(سلسلة اقرباء ولكن) الجزء الثاني بعنوان بنت خالتي

الفصل الثامن

#بنت_خالتي (الجزء الثاني من سلسلة اقرباء ولكن )

الفصل الثامن

امي بصوت مبحوح من كثر البكا..مرحلة وحنفوتوها بتفوق ثقتي بربي كبيرة نا
انا .. تعرفي يا امي قديش حمدت ربي اني مكنتش اناني
امي ومازلت حاضنتني .. ليش
انا.. لاني لو كنت اناني راه كنت رفضت انك اديري عملية الزرع تخيلي لو انا اناني ورفضت وبعدها صارلي اللي صار راه كنت بنموت من كثر خوفي عليكم بعدي لكن تو الحمدلله ان عندي خوت
امي لفتني شورها وحطت ايديها على كتوفي .. ماتقولش هكي يا يمي انت حتعيش وحتكبر وحنشوفو عيالك اخرى
انا بوجع .. عارف يا امي والله ماني فاقد الامل بربي وظني بيه كبير وخير كله لان ربي قال ان عند ظن عبدي بي وان ظان كل الخير بربي واي شئ من ربي الحمدلله بس حاجة وحدة بس خايف
امي بدموع ينزلن .. خايف من شنو
انا.. خايف بعد ما انا المفروض سندكم في الدنيا والعون ليكم في كبرتكم خايف نكون انا اللي نبي العون
امي وتمسح في دموعها .. به وانكان ربي طلعك من العملية معاق او اعمى او اي كانت الاعاقة قصدك نحن بتكون عالة علينا لا يا ولدي ربي يبلي بعض من الاهالي بعيال معاقين من الولادة ومع ذلك عمرك ماتسمعهم يشكو لابال انت شلتنا واجد ايام ضغط شغلنا في مصر كنت ادير في بالك على خوتك ومعاها داير بالك من روحك ومني ومن باتك كنت دايمة شايلنا خلينا شوي نشيلوك
انا بتنهيدة .. اللي جاي صعب يا امي
امي بضحكة .. صعب لكن اللي حمله ليا باتك اصعب واصعب
انا باستغراب .. شنو
امي .. نخبر نا كانو
انا بضحكة .. تي هذي اصعب من تحرير فلسطين يكون الله عونك
امي .. به شنو رايك تمشي معاي وتدعمني
انا بتفكير .. امممم لكن مرات وتين ماتكونش عدت للمدرسة بالذات اذا كانو بلغتها باني معاش نبيها
امي .. استنى نتصل بيها

واتصلت امي بكانو وقالت ليها ان وتين مش قاعدة والعيال كلهم في مدارسهم مافيش حد في الحوش الا هيا وعمو رواد وقالت ليها انها جاية ونا معاها وبعتت رسالة على فون عمو رواد وقالت له مايطلعش من الحوش لان في خبر مهم لازم يكون حاضر عشان يساعدها على كانو

انا.. امي ليش بعتي لعمو رواد
امي .. لانه مرات يطلع ويقول بالك نبو كيان بروحها على الاقل معاي يقدر يهدي كيان
انا.. حتى نا نقدر انهديها ان شاءالله هيا السيارة سخنت

