#بنت_خالتي (الجزء الثاني من سلسلة اقرباء ولكن )
الفصل الثاني
للعشق انواع كثيرة وعشقك انتي فريد من نوعه وعشقي لك لايوجد له مثيل عشقي لك خاص بك يكبر بداخلي لاجلك لا ارء اي امرأة تضاهيك
فعلا فأنتي مازالتي طفلة تعادل كل نساء العالم في نظري انتظرك ان تكبري لكي تحتويك يداي لكي اغمض عياني على اخر شئ اره وهو انتي اتمنى من الايام ان تركض سريعا حتى تصبحي لي
...... عاشق نياط
مرن ايام وسنين وتخرجت من الجامعة ونمشي لكندا كل صيف نعبي في عيني ونسقي في روحي من شوفت وتين وقديش نفرح لما تلاقيني بالاحضان وبوسات الخدود رغم انها صغيرة وماتعرفش هيا شنو ادير فيا لكن نصبر في روحي ونقول هانت مازال تكبر شوي وتو نا عمري واحد وعشرين سنة نخدم في مكتب لدراسات الهندسية بيش نكسب خبرة وصفحتي وصلت لثلاثة مليون متابع والمتابعين توسعو تمو من دول واجدة وديمة نفتح الصفحة نلقى في رسائل نين نتعب من الرد عليها واغلبهم سؤال واحد هل ما اكتبه حقيقي
وما يندروش انها مش حقيقة بس تي هو لو حقيقة في حياتي مسلم بيها هيا عشقي لوتين والكلام اللي نكتب فيه ليها
باتي .. سومة
امي .. يا عيونها
باتي .. عندك علم ان رواد وكيان يجهزو في اوراقهم لان مرواحتهم قربت
امي بفرحة .. والله جد كيف عرفت
باتي .. كانو قالتها ليا اليوم لكن ردي بالك تقولي لعبدو يبوها مفاجأة ليه
امي .. حيطير من الفرحة برجعتهم
لكن كنك نحس فيك مش فرحان
باتي .. بالعكس فرحان لكن خايف
امي باستغراب .. من شنو
باتي .. من سامية لان حتى بعد السنين هذين كلها قالت كيان انها ولا مرة فكرت تتصل بيها حتى بعد ما حيالت على عمها موسى انه يتعامل معاها عادي حتى لو على خاطرها شئ ماتنازلت خايف اتعب كيان صح هيا تتصل برواد وبعد ماهدداته كيان انها تزعل منه بيش تما يرد عليها ومع ذلك عمرها ماسئلت على كانو تطمن عليها وحتى على احفادها مش مدورة
امي .. اطمن يا قلبي في الاخير بكل كيان ساكنة بروحها اللي يبيها هو اللي يجيها وهيا واجبها تحترمها اكثر من هكي هيا مش مطالبة بشئ
باتي .. والله عارف لكن هذا هو قلب الاب اللي مايبي بنته تنضر حتى من نظرة مش كلمة
امي وهيا تحضن في باتي .. عارفة ياقلبي وماتفكر في شئ خليهم غير يجو بعدين كل حاجة ساهلة
باتي .. ان شاءالله
امي .. بس تو شقتهم تبي التنظيف
باتي .. اكيد
امي .. به كيف بنظفوها بدون علم السيد عبدو وانت عارف انه يعتبر المسؤل على كل حاجة هنا
باتي .. دبارتها عندي
امي .. كيف
باتي .. نكلم مريم ومعتز يكونو حاضرين مع الولية اللي بتنظف الشقة بدون مايعلم عبدو
امي .. فكرة سمحة ومريم مش حتقول حاجــ
على خشتي عليهم لانهم مقمعزين في الصالة الصغيرة دار المعيشة بتاعتنا درت شاهي بابونج وجيتهم
انا.. فيش تحكو من بدري نسمع فيكم تودودو بصوت واطي
باتي بغمزة .. حاجة خاصة
انا بمكر .. عليا نا
امي .. كيف ماعندناش خصوصية يعني
انا.. لا والله بس مش بالعادة ادسو عليا ممكن خوتي ادسو عليهم لكن نا ما اعتقدش
باتي .. مافي شئ غير نفكرو بالك نمشو لطرابلس اليومين الجايات
انا.. اوووه الحكاية فيها تطورات
امي.. بطل سخافة انت وباتك مافيش منها الدوة هذي
باتي وهو يشرب .. ينعن شكلك وين السكر
انا بضحكة .. مش كويس السكر في عمرك هضا
باتي بضحكة .. عمري هضا تي انا اصح منك يا معفن
انا بحب .. والله عارف لكن تو الساعة تسعة يعني مش كويس السكر غير سعرات حرارية ومعاها يرفع سكر الدم واصلا انا حليته لك بالعسل الطبيعي غير حطيت شوي بس عشان ناخذو فوائد البابونج كاملة
امي بحب .. ربي يخليك لنا والله بلاك راه حياتنا ابصر كيف بتكون
