أسعد الله أوقاتكن 🌺
لبارت تاع اليوم كيما قلتلكم غادي يكون عبارة عن نصائح ، نصائح عن كيفية التقرب من الله اكثر ❤
خطرات ننسو رواحنا و نبعدو على ربي شوية و كي تبعد على ربي اكيد ماغاديش تحس روحك مليح، غادي نعطيكم خطوات بسيطه تخلينا نسڨمو أسمى علاقاتنا و هي علاقتنا مع خالقنا
👈 الاستيقاظ لصلاة الفجر، هذي أهم حاجة يلاق نتعودو نديروها غير بشوية بشوية حتى نتعودو، خاطر كي تصلي الفجر البركة غادي تكون في يومك و تحسين بقوة و نشاط كبيريين.
👈 الصلاة في وقتها، مين يأذن الاذان حطو كلشي في يديك و روحي قابلي الله عز وجل، تخيلي الله نفسه يناديلنا باش نقابلوه و حنا نلهاو بصوالح وحدوخرين كيما تلفون ..... ، احتراما للخالق لبنات صلوا صلاتكم في وقتها
👈 اذا كنتوا من لبنات لي يصلو الفجر في وقته احمدو الله و حاولو تنوضو غير عشر دقايق قبل الآذان،صلو ركعتين نافلة و دعو ربي خاطر هذاك الوقت الدعاء فيه مستجاب
👈حافظوا على قراءة القرآن، حاولو يوميا اقرو صفحة قرآن بتمعن والله يلا تحسو تغيير كبير للأفضل طبعا
👈 حافظوا على اذكار الصباح والمساء و النوم، هادو مهمين بزااااف باش تبعدوا عليكم قاع وش يأذيكم و تتقربو من ربي كثر و كثر
👈 كثروا الدعاء، ادعوا ليكم لفاميلتكم لناس لي تعرفوهم و لي ماتعرفوهمش ،المهم كثروا الدعاء فهو يحقق المعجزات
👈 و اخيرا حاولو تتأملو في خلق الله، في الطبيعة (سماء،قمر،نجوم، غابات،ازهار....) هذ الشي راح يجيبلكم طمأنينة و راحة بال كبيرة جدا ،وغادي يخليكم تكتشفوا عظمة الخالق
كان هذا هو البارت تع اليوم،ان شاء الله يكون عجبكم، و يكون فادكم ،درته قبل كل شيء باش نذكر روحي و نذكركم باش نرجعوا لربي فالحياة مع الله أجمل، ماتنسوش تخلولي نجمة 🌟 و تعليق 💬 و قولولي وش راكم باغيين تقرو فلبارت الجاي ان شاء الله، ماتنسوش تقرو سورة الكهف اليوم الجمعة، و شكرا ❤
