#بنت_خالتي ( الجزء الثاني من سلسلة اقرباء ولكن )
الفصل الثالث عشر
انا بصدمة .. شنو هذا
كيان بفرحة وبهمس .. حفلة برجعتك لينا طيب (ورفعت صوتها ) العمر كله يارب
وفهمت عليها ان الحفلة لرجعتي لكن قدام خوتي والعيال انها لذكرى ميلادي اللي فات عليه اسبوع
وبعد الحضن الكبير من كانو وعارفها تقاوم في دموعها
موسى .. منظرك يهبل بالنظارات
انا ونحرك فيهن .. صح
عبدالسلام .. انت ايش ما ادير يهبل عليك
وبين سلام خوتي الحار وعيال عمو معتز وسلام وتين المتحفظ رغم الشوق الواضح في عيونها ولقيت حتى الصافي وبعد السلام والاحضان والفرحة بجيتي اكثر من باتي وامي لانهم واخذين على غياب باتي وامي اما نا ديمة غيابي لما نمشي لمصر وكان طولت عشرة ايام وهالشهور هذين كثر سفري وهما مش مقتنعين بالاسباب
ومشت الحفلة حلوة بالذات انها مركزة على ذكرى ميلادي اللي فات عليه اسبوع مش على رجعتي زي ماهيا في الاصل ولاحظت شئ ولقيت اوس مركز معاي
اوس .. مركز صح
انا بعبط .. على شنو
اوس .. وتين والصافي
انا.. ولا كانهم مخطوبين
اوس .. صح يتعاملو مع بعض زي ما كانت ايام هيا لك
انا.. حتى نا مستغرب رغم مانكذب عليك اني مرتاح لكن خايف
اوس.. من شنو
انا.. انها تكون لعبة بينهم رغم يقيني بان وتين مستحيل ادير هكي
اوس.. به اسئل واطمن
انا .. اكيد لاني اول مرة نشوفهم بعد الخطوبة وحنسئل اكيد كيان عليهم وكانو مستحيل تكذب عليا
وكملت الحفلة على خير وتعشينا والاول اول بدا يروح وكيان اصرت انباتو هنا عندها لكن عمو معتز قال بيمشي هو وعمتو مريم وخلى العيال يباتو وزي العادة لما انباتو عندها العيال في دار احمد وموسى محمد وسلومي والوليد والبنات ريفال وريسال ويارا والين في دار وتين ونا واوس في المربوعة لانه مرايف عليا وقرر انه يبات معاي وباتي وعمو رواد في الصالة وامي وكانو في دارها وخشيت للكوجينة وناديت كانو
وقعدت اندير في شاي اخضر مع الليمون عشان يساعد على الهضم بعد العشاء
كيان .. فيش ادير انت لازم ترتاح
انا بحزن ماقدرتش انسيطر عليه .. خليني كانو ماحد يعلم بالك بعد شهرين معاش نقدر اندير حاجة
كيان وهيا تحضن فيا من لوراء .. ان شاءالله خير يا سبعي خلي املك بربي كبير
انا حطيت البراد ع النار والتفتت ليها بجدية ..ونعم بالله ... كانو نبي نسئلك حاجة شاغلتني
كيان وكرتني نقمعز على كراسي طاولة الاكل.. شنو سبعي شغلتني
انا بهدوء .. خطوبة وتين والصافي صح كانو
كيان باستغراب .. كيف صح
انا.. يعني مش تمثيل
كيان بضحكة .. ليش متوقع حاجة كيف هكي وبعدين اللي بيمثل يمثل في حاجة كيف هذي
انا.. به ليش علاقة وتين بالصافي زي ماكانت معاي تحسيها رسمية مش زي اي خطيبين حتى رحيق وزين رغم واضح ان في حاجة بينهم وماتقوليش ان هذوم الاثنين بيتزوجو بعد ثلاث اسابيع لكن واضح ان في علاقة بينهم حلوة
كيان بضحكة .. حي عليك يا عبدو عمري ماتوقعتك فضولي هكي ومركز مع الناس
انا .. لا والله كانو لكن عشان نصرف انتباهي على وتين ونظارتها شوري فركزت على غيرها
كيان .. مازالت ياقلبي ماتبيش تغير رايك
انا .. لو كنت قبل متأكد من قراري خمسين بالمية تو وبعد اللي صار واللي مش عارف شنو بيصير بعد العملية الثانية فمتأكد مية في المية من قراري
كيان بتنهيدة وتمني .. ان شاءالله ربي مايصير الا كل خير
انا وصبيت للبراد .. ان شاءالله يا كانو
بس برضو مارديتيش عليا على علاقة وتين والصافي
كيان بتنهيدة .. والله ماني عارفة ياسبعي تحس حتى الصافي مش قادر ينسى حبه والفترة هذي بالذات تحسه تاعب واجد حتى وتين يكلم فيها مرة وحدة بس في البداية كان السبب امتحاناتها وتو اهو كملت ونجحت حتى النجاح ولما نسئل فيها تقولي شارق في فرح خوه
انا .. استني شوي كانو قصدك حتى الصافي يحب قبل
كيان .. بالزبط شنو مش عارفة لكن اللي قالته لي وتين انه حتى هو يحب ويبي ينسى زي ماهي تبي تنساك غير الفرق ان الصافي حبه من طرف واحد
انا بوجع .. اه ربي يهنيهم ويخلي كل واحد فيهم ينسي الثاني
أنت تقرأ
(سلسلة اقرباء ولكن) الجزء الثاني بعنوان بنت خالتي
Contoسلسلة أقرباء ولكن هي سلسلة متصلة ببعض وعشان تفهم الجزء الثاني لازم من قراءة الجزء الاول منها بعنوان (بنت عمي) التنزيل يومي باذن الله اسعدني الوسام كثيرا وحتى قبل ان تنتهي.. حياة #7ابداع 9#ابداع 5#ابداع 6#ابداع #4ابداع
