صباح الخيرات 💜💜💜
البارت تع اليوم رح يكون عبارة عن بارت تحفيزي 🌟
لبارح قريت وحد القصة فلكومنتار تع انستغرام أثرت فيا بزاااااااااااف و بغيت نشاركها معاكم و ان شاء الله تحفزكم كيما حفزتني، بون غادي نحكيهالكم بطريقتي.
هاد البنت قاتلك باباها كان مريض بالسرطان (الله يعافينا و يشافي كامل المرضى ان شاء الله) و هي كان عندها امل كبيييييييييييييير باش يبرا و يولي كيما كان ،كانت متفائله لدرجة كبييييييييييييييرة ، حتى جاو واحد ليامات الحالة تاعه تدهورت ، نهار من نهارات دخلت عليه فسبيطار قالولها مات، قاتلك ماقدتش تتحمل هاديك الصورة تع باباها مغطي و ميت مايهدر مايتحرك، ماكانتش تتصور حياتها بلا بيه، قعدت تعيط و تبكي بأعلى صوت و عايلتها يسكتو فيها ، مبعد راحت لدار سيت تكالمي روحها باش تقول لخبر لخوتها صغار، حكاتلهم و الليلة قاع و هي تواسي روحها و تواسيهم، لغدوا عليه كان عندها امتحان كانت تخدم عليه قاااع العام باش تنجح، مع الاول ما حبتش قاع تروح،مبعد قالت كون بابا كان حي اكيد كان رح يقولي روحي ماتراطيش، قالت كون نقعد هنا وش غادي نبدل،اكيد مانبدل والووووووو،و كيما كان لحال باتت الليل تقرا وفوتت الامتحان و جابتها الاولى
القصة حقيقية مئة بالمئة، سمحولي يلا الأسلوب تاعي ماكانش مؤثر بصح سييت قد مانجم باش تأثر فيكم و لو شوية
الرسالة لي بغات توصلها من هاد القصة ،هي ان الانسان ما لازمش يستسلم للعقبات، لازم تكون عنده الثقة في ربي بلي كل شي يصرالنا لي حكمة غير ربي لي يعرفها، ما لازمش تفرطي في حلمك و ضيعيه، لي حاب يوصل لازم يصبر ، حتى حاجة ماتجي ساهلة، فدنيا هادي جاتنا صعوبات كبيييييرة و مازال تجينا صعوبات أكبر بصح القوي يتغلب على كلشي و ينوض من جديد،خلو الثقة في ربي ثم في نفوسكم،ماتخلو حتى حاجة و لا حتى واحد يدمركم، والله ماكاين مستحيل اذا خدمتو بجد لاهدافكم و سعيتو لي تحقيق احلامكم، طيحو و نوضو مشي عيب ، المهم كي تكبرو ماتندموش على شبابكم و احلامكم .
هذا كان البارت تع نهار اليوم،ان شاء الله يكون عجبكم،بليييز خلولي رايكم، نجمة و تعليق
شكرا ❤
