(سلسلة اقرباء ولكن) الجزء الثاني بعنوان بنت خالتي

الفصل الرابع

#بنت_خالتي (الجزء الثاني من سلسلة اقراباء ولكن )

الفصل الرابع

انا ومازالت بصدمتي .. وتين انا مشـــ
على جيت كانو قمعزت حذاي
انا.. وتين عدي غيري دبشك تو نكملو حكينا بعدين
وتين .. به
والتفتت لكانو .. شنو الوضع اموركم تمام مع عزوزك
كيان .. عادي غير هالمرة سلمت عليا بالاحضان بقوة مش بالبرود وسلمت على احفادها بحرارة حتى من وتين استغربت
انا براحة .. باهي الحمدلله بالك ربي هداها واصلح حالها
كيان .. والله ماني طامعة حتى هكي كويس انها تسلم عليا زي الناس وترحب باحفادها لانهم ماهمش صغار وتمو يفهمو في تصرفاتها لكن اليوم ردت فعلها ريحت حتى رواد اللي حسيته على اعصابه كاين
انا .. صح عمو رواد اكيد بيكون على اعصابه بالذات زي ماقلتي العيال كبرو يعني حمودي عشرة سنين يفهم تو مش صغير ويحس بجفاء جدته ليه
كيان .. صح كلامك والله حسيت بفرحتهم لما سلمت عليهم جدتهم بالاحضان وحتى لما جينا بنطلعو شدت صح مش واجد لكن على الاقل بينت ولو شوي انها تبينا نقعدو
انا.. ربي يكملك بعقلك يا كانو كان وحدة ثانية حتى خشوش للحوش ماعاد خشت
كيان .. والله ماهو على خاطرها لكن على خاطر عمي اللي كبر ومعاش متحمل شئ ولو ننقطعو عليه حيتعب اكثر وتصدق لما مسكتنا اننا نقعدو حسيت بنظرة راحة في عيون عمي 
انا.. اكيد وهو عارف ان سبب بعد ولده الكبير عليه هيا امه
اه خطرها كلمتوهم يجو والله لا
كيان بحب .. طلع بابي مكلمهم كلهم حتى امل لقيناها هيا وصباح وايمن و آية وبيجو كلهم هما وعيالهم
انا بتأفف .. اف معناها الصافي بيجي
كيان بضحكة .. والله ماهو معدل على وتين يشوف فيها زي اخته غير انت اللي غيرتك ماليها حل
انا .. مش غيران لكن هو طبعه قاسي ونخاف يوجع وتين بكلمة وبالذات انتي عارفة وتين قديش دلوعة ومدللة
كيان بتنهيدة .. الله غالب وضع هله اللي خلاه هكي
انا.. به ليش عمو رواد مايساعدهمش بالذات حالته المادية كويسة ويعتبر هو خوها
كيان .. ياريت يابو تعرف رغم وضعهم المادي عندهم عزة نفس كبيرة ترفع راس كل واحد ان يكون عند عيال عمه زيها هيا وراجلها
انا.. فعلا وعمي صلاح ربي يعينه يشتغل في شغلتين بيش يالله يلام الوضع لكن المفروض عمو رواد لقى طريقة حتى بالخفى يساعدهم
كيان .. ياريت تصدق انت زمان لما نجحت عملية زرع اسماء وهما اشجعو انهم يديروها باعو قطعة الارض اللي يملكوها بيش يقدرو يديروها ولما ماصارش منها تأثرو واجد تخيل رواد اطر انه يبعت فلوس لصباح وآية رغم انهن مش مستحقات لكن بيش امل تأخذ الفلوس اللي بعتهن لها بحجة انه بعث ليها زيها زي خواتها وهما فرحو بيهن واسلفو عليهن وجو للدكتورة اللي دارت العملية لسومة وتعرف بالدرقة بابي خلص حق الدكتورة وقاللها تقوللهم انها متنازلة على حقها في العملية لانهم جايين من طرف بابي وفرحو واجد بالخبر هذا والحمدلله ربي رزقهم بزين الدين وربي لانه يحبهم رزقهم بمعتصم بدون علاج وتخيل من طيبتهم الفلوس اللي ردو بيهن من مصر امل ساعدت بيها سلفتها لما جابت بنوتتها رحيق لان حتى سلفها اكثر من راتب ما عنده حاجة
انا .. فعلا عمتي امل طيوبة واجد يعني وحدة تصغر من حوشها عشان تقسم منه لسلفها معاش حد يديرها تو
كيان .. لكن تبي الحق والله حتى سلفها يستاهل غير انه ولد عم امل غير انه يتعامل معاها زي اخته واغلى بالذات خوات صلاح و اسامة اكبر انانيات شافتهن عيني و اسامة لقى الحن والتصباي من امل اكثر من خواته وديمة مصبي معاهم بلي يقدر عليه وحتى لما قرر انه يتزوج بحب عمره اول حاجة وصاها عليها هيا امل لدرجة خلود مرة قالتلي ان اسامة قاللها امل قبل خواتي عندي وحتى لما روحت بعد الزرع ماحد عانها واهتم بيها زي سلفتها خلود لان وقتها آية تجهز لفرحها وصباح كانت حامل وقتها
انا .. ربي يحفظهم لبعض ويرزقهم من واسع ويدوم الود بينهم
كيان بمكر .. وبعدين تعال هنا ومن اللي خلاها هكي دلوعة ومدللة
انا بحب .. نحبها ونموت فيها وكان ما دللتها من بندلل وندلع
كيان .. تحمل مايجيك مش بعدين تجيني تشكي
انا .. ماتخافيش وتين عقلها اكبر من عمرها خطرها ( وحكيت ليها الكلام اللي صار بيني وبين وتين )
