عقاب بلا ذنب
الفصل(5)
**********************************
أنكس سليم راسه بضعف، وحزن وهو يستمع لكلمات أخته كاسكين حاد يغرس بقلبه.
نجوي: إيه اللي انت عملته ده؟ تقدر تقولي فرقت إيه انت عن توفيق؟
نظر لها بصدمه: أنا زي توفيق؟
نجوى بانفعال: أيوه مفرقتش عنه حاجه، هو استغل حبي ليه، وانت استغليت حبها ليك، ولعبت بمشاعرها، انت إيه يا أخي فين تربيتي ليك؟ بلاش دي، يمكن معرفتش أربيك، فين ضميرك، ده انت وكيل نيابه يعني قبل ما بتأمر بحبس حد بتتأكد أنه جاني.
سما جنت في إيه، إنها حبيتك؟!
أه هى ممكن تكون ساذجه واتصرفت غلط؛ لأن البنت مينفعش تطاوع حبها إلا لما يكون جوزها، كانت نجوى تتحدث بألم وحرقه وأكملت، بس أنا كمان غلطت زمان.
سليم تحدث من بين دموعه: لأ انتي كنتي متجوزه، ووثقتي أنه مش هيتخلى عنك.
جلست نجوى في الأرض وقالت: لا غلطت لما سمحت لقلبي يحب واحد متجوز، غلطت لما وثقت فيه.
سليم: وانتي هتتحكمي في قلبك ازاي، وبعدين هو وعدك واداكي الثقه، وبعدين خان.
نجوى: طيب سما حبييتك، وانت اديتها الثقه، ويمكن لان ملقيتش أم تنصاحها، أو أخ حنين يفهمها، انت استغليت ده.
انت لا يمكن تكون تربيتي، قرب منها سليم زقته بعيد عنها، وقالتله: انت مش اخويا اللي عاش معايا معاناتي، وبعدين يروح يوقع فيها بنات الناس.
اقترب سليم منها وأمسك يدها واخذ يقبلها: لا متقوليش كده يانجوى أرجوكي، أنا مليش غيرك، معرفش أم إلا انتي، أنا عملت كل ده علشان أكسر اللي كسرك زمان.
اللي اتجوزك وأتخلى عنك انتي وابنه، وعاش حياته مع ابنه التاني، صمت قليلآ ثم
قال: بس انا حبيتها والله، أنا بعد ما خرجت روحت جري وراها علشان أصلح غلطتي، وحبيت الأول أهدد توفيق بالورق العرفي علشان ميقدرش يرفض، بس القدر كان أقوى مني، نظر بتوهان لأخته ثم تابع: أنا خايف يانجوى؛ خايف تكون مااا ثم سكت ولم يستطع إكمال الكلمه.
احتضنته نجوى بتفهم لحالته وقالت: ربنا رحيم، قوم نروح نطمن عليها.
عندما وقفوا وجدوا من يقف امام غرفته، ودموعه تسيل دون صوت وينظر لهم نظرات حزن.
ثم اندفع لأمه وارتمى بأحضانها، وقال: انتي اتحملتي كتير اوي ياأمي، وكنتي دائمآ تذكري اللي المفروض والدي بالخير وانتي بتحكي عنه، لدرجة اني حبيته بدون ما أشوفه، واتمنيت إنه يكون عايش،
في الأخر يطلع عايش، وهو اللي رماني، إيه ضميره مأنبوش مره يخليه يسأل عن ابنه.
نجوى بهدوء: أهدى حبيبي، كل كلمه قولتها عن والدك كانت حقيقه، هو فعلا كان طيب وحنين، ويخاف عليا. بس مش عارفه اتحول مره واحده وكسرني، لكن هو معرفش اني كنت حامل أساسآ.
سليم بدهشه: يعني هو مكذبش لما قال أنه مكنش يعرف بحملك؟!
نجوى: لا مكذبش، أنا خفت أقوله، يستمر معايا لما أولد و ياخده مني، وكنت بتنقل من بلد لبلد علشان أهرب من كلام الناس اللي محاوطني، ولأني مقدرتش أقول اني كنت متجوزه علشان مينفذش تهديده، وعمك كان راجل على قده مش هيقدر يقف في وشه.
وضع سليم يده على وجه أخته: نجوى بلاش انتي تيجي معايا، مش هتقدري تشوفيه، أنا هاروح، وادعيلي أنها تبقى كويسه، وااا
نجوى: إيه كمل.
سليم: تفتكري هتسامحني؟
نجوى: سيب كل حاجه للظروف، المهم إنها تكون بخير، وياله علشان هاجي معاك انا لازم اشوفها، وإن كان عليه فكفايه اللي هو فيه دلوقتي، وربنا يسامحه على ظلمه.
