السلام عليكم لبنات 😸❤
بوون ليوم غادي نهدرو على تطوير الذات
كيما تعرفو في مجتمعنا كاين حياة وحدة تتعاود مع أغلبية الناس، تجي لهاد الدنيا ،تقري، تتخرجي، تخدمي و تنخطبي في نفس الوقت، تتزوجي، تجيبي صغار، وصايي هادي هي حياتك لي يفرضها عليك المجتمع. يفرض على قاع الناس تكون كيف كيف . و المشكلة حتى ويلا تبعتي هاد الشي، الناس دايما تقعد تهدر عليك و ماتطلقكش 🙀. باختصار مادام اذا درتي وش المجتمع يفرض عليك غادي يهدرو عليك الناس، واذا درتي لي انتي راكي باغية ديريه يهدرو عليك الناس. تبانلي الاحسن دير شا نتي راكي باغية، يلاق تعرفي بلي هذي حياتك ، حياتك كتاب صفحاته فارغة وانتي تعمري بيه هاد الصفحات، هاد الصفحات مشي خسارة كون تعمريهم بنفس الطريقة لي عمروهم بيها ڨااااع الناس؟
انا تبانلي خسااارة كبيييرة، بيسك عندنا حياة وحدة، وحدة فقط ،علاه مانديروش فيها شا نبغو حنا؟ علاه كلشي يلاق يفرضوه علينا؟
في هاد الدنيا والله يلا كلشي ولا متشابه، الناس تعيش قاع نفس الحياة، تلبس قاع كيف كيف، تماكيي كيف كيف، تبع نفس الميول لي يتبعوها لخرين. جامي سألتو روحكم علاه هاد الشي. علاه انا بامكاني ندير حاجة كبيرة، وانا لا قاعدة في بلاصتي نتبع فلان و فلانة، ونقول الجملة الشهيرة" ڨاع رآهم هاك" . يلاق تعرفي بلي مالازمش تكوني فرد من هاد لقاع، يرحم باباك لازم تعرفي تكوني مختلفة و ماتحشميش بالاختلاف تاعك، أبدا أبدا. الواحد في هاد الدنيا يلاق يكون مميز مشي قاع في واد واحد.
رانا متفاهمين بلي هادي حاجة مشي ساهلة، و ماتجيش في ضربة وحدة، وانما تجي بشوية بشوية، مع الصبر، المثابرة ، والالتزام.
هادي كانت مدخل فقط ،سييت من خلاله نحرك المشاعر تاعكم، ان شاء الله نكون لمستها ولو شوية، في لي بارت الجانبين نزيدو نكملو و نفهمكم وش هوما طرق التغيير، ان شاء الله هاد البارت يكون عجبكم، ماتنسوش تخلولي رايكم 🙏، و اقترحو عليا موضوع نهدر عليه غدوا ان شاء الله:صداقة، طبخ ،علاقات عاطفية،قرايا ....الخ.
شكرا على القراءة صحا فطووووووووووووركم و غدوا ان شاء الله 🌷🌷🌷🌷
