكرني بي روحها لمن ضحكت 💕 مفتكره اني بضحك عشان ما عرفتها ، و هي ماعارفه اني كنت راجي سكه توصلني ليها من بتين ، قالت لي انها عايزاني في موضوع و قلت ليها تكلمي لأني مستعجل ، ما كانت عارفه انو ده اول تلفون انا ارد عليهو والرحله باقي ليها لحظات ، دائما ما بكون معزول بعيد من التوتر و الجوطه ، قفلت الخط ! سندس😳 عرفت انها زعلت لمن قفلت في وشي ، صراحه كانت اول بت تقفل الخط في وشي بعد لينه المتعوده تقفلو😂 ، استغربتا من موقفها ! ضايقني موقفها لأنو لو دل فبدل على انو اخلاقها ضيقه ! طلعتا الرحله و ما كنت ناوي ارجع ليها بتلفون ، بس لمن انتهت و رجعت تاني السودان اول ما نزلتا من الطياره و رجعت البيت ، شلت تلفوني و دقيت ليها كان الوقت متأخر بالليل بس ردت علي سمعتا صوتها💕 ال كنت بفتش فيهو شهور ، قالت لي انها محتاجه لي خدمه و انا كنت بسمع في صوتها للحظه نسيت حركتها ! البت دي فيها سحر غريب ياخ ، بتخلي الواحد يتجاوز عن عيوبها ويشوف محاسنها بس ولا هي كلها محاسن💕 قلت ليها ح اشغلك في وكالتنا اذا عندك رغبه ! كنت بتكلم معاها برسميه و تهذيب ، و انا طبيعتي ما كده بس مسكتا نفسي قدام صوتها ، لو كنت رياض و هي كانت وحده تانيه ، موقف زي ده كان ممكن اجوط و اسمعها فارغ و اقفل قبل ما تقول حرف ، بس ماعارف المره دي مالي😂 احساس غريب كده لمن تتأدب فجأة قدام زول ، اديتها مواعيد مع الوكاله و وصيت عليها البنات ، جدول الشغل ما كان بسمح لي اتجاوز اليوم البمر فيهو و امشي قبليهو و انا لو بي يدي امشي اشوفها من بكره❤ انتظرتا المواعيد ال حأمر فيها على وكالة بيسان بفارغ الصبر عشان ح اشوفها هناك ، ك كل مره بدخل الوكاله برسميه و جديه سلمتا و كلهن ردن السلام كانت هي منزله راسها بس لمن دخلتا رفعتو ❤ قعدتا مع ميعاد عشان توريني التفاصيل و انا بالي هناك معاها كانت ميعاد بتتكلم كتير لكن قالت شنو مابعرف , بالي هناك مع سندس لخمتني و هي بتحرك في ساعتها و تسريحة شعرها و جكت البدله الكان مفصل على تفاصيلها ، ماقدرت استمر في القعاد مع ميعاد و قمتا منها لا إراديا كده لقيت نفسي واقف جنب مكانها بمسي عليها و بسألها الشغل ماشي كيف ! ردت علي و هي مبتسمه 💕 بقيت بسأل فيها و بكتر أسئلتي عشان ترد علي و اسمع صوتها لسه ❤ لحدي ما حسيت اني طولتا في الكلام و انها ح تلاحظ بعد ده قمتا على حيلي منها و ما كان نفسي اقوم ... ما عااارف الأسبوع مره كيف و الايام جرت ، ما قادر القى طريقه اتكلم معاها , ما كنت داير نبدا قصتنا كده بس بديناها كده ، مشيت المطار لقيت واحد من ضباط الامن منتظرني ، زول كبير كده في الشغلانيه دي و عندي بيهو معرفه قويه ساقني للمكتب و طلع لي جوازات سفر للعمره وراني انو الاجراءات فيها تزوير
و انا عارف انو حاجه زي دي ما حصلت قبل كده في الوكاله ، بعد عرفتا الحاصل اتصلت على ميعاد و قلت ليها اني جاي كنت منفعل و شايف الدنيا دي سوااد في وشي، انا زول كده انفعالي و عصبي و مابتحكم في نفسي بروق بس بعد ما اجوط الدنيا ، وصلت الوكاله و انا غضبان جدا جدا ، دخلت جوه سألت ميعاد من العمل الإجراءات منو ، ما ختيت في راسي انها سندس نهااائيا ، سندس دي بريئه وشها زاتو بريء كيف تعمل حاجه زي دي! ناديتها للمكتب جوه بعد ما جطتا و انفعلتا بره فيهم كلهم و فيها هي بالذات ، دخلت المكتب و كان باين انها زعلانه ، كان بإمكاني اتجاوز غلطها و اخليها تستمر في الشغل بس مابقدر اعمل حاجه كده و البنات بره عرفوا الحاصل كلو ، اضطريت اطردها و انا ماهاينه علي زعلتها حتى ، عارف اني اتعاملت معاها بقسوه شدييده و هي يادوب تشتغل ! زعلت من نفسي على معاملتي ليها بس مابقدر اتراجع عن قرار طردها ، مشت لمت حاجاتها و طلعت ، بعدها ماشفتها نهائيا تاني 💔 الايام رجعت ممله زي ما كانت ، بقيت ما بمر كتير على الوكاله لحدي ما جا اليوم العرفتا فيهو اني غلطت كمان في حقها ! زوله زي سندس كان ظاهر في وشها الكبرياء و عزة النفس ، زوله زيها ما ح ترد على تلفوناتي و انا عارف كده ، لمن ردت لي صحبتها إتأكدتا انها مصره على عدم الرد ، مدير وكالات لي اكتر من تمنيه سنين ما حصل قبلت اعتذار موظفه عندي ، تجي وحده بكل سهوله تكسر قوانيني وتخليني امشي لحدي عندها في البيت و اراضيها 💜 عرفت عنوانها و مشيت اقابلها ، محظوظ انا من قسمتي اشوف الجمال ده كلو ، قعدت معاها في الصالون و انا عارفها صاره لي ما راضيه ، كنت بعاين لملامحها دي ، بت عندها الجرأة تقابل زول من غير ولا نقطة ميك اب ❤ بنت قاعده قدامي بشعرها الما مسرح و بكل ثقه ولا فارق معاها اي شيء ، بت عندها ثقه في روحها زيها كده ما لاقتني 💜 ...

يا جماعه #مريودتي قصه جديده و تفاصيلها جديده، اكيد ما حتكون بنفس تفاصيل سمراء 😂😂 ولا تكمله لسمراء ، تموما كلامي ده ح يتفهم ليكم لمن تقروا كم حلقه فيها بعد كده الفكره ح تدخل ليكم ، الناس القروا فلتغفري و احببتك اكثر مما ينبغي الاتنين ح يكونوا فاهمين #سمراء و #مريودتي
💜