باتي.. امين يارب
انا.. ويحفظكم لي يارب خطرها
باتي .. شنو
انا .. بكرة راكم تنسو
امي.. ان شاءالله خير
انا.. بكرة في مدرسة خوتي حفلة والاهل معزومين عليها
باتي .. وكنهم ماقالوها ليا لازم يدخلوك وساطة عشان تقوللنا
انا.. لا والله غير اتصل بيا الاستاذ خالد وهو اللي قالي عليها
باتي.. وليش اتصل بيك انت
انا باستغراب .. ماهو عشان معظم المدرسين والمدرسات في مدرسة خوتي عندهم رقمي نا وفي الطوارئ ارقامك انت وامي
باتي .. وليش نحن اللي في الطوارئ مش انت
امي باستغراب .. كنك يا احمد شنو في
كنك تحكــ
انا قطعت على امي .. استني شوي يا امي اولا خليني نجاوب باتي قبل وبعدين افهمي منه ارقامكم انتم في الطوارئ لانكم دكاترة وبالذات انت يا باتي مرات تكون في غرفة العمليات يعني مهنتكم صعبة ووقتكم معبي واوقات واجد تكونو قافلين فوناتكم لكن نا ماعنديش الضغوط اللي عندكم وفي نفس الوقت عملي مش مطالب فيه اني نقفل فوني فهذا ليش لما يتصلو بيا لاي طارئ نكون حاضر ولو محصلونيش يكلموك انت او امي وحاجة اخرى ممكن بسبب اني انا اللي نتابع في مستواهم وقرايتهم على طول فارقامي عندهم
باتي بتنهيدة .. والله ماقصدي حاجة لكن مانبيش تحمل نفسك اكثر ماتتحمل يعني مع قرايتك الصعبة كنت مهتم بخوتك طول الوقت لدرجة مانحسش فيك عايش زي شباب جيلك ومعاها زايد حتى عيال عمك معتز
انا بهدوء.. لو في شئ اكبر من طاقتي راه قلت ليكم عليه لاني ماتعلمتش اندس اي شئ عليكم حتى لو يضياقكم مني لكن اطمن يا باتي والله عايش ومرتاح الحمدلله وبعدين في احلى من شعور الاخ الكبير
امي .. صح يا ولدي حتى نا حاسة زي ما باتك حاس انك في حاجات واجدة ما اديرش فيهن زي غيرك
انا.. ومن قال اذا قصدك اني نطلع نهيج بالسيارة ونسنكح في الشوراع ونصبي في الزناقي او نكسد في القهواي او ماد وجهي اربعة وعشرين ساعة على فوني لا مانبي هضا كله واذا اني نعيش زي غيري بالاشياء هذي لا خليني منيش عايش ارجلي
باتي .. اكيد مش قصدي هكي نا قصــ
انا.. فاهمك يا باتي لكن والله نا مرتاح بحياتي ولله الحمد شنو نبي اكثر من هكي نطلع انصلي الفجر ونرجع نغير ونطلع نهرول نمارس رياضتي الصباحية وبعدها نجهز الفطور لحبايب قلبي ونطلع لشغلي والعشية ناخذ في اوس وخوته وخوتي وعيال عمي معتز يلعبو في جنينة او منتزه تي عندي احلى دهويرة ونا شايف ضحكة وفرح خوتي بالجو هضا وبالذات ديمة معاي اوس و اوس رفيقي يعني اثنين في واحد خوتي يغيرو في جو ونا نكسد مع رفيقي
باتي .. ربي يخليك لهم خوتك شايفين فيك الاب الثاني ليهم على الاقل كان ربي رفع امانته نكون مطمن عليهم
انا وامي .. بعد عمر طويل ان شاءالله
باتي .. ان شاءالله ويفرحني فيك يارب
انا بضحكة .. بعد سبع سنوات ان شاءالله كان حيانا الله وتمينا من اهل الدنيا
باتي بضحكة اكبر .. امين يارب وتحسب فيهن اخرى
انا.. بالساعة والدقيقة
امي .. ربي يرجعهم طيبين
انا.. باتي ما قالتش كانو امتى مفكرين يرجعو
امي .. وليش انت ماسئلتهاش
انا.. عييت من كل مرة نسئل وهيا تقول مازال فقلت بالك قالت لك شئ
باتي .. عليش متوقع انها بتكون قايلة ليا حاجة
انا.. لان اليوم لما نحكي معاها فيديو حسيت في نبرة صوتها حاجة متغيرة غير وتيني تسكت شوي وتقولي قريب نكون حذاك
باتي ببراءة ويحاول مايضحكش .. مش عارف هيا ماقالت لي شئ لكن لو قالت اكيد حنقولك
انا صبيت .. هيا امنا تو عطوني الاذن واه يا باتي الكبابي شورك غسلهن امس امي غسلتهن (وشيرت لامي ) مش تحني عليه وتغسليهن بيش ماياخذش على الدلع هذا
امي ببراءة مصطنعة .. امتى غسلتهن عليه