🙁🙁🙁🙁
عند هنا كانت تحاول كثيرآ الإتصال ب هاني، لكن لا يوجد رد، ثم تعاود الإتصال فتجده مغلق فتحدث نفسها: ياترى انت فين يا هاني، الوقت اتأخر وانت قولت هطمني أول ما توصل، أنا هاتجنن من قلقي، نظرت للسماء من نافذة غرفتها ودعت الله قائله: يارب انت تعلم بما في قلبي أكثر مني يارب احفظه من أي مكروه، واجعله من نصيبي.
💞💞💞💞💞
نرجع المشفى.
دخل سليم، ومعه نجوى، وسامح الذي أصر أن يرى هذه من يدعون أنها عمته، فهو طالما تمنى أن يكون له أب او حتى أهل من ناحية أبيه كباقي أصدقاؤه.
انطلق سليم نحو غرفة العمليات بعد أن سأل في الإستعلامات عن مكان سما عندما وصل كانت لازالت بالداخل، وعندما رأه هاني نهض من مكانه وأسرع نحوه، وأمسكه من ملابسه بغضب شديد: ليه عملتلك إيه، دي وثقت فيك
ده انا، أنا وثقت فيك، وقلت وكيل نيابه لا يمكن يخون ضميره
تركه هاني وجلس وقال: بس انا اللي غلطان، منبهتهاش، تخيلت أنها أخيرآ لقيت الحب اللي هيسعدها، سبتها وسافرت بكى بصوت مرتفع ياريتني ماسافرت، يارتني.😢😢😭
ثم وقف وقال له أمشي مش عايز أشوفك امشي.
كل هذا يحدث أمام توفيق الذي يسبح في عالم أخر، قلبه يكاد ينخلع خوفآ على أخته، لا يقدر على الحراك أو حتى الكلام.
اقترب سليم من هاني وقال بحزن: أسف يا هاني أنا فعلآ خنت الثقه بس سما لسه مراتي، وأن شاء الله كل حاجه هتتصلح، بس هى تقوم بالسلامه أرجوك اديني فرصه.
كانت نجوى مازالت بالاسفل، تحاول جمع شتاتها، وقررت أن تؤجل المواجهة الأن صعدت لكن انتظرت هى وسامح بعيدآ حتى يطمئنهم سليم عليها، وعندما يبتعد توفيق تذهب لتراها.
عند غرفة العمليات جائت سالي تهرول، عندما حدثت هاني وعلمت لما انقطع الإتصال بينها وبين سما.
سالي: إيه اللي حصل ياعمي.
نظر لها توفيق بدموع ولم يتحدث.
نظرت لهاني: طمني انت يا هاني الدكتور فين وقال إيه، توأمي جرالها إيه يا هاني.
نظر لها نظرات زائغه، وصوت ضعيف: عربيه خبطتها، وهى لسه في العمليات، منعرفش حاجه.
جلست سالي أرضآ تبكي فهى على وشك أن تفقد صديقة عمرها، ونظرت لأعلى ودعت فى سرها: يارب نجيها، أنا لغيت سفري مش هسافر ياسما بس قومي يااارب.
خرج الطبيب من غرفة العمليات وعلى وجهه علامات الأسى؛ هرول إليه الجميع معلقون أبصارهم على شفاهه، ينتظرون حديثه.
الطبيب: للأسف ياجماعه، اتسعت عين الجميع ووضعوا أيديهم على قلوبهم، عندما رآهم الطبيب على هذا الوضع قال: المدام بخير، كسر مضاعف في القدم اليمنى، وجرح بسيط في جبينها، لكن للأسف فقدت الجنين.
وقع الخبر على الجميع كصاعقه كادت أن تفتك بهم، حتى نجوى، وسامح الذين اقتربا قليلآ ليستمعوا دون أن يراهم أحد.
ساد الصمت، ولم يقطعه سوى صوت سالي: مدام! وجنين، فيه إيه يا هاني إيه التخريف ده.
لم ينطق هاني بحرف.
سالي: قولي انت ياسليم، وانت إيه عرفك ثم اتسعت عيناها بصدمه، انت اللي عملت كده، دفعته للخلف وهي تردد إنت ليه ليه؟
جلس سليم أرضآ يشعر وكأن عقله سيجن: أيوه انا اللي قتلت ابني انا.
جلست نجوى مصدومه، ولم تستطع الذهاب لأخيها، فهو الأن اصبح ظالم مثل حبيبها، جلست تبكي، وسامح يحاول تهدئتها.
😢😢😢😢😢
ياترى رد فعل سما هيكون إيه لما تفوق؟ وسليم هيقدر يواجه كل المشاكل دي ويصلحها، ولا هيبعد؟ ونجوى ، وسامح ومواجهتم مع توفيق؟
انتظرونا في الفصل القادم أن شاء الله.
💙💙💙💙💙💙💙💙💙
بقلم..دعاء الفيومي& مروة الناغي.
أنت تقرأ
عقاب بلا ذنب
Romantiekمن أكبر الأخطاء التي يقع فيها العقل، هو تحدي القلب والإصرار على عقاب أشخاص على ذنب لم يقترفوه، فيصبح الندم، والحزن هو المصير المحتوم
