#بنت_خالتي ( الجزء الثاني من سلسلة اقرباء ولكن )
الفصل السابع عشر ماقبل الاخير
جاء ثاني يوم وامي وكانو وعمتو مريم طلعو للسوق وحسيت ان البسيط انقلب لحاجة كبيرة لان كل مرة جاي واحد منى وربيعة وكاميليا وايمان واماني وحتى عيال جديداتي كل مرة جاي واحد بمرته وعياله حتى من الشغالة اللي تجيب فيها امي لما ادير حملة نظافة على الحوش كله جاية من صبح ربي وشوي وخش عمو رواد بشكاير خضرا ولحم وانا مش فاهم وسلامات واحضان حارة وركبت لوتين دقيت باب دارها وحطت وشاحها على راسها وطلعت ليا
وتين بحب .. صباح الخير حبيبي
انا .. صباح الورد وين راقدة لتو والحوش ماشاءالله خلية نحل تحت
وتين .. نمشي بوصايا حنينة نرقد كويس وحتى الفرح اليوم قالت ليا نمشي ساعتين بس ونروح
انا .. صح ليك قدرتي ترقدي انا ماقدرتش نرقد كويس
وتين بحشم .. بيش نكون مصحصة للي جاي
انا.. به حبي هيا انزلي عيال جديداتي كلهم جو حتى اجديداتي بيجن بعدين ومنى قالت حتى عيال جديدة خديجة الله يرحمها جايين في الطريق
وتين .. اه عارفة
انا.. كيف صار وتغير البسيط لكبير
وتين .. ببساطة حنينة عارفة ان بعد تروح على خير وسلامة مش حنرضى اندير فرح وهيا ماتبيش تفوت عليا حاجة لدرجة بكرة بدير حنة صغيرة ليا وبعد بكرة فرحنا بس بدل مايكون في الليل حيكون في النهار والعشية نطلع انا وياك مابين ماجهزو دارك
انا.. وين بنمشو ومافيش وقت حتى نحجز شاليه
وتين بخجل واضح .. بابا وماما واحنينة وجدو اقترحو الفترة هذي نقضوها في شقة اهلي وهما يقعدو هنا بيش نقعدو على راحتنا اكثر غير ان التعديل اللي بيدروه في الدار بياخذ وقت
انا .. وانا اخر من يعلم وين بنقعدو ردي بالك تقولي دار كانو وباتك
وتين بهزة راس .. لا في داري انت عارف ان نظام داري سريرها صح فردي لكن كبير اكبر من سريرك
انا بضحكة .. اه فهمت ماعنديش مانع حد يكره ان يكون بروحه بدون مايدير حساب لحد يسمع صوته او همسه
وتين ..عبدو بطل صماطة
انا.. هيا نازال وانتي ياقلبي حتى انتي انزلي تو انت صبية الحوش لان لا امي ولا كانو ولا عمتو مريم قاعدات وريفو وريسو والين ويارا وعائشة بلاك يوحلن
وتين .. هيا نغير دبشي وننزل
مشى باتي بعد الغذاء هو وعمو معتز والدكتور عماد ومعاه ياسين وخالد و رائد عيال جديداتي وخطبو وتين من جدها موسى اللي فرح بتكبيرة باتي ليه وعمو رواد عجباته رغم انه قال نحن عيلة وحدة لكن تكبيرة القدر بهله عجباته واجد واتفقو على كل حاجة
وعدى اليوم على خير وقديش طلعت وتيني حلوة بحجابها رفعتها للفرح هيا وريسو والين اما يارا وريفو ومعاهن عائشة قعدن دايرات بالهن من الحوش بالذات ان كانو اطرت تمشي تقعد مع صبيتها في الفرح ماتجيش تسيبها وبعد ساعتين بالزبط روحت بوتين والبنات
انا.. شنو جو الفرح
الين .. غريب
انا باستغراب .. كيف غريب
الين .. العروس تحسها عادي فرحانة
انا .. عروس اكيد بتكون فرحانة
ريسال .. بس مش رحيق يا عبدو وانت عارف اللي صاير
الين تكمل عليها .. يعني تقول كانت تحب الصافي وخذاته مش تحب الزين وخذت واحد بداله
انا.. بالك قدام الناس بيش تبعد اي ضن
الين .. ممكن
انا .. وتيني كنك ساكتة
وتين بهدوء .. مافي شئ حبيبي
أنت تقرأ
(سلسلة اقرباء ولكن) الجزء الثاني بعنوان بنت خالتي
Truyện Ngắnسلسلة أقرباء ولكن هي سلسلة متصلة ببعض وعشان تفهم الجزء الثاني لازم من قراءة الجزء الاول منها بعنوان (بنت عمي) التنزيل يومي باذن الله اسعدني الوسام كثيرا وحتى قبل ان تنتهي.. حياة #7ابداع 9#ابداع 5#ابداع 6#ابداع #4ابداع
