من يوم عرفتها و انا حاسي بإحساس غريب إتجاها ، كلنا عندنا الزول القريب مننا و الصاحب البنحكي ليهو الحاصل اول بي اول ، أنا عندي زين اقرب زول لي رغم إننا عاملين خط احمر لعلاقاتنا بس المره دي حسيت اني محتاج اقول لي زول الجواي و كان زين هو المستمع الوحيد ، اتلاقينا في الكافي بتاعنا و بديت احكي ليهو عن سندس ، كنت بحكي ليهو عنها بشوق كده و هو بسمع فيني ، بوصف ليهو قدر شنو هي بت جميله و راقيه و بسيطه وريتو الصور بتاعتها لمن كنا في شارع النيل وعملت لي القهوه من يدها 💕 وريتو كيف راضيتها ومشيت لحدي بيتها عشان تجي راجعه ، بقولوا إنو الشيطان بدخل نفسك في الحاجه للحظه كده ، زين كان منتبه لي و انا بحكي عنها و مشدود لباقي تفاصيلها ، شافها قبل كده في الوكاله مره وحده لمن مشى يحجز و المره التانيه شافها في تلفوني لمن وريتو الصور ، يمكن لأنو شخصيتها بتخلي الزول ينجذب ليها ! زين كان بنتبه بطريقه عجيبه كده لمن احكي لي موقف او حاجه حصلت لي مع سندس ، وريتو وضع اهلها و الفرق كان واضح حكيت ليهو عشان يلقى لي حل ، ما كنت متوقع في يوم حلو يكون بالطريقه دي .. بتذكر مره حكيت لي سندس عن زين في العربيه و هي ضحكت و علقت عليهو، اللحظه ديك اول مره احس بالغيره اتجاه صحبي لأول مره ! قلت ليها ما تتكلمي عنو و تمدحيهو قدامي ، استغربت مني لأنو صاحبي بس اتفهمت مشاعر الغيره الظهرت في ملامحي فجأة اول ما سمعت سندس ، بديت احس انو زين مهتم بي سندس و بسألني منها كتير ، قررت احتفظ بتفاصيلها لنفسي و ما اتكلم عنها قدامو .. احساسي بأنها حاجه حقتي و بتخصني احساسي ده خلاني اقرب منها لمن كنا في العربيه سوا ، و كأني طفل عايز يشم ريحة امو و يقول ليها بتحبيني قدر شنو , ما حتفهم لخبطة احاسيسي دي لأنو بالنسبه ليها انا بلعب بيها ، زعلت عدى اسبوع و هي ما بتتكلم معاي ، حاولتا افهمها اني عملت كده عشان بريدها و ما حتفهم لأنها بنت ، تقريبا فترة الإسبوع البعدت فيها سندس عني حسيت بي إنها حاجه مهمه شديد في حياتي ، لأول مره بديت افكر في العرس بشكل جدي لأول مره بديت احس اني محتاج لي وحده تشاركيني حياتي ، الإحساس ده ما جاني الا لما دخلت حياتي هي 💜 بعد اسبوع رسلت ليها رساله محتواها " اني عايزها معاي للآبد " وافقت بعدها تلاقيني متذكر اننا طلعنا مشوار و كان احلى و اطول مشوار بنتذكرو نحنا الاتنين ، سميناهو يوم الرجوع 🌹 من الصباح مشينا جبل اولياء المكان كان اغلبيتو للآسر بس نحنا الكنا اتنين ❤ قعدنا في خيمه في الارض و طلبنا السمك كصدفه زي صدفه لقياها سندس بتحب السمك زيي ، اكلنا السمك و بعدها نعسنا بقينا بنعاين للبحر و هي كانت بتضحك قالت لي السمك ده شكلوا فيهو حاجه 😂😂 قلت ليها انا حذرتك ما تشربي الشربوت ده بعدوا في زول بعمل كده ! سألت الولد الجابوا لينا الشربوت ده عملتو بتين ؟ قال لي طول والله ما شامي الريحه دي كيف ، كانت بتضحك 😂 كل ما اعاين ليها بتضحك من غير سبب كويس اني ما شربت معاها ، اتكلت في العنقريب المختوت في الخيمه و بقت بتعمل لي بي يدها فتحي ياوردة غمضي ياورده 😂 قلت ليها سندس انتي كويسه ؟ قالت لي اي والله سامعاااك 😂😂 اتاكدتا انها ما كويسه بعد الرد ده ، قعدتا جنبها خايف منها تعمل حاجه 😂 زحيت بعيد شويه قالت لي تعال اقعد جنبي و اشرت بيدها في الارض عاينتا ليها وانا ما واثق منها تعمل شنو قلت ليها بضحكك ده ! خليني بعيد احسن ، صرت لي وشها و قبلت على العنقريب بعدها قامت فوق و رقدت فيهو و هي بتعاين لي و بتتبسم قلت ليها انتي شايفه ملك الموت يابت😂😂 و لاكأني بتكلم شكلها طشت شبكه خلاص بالبتاع الشربتو ده ، اتمغت و ضمت رجلينها على يدينها زي ضمت الجنين 💜 ونامت ، اول مره اشوفها و هي نايمه 💕 بعفويه كده ! نامت بكل بساطه، قعدتي كانت واحده في الارض و انا بسجر و بعاين ليها نايمه فوق العنقريب زي الاطفال ياخ 💜 ليه ما بتشبع البنات ! لو كانت وحده من البنات البعرفهم كانت خافت على شكلها ح يكون كيف و هي نايمه
كانت خافت على ملامحها تتغير مثلا ، بس لأنو سندس طبيعيه بي اي شيء بتعملوا 💜 تصرفاتها عفويه بالطريقه دي ، انا قاعد بعاين ليها و هي نايمه لا رفعت تلفون ولا اتكلمت بواتس ولا حاولتا اصحيها ، رجليني خدرو و انا ماحاسي بي اي شعور ، كملت علبة سيجاير و برضو ما منتبه ليها ، لحدي ماهي صحت بعد ساعة و نص قلت ليها صباح الخير💜 ضحكت و اتمغت وتاني اتثائبت قالت لي صباح شنو الدنيا ليلت ليه ما صحيتني ؟ المغرب قررب سجمنا😳 قلت ليها ما كنت عايزك تصحي اساسا بعد النومه دي 💕 ياريت لو اليوم بطول و انا اكون قاعد بعاين ليك و انتي نايمه كده قدامي، خجلت و أول مره اشوفها تخجل بالجد قلت ليها اتخيلي انو اليوم ده انا عندي اسمح من اي يوم طلعت و نزلت فيهو ، يوم عندي بي الف يوم 💕 كانت مبسوطه و هي بتسمع في كلامي ، قالت لي قوم طيب خليني نمشي البيت ، ركبنا العربيه و كانت مبسووطه بتعاين للناس في الشارع بي ابتسامه كده حلووه ، قلت ليها لمن اجيكم البيت ح تعملي لي كيك و شاي ! قالت لي لا ح اعمل ليك قهوه بس ، قلت ليها يعني انتي ما بتعرفي غير القهوه و غاشاني وخلاني اجي اتقدم ليك مش ! قعدت تضحك و قالت لي انت بس ما عارف ابداعاتي كيف، تعال اتقدم اول و الباقي هين ، رجعت شعرها بيدها و بقت بتهبش فيهو 💕 قلت ليها سندس العرس بقتل اللحظات الحلوه ؟ قالت لي انت متخوف من فكره العرس ! قلت ليها ده سؤال بس ! قالت لي اللحظات الحلوه ما بتموت يارياض مابتموت حتى لو الناس انفصلوا عن بعض في ذكريات ما بتنتهي لمن نحنا نموت معاها ، مسكتا يدها اللحظه ديك لثواني بس 💜 لأنها كانت بتسحبها مني في لحظات ، قبل ما تسحبها قلت ليها انا ما عرفت معنى الريدة الا معاك ، ما اتمنيت حاجه و اتلهفت ليها الا انتي ، ماعارف ليه كانت فاقده الثقه في كلامي لأنها سحبت يدها وقالت لي و لو حصلت ظروف منعتك ! قلت ليها انا مش نويت العرس مافي ظروف ح تمنعني تاني ، قالت لي و اهلك ؟ قلت ليها خليهم علي ، يمكن انا الكنت على نياتي اكتر منها و من اهلي ، انا الكنت مخدوع بيك ياسندس و بي نواياك ، وصلتها البيت كان يوم حلو و مابتنسي بالساهل من الذكريات الما بتموت ما كان يوم حلو و بس ، كان يوم وراني حاجات كنت مغشوش بيها .. رجعت البيت بعد وصلتها لقيت امي و اخواتي متجمعين سلمت و قعدتا معاهم ، قالوا لي رياض نحنا عايزين نعمل خطوه رسميه بعد ده عايزينك تتقدم لياسمين ، ضحكتا و اتعدلتا في القعده عاينت لي لينه قلت ليها ادخلي جوه ، و قبلت على امي قلت ليها انتو بتقرروا و تدخلوا في حياتي و كأنها حياتكم كلكم يعني منو الجاب ليكم سيرة اني عايز ياسمين ! قالت لي رياض الحب ما كل شيء مابالساهل نلقى بت مناسبه معانا ، قلت ليها ليه كل همك الوضع و المستوى! ليه ولا مره فكرتي ولدك ده نفسو في شنو ! قالت لي انت ما مرتبط قلت ليها منو القال ليك عشان ما بتكلم بي اي شيء ! العرس الدايراهو يا امي ده ، انا نويتو بس مع سندس قالت لي سندس منو ! قلت ليها وحده دايرها و لي فتره بحاول افتح الموضوع معاك بس بقول أأجلوا احسن شويه ، لكن بما انو وقتو جا ف احسن تعرفوا ، حكيت ليها عنك و انا مبسوط كنت بحكي زي الطفل البحكي عن مشوار بسطوا ولا هديه جاتو ، لاحظت لتعلقي بيك و لي تعابيري و انا بتكلم عنك ، الغيره 💔 الغيره الأنا ما كنت حاسب حسابها ، غيرة الأم على ولدها ، ولدها الوحيد المتعلق بيها لمن يتعلق بي وحده غيرها ، انا متأكد انو امي كرهتك من اللحظه الكنت بحكي ليها عنك ، تعابيرها اتغيرت. ،حست بالخوف ، ما لأنها وحده غير ياسمينه ، بس لأنو رياض بحكي عنها بي حب باين من عيونو ، الأم بتعرف جناها كويس ، أمي عرفت انتي بتعني لي شنو من اللحظات الأولى الكنت بحكي فيها، خليتني تميت كلامي و طلعتا فوق و احساس الغيره الإتملكها ما ح يطلع منها تاني ..
متذكر كيف كانت ملامحها لمن لاقتك ، ومتذكر كيف زعلت لمن تلفوني رنا وكانت جنبو ولقت الاسم مريودتي 💕 متذكر كيف وشها اتغير لمن سمعت يوم بقول ليك اشتقت ليك ، رضت بي انها تشوفك عشان كانت متشوقه تشوف البنت الخلت ولدها يفكر في العرس وهي كل يوم بتتكلم ليهو عن العرس و هو ماراضي ، كان نفسها تشوف البت الخلت ولدها يتغير في حاجات كتيره هي ماقدرت تخليهو يتغير ناحيتها ، احساسها بي انك خليتيني اتغير و اتعلق بيك خلاها تخت خط بينك وبينها خلاها تحذر منك قبل ما تقابلك ، قابلتك عشان كانت عايزة تشوف ملامحك الأنا حكيت عنها 💕 قعدت معاك و كنت ملاحظ لعيونها و نظراتها ، زي مابشوف غيرت البنات علي ، شفت غيرت امي منك ياسندس لمن لاقتك اول مره ، كانت بتتملقك بنظرات غريبه محيره 💔 ما قدرت اتبسط بالقعده لأنو قريت الرفض في ملامحها ، طلعتي من البيت و ما كنتي عارفه الحصل شنو من ورا طلوعك ، اول مارجعتا اتكلمت معاي ، كانت زعلانه متأكد انو زعلها ما على وضعك او مكانة ابوك ، زعلها كان من غيرتها لأنها شافت السعاده في عيوني قدر شنو لمن قعدت جنبك ، في شعور اسوء من انو امك ما تتمنى ليك السعاده ! مافي ياسندس متأكد ، اتناقشنا انا و هي و انتهى الموضوع بعناد مني و منها ، طلعت فوق شقتي ، جيت نازل بعد ساعتين ، كنت ناوي اراضيها و اهديها و اقول ليها حاولي تتعرفي عليها ، لقيتها مافي في غرفتها ! فتشت عليهل مافي ! طلعت بره لقيتها واقفه بتتكلم بالتلفون ، ناديتها امي امي ! ما كانت سامعاني عشان صوت المويه و الشجر ، قربت عليها سمعتها بتقول خلاص ياولدي يازين , قلت ليها امي ! بتتكلمي مع زين ؟ في شنو ؟ في الوقت المتأخر ده !
#يتبع