كيان بضحكة .. قالت لك هكي
انا .. اه والله ومازالت مش مصدق انها قالت هكي
كيان .. تعرف قالته حتى ليا ولباتها
انا .. لكن نا مانبيش يا كانو اكيد مش كره فيها وانتم كلكم عارفين انها الهواء اللي نتنفسه لكن مانبيش نربطها من تو بالزواج وبتكوين عيلة حتى لو ماجبناش عيال تو لكن اسمها بيبقى متزوجة وبتبدا كل حاجة محسوبة عليها مانبيهاش تكبر روحها قبل وقتها تي هيا ماازلت طفلة
كيان .. والله عارفة ياسبعي لكن هيا ماتبيش تبعد عليك ونا عارفة طبعك
انا باستغراب .. شنو دخل طبعي تو
كيان برفعة حاجب.. يعني تو لما قلت ليها ان اللي ادير فيه حرام هذا مش طبعك
انا قطعت عليها كلامها .. هذا ماليشي علاقة بالطبع والغلط عندي من الاول المفروض من لما بدت تعرف وتفهم حطيت حدود بيني وبينها لكن قلبي كان اضعف من اني اندير هكي لان كانت الضمة البريئة منها والبوسة على الخد هيا اللي تصبر فيا على السنين اللي بنستناها فلازم من تو تعرف ان هذا حرام وتعرفي لما كنت بنجيكم لكندا شنو بندير
كيان .. شنو
انا .. كنت مش حنخليها تحضني وتزقب عليا زي كل مرة تشوفني فيها
كيان بضحكة .. هذا في كندا بدير هكي واللي شفاته عيني شنو امنا
انا بضحكة على روحي .. ضعفت صدمتي بانها قدامي وانا كنت مضايق عشان مش معاها في يوم زي هذا خلى عقلي يغيب
كيان .. انت نيتك صافية يا سبعي وربي هو الاعلم بالنوايا وربي عارف انك تبيها وانك تتمناها تكون زوجتك
انا .. تعرفي كان نقولك حاجة رغم اني محاصر وتين ومش مخليها تفكر او تحب غيري لكن خايف خايف والله
كيان باستغراب .. خايف من شنو
انا .. خايف من النصيب خايف يا كانو تصدقي ندعي لربي في كل وقت وكل صلاة مايبعدني عليها او يبعدها عليا
كيان .. به ياسبعي ليش ماتعقدش عليها وخلي الدخلة لعند العمر اللي تبيه
انا بهزة راس .. لا يا كانو بالله عليك افهميني انتي عارفة اللي نقولك فيه مانقدرش نقوله حتى لباتي وامي
كيان بخوف .. شنو حسك خوفتني
انا .. لو عقدت عليها حيلتغى الحاجز اللي بينا لانها على سنة الله ورسوله بتكون مرتي ونا مش حنعرف نمسك روحي عليها انا ببوسة بسيطة على الخد وحضن يصير فيا حاله فمبالك لما بتكون مرتي (وباحراج كبير ) افهمي عاد
كيان بضحكة .. خزي خوفتني سحبتها حاجة ثانية كلامك صح بالذات انت بالغ لكن من تو بنقولها لك هالست سنين الجايات مش حيكونن ساهلات عليك
انا .. على قد ماكنت نستنى في اليوم اللي تروحو فيه على قد ماتمنيت انه يوخر شوي
كيان بشرود .. كان لازم منها مرواحتنا
انا وفطنت لشرودها .. ليش لازم حتى الفلوس اللي غادي ماتتقارن بشئ
كيان .. مهما كانت المادية كويسة الا الغربة واعرة وبالذات مع موسى بدا يفطن بكل شئ وبيخش العمر الحساس اللي صعب السيطرة عليه فيه مع اني نحس فيه واجد زيك لما كنت بالعمر هضا
انا .. به طالما تحسي بيه زيي ليش خفتي
كيان .. صح زيك لكن الاصحاب يختلفو انت لما كنت في عمره صاحبت  عيال الدكاترة اللي مع بابي وسومة وعيال كان همهم كيف ياكلو وكال صحي كيف يتفوقو في قرايتهم كيف يحسنو من بنية جسمهم لكن موسى مافيش واحد من اصحابه عربي ورفض رفض تام انه يقرا في مدرسة خاصة بالعرب وانت عارف مهما كنت تربي صح ومهما كنت فاطن لولدك لكن الاصحاب ليهم الدور الكبير في تكوين ولدك
انا .. صح عندك حق الاصحاب ليهم دور كبير ونا ممتن واجد لمازن وقسم  انهم كانو بسببهم نا بالشكل هذا وبالطبع هذا
كيان بحب .. والله حتى بلاهم كنت حتكون هكي صدقني لانك من عمرك صغير وانت عندك ميول تتحمل المسوؤلية وبانت من لما كنت كيف مهتم بيا خطرها مازالت على تواصل معاهم 
انا ..  اكيد شنو اللي بيقطعني عليهم
كيان .. قلت ممكن رفقتك بي اوس او بعد المسافات
انا .. لا الصحبة الكويسة عمرك ماتخسريها اطمني عرفت اوس عليهم وتمينا قروب واحد وديمة نحكو مع بعض فايبر او سكايب غير اني نمشي ليهم ديمة والايام الجاية ممكن يجو هما
كيان .. ربي يدوم الود بينكم يارب
على طلعة وتين
وتين بضحكة .. ها شنو رايكم
انا بصدمة .............
#حياة
تعديل اخطاء املائية وحوارية #الصابرة
والشكر لمصممتنا الحلوة رورو على الغلاف الحلو