PROJECT RYJO 6: The Superiors: Fallen

27: Breaking the Habit

Alas-sais ng umaga at nakahanda na ang grupo nina Brielle. Pero ang paghahanda ay hindi pa sigurado kung saan ba talaga pupunta. Kung dederetso ba sa casa o sa kung saan.

Halos lahat sila, pare-pareho ng suot. Camouflage cargo pants, boots, at puting V-neck shirt. Kahit ang mga army tag nila ay suot nila para lang sa identity kung sakali lang na magkaproblema. Kahit si Aspasia ay suot ang tag niya bilang family assassin na itinatago lang niya sa bulsa ng kahit anong suot. Si Josef naman, ang tanging mayroon lang ay ang wedding ring niya na may ukit ng apelyido niya at ng asawa.

Nandoon lang sa labas si Brielle at naninigarilyo, nagpapalipas ng inip dahil ang gusto sana niya ay alas-singko pa lang, bumabiyahe na sila. Pero gaya nga ng nagaganap sa mga sandaling iyon, balik na naman sila sa planning. Nasa labas lang din si Aspasia at naglilibot-libot habang wala pang balita sa mga kasama nilang lalaki.

Nasa salas naman sina Josef at nag-iisip na naman ng gagawin dahil sa natanggap na tawag kay Erajin may ilang oras na ang nakalilipas. Nakaupo siya sa isang single-seater couch, nakatayo naman sina Razele at Mephist habang nakapamaywang.

"Nagsabi na si Jin, pupuntahan niya 'ko kapag nakuha na kita," paalala pa ni Markus na nakasandig lang sa tabi ng hamba ng pintuan. "Kung tatawagan ko siya ngayon, baka siya pa ang lumapit sa 'tin."

"Pero sa lagay niya ngayon, tingin mo papayagan siya ni Crimson na umalis?" tanong ni Razele.

"I doubt that," kontra agad ni Mephist. "Or kung payagan man niya si Jin, for sure na magkasama sila."

"And besides, phone ni Dan ang ginamit niya. If we'll try to reach out, probably Dan will answer the call this time," dugtong ni Markus.

Naubusan na ng iisipin si Josef, pero ayaw niyang tumunganga na lang doon at maghintay. Kinuha niya ang phone ni Markus na nakalapag lang sa center table at hinihintay nila kung may paparating bang tawag mula kay Erajin.

"Hey, may password 'yan," paalala ni Markus kay Josef. "Let me—" Hindi na niya natapos ang sinasabi nang itutok na lang ni Josef ang phone sa tapat ng bibig at nakarinig na lang sila ng ring sa kabilang linya.

"Did you just . . . unlock my phone . . . ?" di-makapaniwalang tanong ni Markus.

Parang walang narinig si Josef, nakatingin lang siya sa ibaba habang naghihintay ng sagot sa kabilang linya.

"Jesada," biglang sagot sa phone.

Sabay-sabay silang napataas ng kamay at nagtatanungan kung ano na namang gagawin nila dahil si Crimson na ang sumagot.

"Si Shadow 'to," diretsong sagot ni Josef. "Nasaan ang asawa ko?"

Nakarinig sila ng matunog na pagngisi sa kabilang linya. "Ah . . . I see. Iniisip mo bang magiging kakampi mo ng mga kapatid kong minsan ka nang pinagtangkaang patayin?"

"Sagutin mo ang tanong ko. Nasaan si Armida?" mariing tanong ni Josef.

"Armida . . ." May mahinang tawa mula kay Crimson. "Mula nang dalhin siya sa Isle at pabayaan nina Cassandra, hindi na siya si Armida. At bakit mo pa ba siya hinahanap? Nakuha mo na ang posisyon, hindi ba?"

Napakuyom ng kamao si Josef at pigil na pigil ang galit habang nakikinig sa kabilang linya. Kahit wala pa man itong sinasabi, nakakaramdam na siya ng galit.

"Hanggang ngayon ba, pinagmumukha ka pa rin nilang tanga? Ni hindi ka man lang ba nagtataka kung ano'ng ginawa nila kay Erajin kaya nawala ang mga alter niya? Kung bakit nandito siya sa labas at wala sa Citadel?"

Sa pagkakataong iyon, nagkakapalitan na ng makahulugang tingin sina Mephist at Markus. May ipinararating ang mga tingin nila na hindi papabor kay Josef.