انا.. عليا يا سومة المرة اللي فاتت بتاعت الهوت شوكلت
امي بضحكة .. كيف عرفت
انا .. لانك رديتيهن لمكانهن لان لو باتي اللي غاسلهن راه لقيتهن زي العادة في السقطار
باتي .. وانت شنو دخلك اذا هيا حبت ادللني وادلعني
انا.. حرام عليك يا باتي يعني لو تبي ادلعك مش بغسل ثلاث كبابي وبراد وبعدين هذين مسؤليات كل واحد شوره حاجة فمنبوش انلخبطو بيش حتى خوتي يتعودو على النظام
باتي .. حرام عليك يا ولدي اكثر من هكي يبقى كفر تي هما ماشين على الخط ولا غلطة
انا بحب .. ربي يحفظهم حبايب قلبي
هيا تصبحو على خير
وطلعت من الصالة اطمنت على خوتي في دارهم انهم كملو واجبتهم ورتبو دارهم بعد ما لعبو بالعابهم وكل واحد في سريره وشوي وحيرقدو مسيت عليهم وطلعت طبعا عبدالسلام مازال يرقد معاهن وان شاءالله سنة اخرى بنديرله دار بروحه مش حلوة يرقد مع خواته ومش مناسب ليه يرقد معاي لكن بنقسم ليه من داري بحكم انها كبيرة واجد ومنها يبقى قريب مني
وقعدت نفكر في كلام باتي وامي وزيد معاها كلام اوس ليا بأني مش طبيعي معقولة اني اهتمامي بخوتي وخوفي عليهم وفعلا ممكن بسبب فارق العمر احيانا نحس في روحي كأني باتهم مش خوهم لكن هذا هو 14 سنة مش شوي فرق وممكن حتى بسبب حب وتين من صغري واصلاانا نحس في روحي كبير من لما كانت كانو معانا ونا نحسب في روحي خوها مش ولد اختها وبالذات كانت ديمة تقولي ياسبعي ممكن هذين اللي كبرني اكثر من عمري وحتى لما كبرت ووصلت لعمري هضا ماقدرتش نتغير ممكن
ومشن الايام والشهور واليوم يصادف ذكرى ميلاد وتين الـ12 وكنت ناوي نمشي ليها لكن باتي قالي انه عنده سفرية لطرابلس وبياخذ امي معاه منها شغل وتغيرت جو فمقدرتش نجهز لسفري وروحو اهلي ليهم يومين وحاس بحاجة غريبة بالذات بين باتي وامي وعمي معتز وعمتي مريم وعلى قد ماحاولت نفهم شنو يديرو او شنو يخططو ماقدرتش المهم طلعت زي كل سنة شريت هدية ليها بيش نصورها ونبعتها ليها زي هداياها الاخرات اللي مانلحقش نبعتها في موعدها وقلت تو بكرة نبعتها ليها وانا مروح استغربت اتصال باتي
باتي .. وين انت
انا.. قريب نوصل الحوش كنه في حاجة
باتي .. لا مافي شئ غير تعال عندي حاجة ليك تهبل وحتعجبك وتفرحك اكيد
انا بضحكة وبحب.. والله مافي حاجة بتفرحني زي شوفت وتين
باتي بضحكة .. قول حاجة جديدة هذي عارفينها لكن صدقني حتفرحك اكيد غير تعال
انا .. هيا يا باتي اهو جاي قريب نخش راس شارعنا
باتي .. هيا سلام
سكرت من باتي ونا مستغرب وزعمك شنو اللي بيفرحني رغم اني اليوم واعي متنكد اصلا لاني مش مع وتيني اليوم حتى امي وباتي لاحظو واعتذرو ليا ان بسبب سفرتهم ماقدرتش نسافر ونا قلت ليهم عادي حنمشي الاسبوع الجاي ليها ونحتفل بميلادها مرة اخرى ورغم اني نقول هكي لكن حاس بروحي مضايق لاني مش معاها وحتى اوس من البخت اليوم من الصبح قالي عنده امتحان قبول في شركة كبيرة بيش يكسب خبرة مابيتش نشغله معاي لكن قلت في العشية تو نطلع نا وخوتي نغير جو وخلاص
ووصلت حوشنا وجيت بنحط المفتاح في الباب لقيت الباب انفتح وكانت صدمتي وسعادتي الكبيرة اللي ما توقعتهاش تصير
انا بصدمة وفرحة كبيرة .. وتين وتيني
#حياة
تعديل اخطاء املائية وحوارية #الصابرة
والشكر لمصممتنا الحلوة رورو على الغلاف الحلو
أنت تقرأ
(سلسلة اقرباء ولكن) الجزء الثاني بعنوان بنت خالتي
Storie breviسلسلة أقرباء ولكن هي سلسلة متصلة ببعض وعشان تفهم الجزء الثاني لازم من قراءة الجزء الاول منها بعنوان (بنت عمي) التنزيل يومي باذن الله اسعدني الوسام كثيرا وحتى قبل ان تنتهي.. حياة #7ابداع 9#ابداع 5#ابداع 6#ابداع #4ابداع