وطلعنا ووصلنا للعمارة اللي تسكن فيها كانو وفتح لينا عمو رواد وواضح انه متوتر

كيان وخاشة بسفرة كبابي .. احلى هوت شوكلت من دياتي
وقمعزنا وخذينا الكبابي منها وبدون مقدمات سبقت امي
انا .. كانو قلتي لوتين
كيان .. اه قلت ليها لكن خايفة
انا .. عليش
كيان .. ردت فعلها غريبة هادية وكأنها عارفة بنقول ليها حاجة زي هكي حتى لما لقيتها توتي في روحها للمدرسة قلت ليها اقعدي اليوم مش لازم قالت ليا انها شهادة واي غياب يأثر عليها بالذات انهم في الايام الاخيرة قبل الامتحانات والابلات يراجعو ليهم
انا .. الحمدلله بالك فكرت بعقل وقالت ليش نتمسك بواحد مايبيني
عمو رواد .. بنتي مش هكي يا عبدو وانت ادرى واحد بيها لكن مرات الهدوء الذي يسبق العاصفة
كيان .. به ماتبيش تقولي شنو السبب اللي خلاك ادير هكي
امي وبدن الدموع يتجمعو في عيونها .. لانـ
انا قطعت عليها .. استني يا امي قبل عمو رواد وكانو اللي بتحكيه امي ليكم تو لو تحبوني صح وباقيين على الايام اللي فاضليني اني ما نقاطعكمش وتين ماتعلمش بولا حاجة من اللي بتقوله امي تو
عمو رواد .. كيف الايام اللي فاضلينك
امي .. كيان انتي عارفة ان ربي ليه حكمة في كل شئ (وبدن دموعها ينزلن ) عبدو عنده ورم
كيان بشهقة .. شنو وروم شنو
وصبا عمو رواد وجاء قمعز حذا كيان
عمو رواد .. اهدي يا كانو اسمعي قبل
امي وتمسح في دموعها .. عبدو تو في حرب مع الوقت وكل تأخير مش في صالحه والورم جايه في مقدمة الراس ويعتبر من اصعب الاورام
كيان وبدت تبكي .. اكيد تبصري عليا اكيد صح
امي ورجعت تبكي .. نبصر بحاجة كيف هذي يا كانو
كيان صبت وحضنتني ومن بين دموعها .. انت قوي وحتقاوم وترجع لي صح يا سبعي صح
انا وحضنتها بقوة .. اه انا قوي بيكم وقوي معكم ماتبكوش عشان نا مانضعفش بس ردي بالك وتين تعلم
كيان وبعدت عن حضني .. ليش ياعبدو
انا .. مش مستعد نشوف نظرة شفقة في عيونها نموت ولا نشوفها وبالذات نا مش عارف اذا ربي كتبلي عمر شنو الاعاقة اللي بيخلفها فيا الورم
عمو رواد بوجع عليا واضح انه يقاوم في دموعه .. بس وتين مش هكي ربايتها مش قليلة اصل ياعبدو
انا وجيت حذاه قمعزت قدام رجليه لانه مقمعز على الصالون .. ولا نا فكرت هكي حشى لله لكن نا مانبيش ترتبط مع واحد معاق وهي بالعمر هضا ماتنساش هيا صغيرة تو ومرات ياخذها حبها ليا انها تتمسك بيا وبعد مايمشي بيها العمر وهيا معاي ونا معاق تكره عمرها لا ياعمو مستحيل نرضى على روحي حاجة زي هذي ولا عليها
امي بجدية .. خلونا نحكو بالجد تو
عمو رواد .. تفضلي
امي .. بعد بكرة طيارة عبدو وانا واحمد ومعتز للاردن والعيال بيقعدو عندكم او انتم تجو تقعدو عندهم ديرو اللي يريحكم لكن مش عارفة شنو بنقول ليهم
كيان من بين دموعها .. نحن اللي نمشو حتى نكونو قراب من حوش هل رواد واما شنو بتقولي ساهلة هذي قولليهم انكم عندكم عمليات في الاردن وعبدو بيمشي معاكم بيدهور لانه ديمة حاصل معاهم
امي .. راي كويس اصلا مجرد مانقول عبدو يدهور حيسكتو على طول لانهم عارفين قديش خوهم ديمة شارق بيهم وناسي روحه
ورجعت امي تبكي من جديد وكانو معاها
ونا طلعت وخليتهم مشيت لشركتي وشوفت اوس ماشاءالله مش مقصر مصبي فيها تقول انا قاعد فيها وبعد مشاورات وبلغته اني بنعدي للاردن بعد بكرة