عارف يعني شنو ساجد بالنسبه لي سندس .. عارف كمان انها ح تكون بي ياتو حاله هسي .. زعلت لموت ساجد انا برضو لأنو اخر موقف لمانا سوا انا كنت بنهر في اختو قدامو 💔 انتظرت يومين بعد العزا و مشيت تالت يوم .. وصلت بيت العزاء نفسو ولاقيت امل في الباب شلت ليها الفاتحة و قعدتني بره في الشارع في كراسي البلاستيك .. سألتها سندس وين ؟ قالت لي والله تعبانه يارياض و محبوسه في غرفة ساجد الكان بنوم فيها كل الناس الجو للعزاء ما لاقوها ابوها مانع منها الناس لأنها للآن منهاره .. كنا في المستشفى و جينا راجعين امبارح ؟ قلت ليها مالها ؟ قالت لي انهارت لحظه الجنازه شالوها ودانا زين صحبك و جينا راجعين .. قلت ليها ايواا سلامتها ان شاء الله قالت لي اشرب يا رياض الشاي ما يبرد قلت ليها طيب انا ما ممكن اشوفها هسي ؟ قالت لي لا يا رياض هي اساسا زعلانه منك و حاليا وضعها ما بسمح انها تنفعل .. انا ما عايزاها تتنكس تاني يارياض قلت ليها مقدر خوفك على صحبتك .. ابتسمت وقالت لي اشرب الشاي طيب .. قلت ليها امل ليه اتاخروا في العمليه ؟ لسه ما تموا القروش كانوا ولا شنو ؟ قالت لي والله يارياض لسه كان باقي المبلغ ما كمل و هو فجأة تعب وديناهو المستشفى ام ساجد كانت بتبكي عشان يعملوا ليهو العمليه بس الدكتور قال لو ماعندو ملف ما يدخل .. قلت ليها للدرجه دي ؟ قالت لي والله معامله اكعب من الزفت ، رياض ده لو زول من مستواكم او لو ساجد كان من اهلك كانوا عملوا العمليه بدون تردد لانهم ضامنين الناس بس لأنو ساجد و اهلوا ما قدر المسؤوليه دي .. تاني كررت سؤالي ليها للتأكيد قلت ليها المنظمه الكانت سندس حكت لي عنها و انها ح تساعدهم ما قدرت تلم باقي المبلغ ؟ قالت لي ما قدروا يا رياض بس ياهو النص الاول داك .. قلت ليها ايواا خلاص تمام يلا انا ح اقوم امشي خليني اقابل امها و ابوها قالت لي طبعا ح اناديهم ليك .. دخلت جوا نادتهم في الحوش وسامعها بتقول ليه ام سندس ومرت ابوها البسوا كويس بعد كده طلعت نادتني دخلت جوا بيت رشيده في الحوش شلت الفاتحه ليهم و لي ابو سندس.. طبعا امل قالت ليهم ده مديرها في الشغل ف عشان كده احترموني ورحبوا بي .. كل الزعل الجواي اتجاه سندس انتهى اللحظه ديك كان نفسي اشوفها و اخليها تكورك وتنفعل و تفش غضبها بس ما تكتم زعلها 💔 خفتا عليها من الزعل الكتير ورا بعض تحصل ليها حاجه خفتا شديييد .. تفكيري كلو كان هي كيف ؟ بتفكر في شنو ؟ بتبكي قدر شنو ؟ لمن جاها الوجع ما لقتني جنبها ؟ اشتقت ليها شديييد و حتى موقفها مع امي نسيتو بس هي تطلع و اتطمن عليها بقيت بطول في الكلام مع اهلها و بحكوا لي ساجد اتوفى كيف بس برضو هي ولا بالغلط طلعت .. لحدي ما قمتا امشي و انا طالع للباب شفتها 😍 بعد كم ! فترة غياب ! كان نفسي اللحظه ديك امشي عليها بس .. لو اهلها و امل والناس يختفوا ويخلوني معاها أقعد معاها و نتفاهم .. اوريها اني ما قادر اسيبها و دايرها ❤ لساني كان مربوط ورابط جواهو كلام كتييير ليها .. هي فتحت شباك الغرفه الهي فيها شفتها لمن فتحتو ورجعت ماعينت ببره💔 لو عاينت كان لقتني واقف جنب الباب .. اكتفيت بشوفتها الصغيره دي و طلعت و انا سايق في الطريق لسه بفكر فيها ماقادر اشيلها من راسي و انا كنت قايل نفسي شلتها زمان ! الزعل و الغضب منها كلو راح لمن شفتا عيونها الهلكااانه من البكا و خدودها المورمه و حاجبها المصرور دايماً .. وصلت الوكاله و انا في المكتب بفكر ليه القروش ما وصلت اتذكرت اني تاني نبهتم حتى و انا متشاكل معاها ! ركبتا و مشيت للمنظمه .. قعدت مع مدير المنظمه و سألتوا انا نبهتا عليكم القروش تصل في مواعيدها ما وصلت ليه ؟ قال لي انو جات امي و ورتهم انو القروش تتسحب و انو نحنا غيرنا راينا قلت ليهو و كيف تتصرف كده من غير ما ترجع لي ؟ قال لي يا استاذ امك الجات و القروش مسحوبه من البنك نص من حسابك و نص من حسابها .. ما كان في فايده لو انا قمتا و جطتا فيهو قمتا على حيلي و مشيت ركبتا العربيه وانا زعلان شديييد من امي كيف تعمل كده ؟ مشيت البيت غضبان منها اول ما لاقيتها في وشي كانوا مجهزين الغداء وعايزين يتغدوا معاها اخواتي .. ما كنت فاهم شي غير انو نفسي يكون قدامي كمية قزاز اكسرو بس و اتفشى .. وقفت قدامها سألتها اتصرفتي كده ليه ؟ قالت لي رياض اقعد اتغدا .. قلت ليها اتصرفتي كده ليه .. عاينت لي و حمرت عشان اسكت لانو اخواتي و لينه بالذات قاعده و انا لسه بسأل ما هميني زول قلت ليها الولد مات ارتحتي ؟ قامت وكوركت ما يموت ! انت كيف عايز لسه تتكلم و تساعد البت الضربت امك كف ؟ كيييف ؟ قلت ليها بكواريك ما تلخبطي المواضيع سحبتي القروش عشان ساحب من حساب ابوي .. ده ابوي ! طيب مش بقى فيها حسابي و حسابكم ؟ اعتبري انو ولدك مات زي ما ساجد مات بسبب عنادك .. للحظات نسيت اني بكلم امي وطريقة كلامي معاها كانت زي موظفه بتشتغل عندي نفس الزهج و نفس الاسلوب و الانفعال و انا زول كده عصبي ياخ .. اتزهجتا فيها و ضربتا السفره الهم قاعدين للغداء فيها اخواتي كلهم كانوا بعاينوا مخلوعين ده رياض ! الا لينه جاتها حاله غريبه شديييد و هي بتعاين للنقاش الحاد بيني وبين امي طيب ياخ انا زول عصبي و الاعصاب الفي تلفتوها بتصرفاتكم معاي عايزين مني شنو تاني ! بعد كسرتا السفره في وشوشهن كلهن ما وعيت الا لي لينه وهي بتتشنج ! اول مره نشوفها و هي بتتشنج اختي الكبيره بقت بتكورك اسكتوا خلااااص حراااام عليكم خلااااص اسكتووو .. لينه كانت بترجف و اصابعها معوجه و عرقانه و شفايفها بتتهزز بسرعه .. كانت اول مره نشوف لينه تصل للمرحله دي .. جروا عليها كلهن و انا جريت للعربيه دورتها و جيت جاري شلتها و كان جسمها قوي ! كانها بقت تمثال متحجر ! لينه كانت متشنجه بطريقه 💔😢 دخلتني خوفه اللحظه ديك انها ممكن تموت في يدي ! ممكن تلحق ساجد ؟ كنت طاير طيران عشان اصل المستشفى .. لحدي ما وصلنها ودخلناها لدكتورها .. اخواتي كانوا ببكوا و امي ما فتحت خشمها ولا بكلمه معاي ولا نزلة دمعه كانت غضبانه شدييد غضبانه جدا .. الدكتور اداها حقن مهدئه وجا طالع ناداني انا و امي جوا سألنا مالها ؟ امي ما ردت .. قلت ليهو يادكتور شافتني بتناقش بس و كوركتا كنت منفعل و ما شايفها لمن بدت تتشنج عاين لي يدي قال لي مجروح ! قلت ليهو قزازة نادا الممرضه من بره عقمت ولفت لي يدي .. بعدها سألني رياض اخر مره قلت ليك شنو عن حالة لينه ؟ قلت ليهو عارف اي خلاص .. قال لي رياض اختك عندها انهيار عصبي و كل مره يحصل فيها نقاش كانت بتقع من طولها المره دي اختك انهارت وجاها تشنج وتقريبا حالتها ما حتتحسن اذا البيت فيهو كمية الضغوطات دي .. عاين لي امي وقال ليها ياحجه انا اخر مره شرحت ليك اعصاب بتك كيف و السكري بأثر عليها كيف ! اقل موقف هي بتشوفوا ح تنهار .. المره دي لحقتوها بس المره الجايه ممكن تشنج اعصابها ما يخليكم تلمسوها للأسف لينه عندها كهرباء زايدة في الجسم .. امي كانت بتعاين لي بطريقه بتوحي فيها انت السبب ما اتكلمت معاي انتظرت لمن الدكتور خلص كلامو و طلعت لي لينه تشوفها في الغرفه .. قعدت مع الدكتور و سألتوا لينه هسي وضعها شنو قال لي رياض لو وضع بيتكم ما اتصلح لينه ح تسوء اكتر و اكتر .. بترهق في خلايا المخ بالتفكير و التوتر الكتير .. حالات زي دي بتحصل كتير عندنا و نهايتها للأسف ممكن تأدي للوفاه في ثواني .. معظم الناس جاهلين النقاط دي و بشوفوا انو المشاكل جزء يومي من حياة الاسره .. لكن كترت المشاكل ممكن تدمر الأسره كلها و تنتهي منها .. بعد سمعت كلام الدكتور ورجعنا البيت امي و اخواتي كانوا مقاطعيني حتى لينه ! دخلت اسلم عليها قالت لي اطلع بره ماعايزة اشوفك .. كانت زعلانه و بتبكي .. الحاصل في حياتي شنو ؟ منو الحسدني على الحال الأنا فيهو ! و هو ماعارف حياتي ماشه كيف ! الحمد لله .. اسبوع بفكر اصلح الاوضاع كيف ! ما لقيت الا حل واحد .. مشيت دخلت لي لينه وهي مدياني ضهرها بس قلت اتكلم معاها و اوريها حياتنا ح تكون ماشه كيف لقدام ..
#يتبع
و من هنا ح نبدا في تفاصيل كتيره جديده
#يتبع
